Alukasɨ 20

Abítɨ mbɨ́ʼ Adiʼ za Yeso a Lɔgɨnɨ Mɨtən ɨmyi ɨwu ə

(Mat 21:23-27; Mar 11:27-33)

1A bé a njwi tse Yeso a tsi a mu Ndáŋwi zɨ Ngwi a Yerosalɛm ndǐʼ ɨbɛn nkə́ sǒŋ Nkən wu Shiʼnɨ, bɨntumshe bə wi, bɨdiʼ bɨ Nyɔngɔŋ abɔʼnɨ bɨkum bɨ bə Yuda, bɨ bosɨ ngyen a mbó Yeso, 2mbitɨ ayi ngə́, “Soŋ awɨgɨ nɨ adiʼ za o lɔgɨnɨ mɨtən ɨwu ngɨ̌ ɨnu tsiŋ ɨtsum ə. Mɨtən a mbó gho a gha ɨwa le?”

3Yeso a chwɨ́gɨ́ a mbó bo ngə́, “Tɛmnə á ma bitɨ awən nɨ anu zə tse ghe. Nɨ soŋ aghə, 4mɨtən mɨ Yoane Ngaŋ Nga Nkyi, mɨ ló lá a mbó Ŋwi kə a mbó ɨbɛn le?”

5Bo chwúʼ ntíʼə nkwə́nkə́ bo nɨbo ngə́, “Bɨgɨnə mɨ soŋ lá ngə́ ke le? Be bɨgɨnə soŋ ngə́, ‹Mɨ ló a mbó Ŋwi ə,› a mɨ soŋ ngə́, ‹A tiʼ ngɨ ake nɨ keʼ nɨŋ mɨntəm ɨmən a nye Yoane le?› 6Lá be bɨgɨnə soŋ ngə́, ‹Mɨ ló a mbó ɨbɛn,› muŋ ɨnɔ ɨbɛn wɛnə mɨ tumtɨ awɨgɨnə nɨ mɨngɔʼ ɨ zhwitɨ, mbɨ́ʼ ngə́ bo zhi tsɛʼ a nkənu ngə́ Yoane a bé ntom Ŋwi ə.” 7Ma lan, bo chwɨ́gɨ́ ngə́, “Bɨgɨ se adiʼ za mɨ lónɨ́ ɨwu zhyɛ.”

8Yeso a tíʼ nchwɨ́gɨ́ a mbó bo ngə́, “Ma mɨ kaʼ kɨ soŋ adiʼ za mɨtən ɨmə lonɨ ɨwu ə.”

Nɨgham nə Nanɨ mbɨ́ʼ a Ŋwɔn wa a Tɛ́gɨ́nɨ́ Ɨshwom Mɨntam mɨ Atɨ ɨyi a mbó Ngaŋ Nyɛtɨ Mɨluʼ ə

(Mat 21:33-46; Mar 12:1-12)

9Yeso a tíʼ ná nɨgham nen a mbó bo ngə́, “Ŋwɔn tse a tsí ɨwu mbi ɨshwom mɨntam mɨ atɨ ɨyi, nga a wɛrə a mbó ɨbɛn ba bɨ mɨ faʼ, ɨ ka mɨntam ma ɨ gha ɨmyi ɨ kɨ lɔgɨ ɨma, ntiʼ ngɛn a nɨghan ntsi ɨwu a nye nkfu zɨ sa ghe.#20:9 Asaya 5:1 10Nkfu ɨ kuʼnə a nká mɨntam mɨ atɨ ma, a tsagɨ a ŋwɔn afaʼ ngə́ á ghɛn nkwarɨ ɨmyi mɨntam mɨ atɨ ə. Lá ngaŋ afaʼ tsa shwóm ayi nkəntɨ, a kwɛn mbômbô ə. 11A kwíʼ ntsagɨ a ŋwɔn afaʼ wə daŋ; lá ngaŋ afaʼ tsa kwíʼ nkɨ́ shwóm ayi, ɨ shwɨgɨ ayi, ntsagɨ a kwɛn mbômbô ə. 12Mboŋ ɨshwom wa kwíʼ ntsagɨ a ŋwɔn wa a kúʼnɨ́ bi bɨtárə́; ngaŋ afaʼ tsa lɛmtɨ ayi, nkəntɨ ayi ɛ. 13Mboŋ ɨshwom wa a bítɨ́ atuəmbəm azhi ngə́, ‹Ma mɨ ghɨ lá ɨ nə́ le? Ma mɨ tsagɨ a mɔn ɨghan wa ma kɔŋnɨ tsɛʼ nkə; tsɛʼ a nkənu, bo mɨ diʼ mbɔm zɨ shiʼnɨ wəmbo ə!› 14Lá ngaŋ afaʼ tsa zɛnə a mɔn wa, mbemnɨ a tɨtərɨ bo ngə́, ‹A nɨ mɔn mboŋ ɨshwom wa a wiŋ ə. Bɨgɨnə zhwitɨ ayi, taŋ á ɨdzúm ɨchi tiʼ mbe ɨtsɨgɨnə ghe!› 15Bo tíʼ ndɔgɨ ayi, ntsa nɨ zɨ abyɛn, njwitə. Yeso a tíʼ mbítɨ́ ngə́,

Mboŋ ɨshwom wa a mɨ tiʼ lanɨ ghɨ lá ɨ nə́ nɨ ngaŋ afaʼ tsa le?” 16“A mɨ yen zhwitɨ ɨbɛn ba ɨ tiʼ gha ɨshwom wa a mbó ngaŋ afaʼ tsə daŋ ə.”

Ɨbɛn ba zuʼnə a məzen lá ɨ soŋ ngə́, “A Ŋwi a keʼ nyɛʼtɨ adzaŋ anu zen á fuə!” 17Yeso a lə́ŋtɨ́ awa mbitɨ ngə́, “Nɨgham nɨ Ŋwi nen lanɨ ntiʼ ndiʼ lá ngə́ ke le?#20:17 Salms 118:22

‹Ngɔʼ za ngaŋ mbɔm ndá nyɛ́ʼnɨ́ ntɔŋ nɨ azúm adaŋədaŋə lá

ɨ yén ntíʼ mbé ngɔʼ nɨbú nɨ ndá ə.›

18Ŋwɔn tsum wa a vwonɨ atú ngɔʼ za, ɨ mɨ botɨ ayi ɨlám ɨlám; ngɔʼ za bə́ ntíʼ ngvo atú ŋwɔn tse, ɨ ghɔʼ ayi a tiʼ mbəŋ abvu ə.”

Abítɨ mbɨ́ʼ Ntfú Ashɛbɨ ə

(Mat 22:15-22; Mar 12:13-17)

19Bɨdiʼ bɨ Nyɔngɔŋ abɔʼnɨ bɨntumshe bə wi lɔ́btɨ́ nko Yeso tsɛʼ adiʼ məwa, mbɨ́ʼ ngə́ bo zhí ngə́ a ná nɨgham nen ɨ sɨʼə lá awa; lá bo bɔ́gɨ́ ɨmɨgɨ mɨ ɨbɛn ə. 20Bo tíʼə ndǒ a nyom wu shiʼnɨ ə. Bo ghá nkáb abó a ndzum a mbó ɨbɛn bə tse ngə́ á bo ghɨ ɨtsi ngə́ bo nɨ ɨbɛn bə shiʼnɨ, ntiʼ ntsagɨ awa ngə́ á bo bentɨ a Yeso nɨ ɨbítɨ mɨgham, taŋ ɨ tiʼ tsa ɨwu ɨ ko ayi ɨ gha a mbó Gobɨna á tiʼ ntsi a shwúrɨ́ mɨtən mɨ bə Roma ghe. 21Bɨchwerɨ məbiŋ sóŋ a mbó Yeso ngə́, “Ndiʼ aŋwaʼnɨ, bɨgɨ zhi ngə́ anu za o sóŋnə́ nkə́ ndíʼə a kuʼnə. Bɨgɨ zhi ngə́ o tɨ tɛgɨnɨ ɨbɛn lá, o koʼ ndyǐ ɨshi ŋwɔn tse, lá ndǐʼ nkənu mbɨ́ʼ anu za Ŋwi a lɔnə a mbó ɨbɛn ɨbyi ɛ. 22Soŋ awɨgɨ ə, Nyɔngɔŋ ɨwɨgɨnə a diʼ ngə́ á bɨgɨ tfu ashɛbɨ a mbó Kaisa kə ngáŋ le?”

23Lá Yeso a zé ndab ɨza, ɨ soŋ a mbó bo ngə́, 24“Diʼnə nkáb atɨŋə zɨ tsə́ŋtsə́ŋ á ma ze. A tsi ɨshi ɨwa ɨwu bo ɨkum le?”

Bo chwɨ́gɨ́ ngə́, “Wu Kaisa ghe.”

25Yeso a tíʼ nchwɨ́gɨ́ ngə́, “Gha azúm za a nɨ zə Kaisa a mbó Kaisa, nga a za a nɨ zə Ŋwi a mbó Ŋwi ə.”

26Ɨwu, a ɨshi ɨbɛn ba, bɨ kɨ chi keʼ a wɛrə ko mbɨ́ʼ anu zə tse, ntiʼ nchwubtɨ mɨntsu ɨma, mbɨ́ʼ ngə́ achwɨgə za a kɨ́ʼnɨ́ awa ghe.

Abítɨ mbɨ́ʼ Nzhwemnə a mbó Nɨvwo ə

(Mat 22:23-33; Mar 12:18-27)

27Bə Sadukai bə tse, bɨtɨbem ngə́ ŋwɔn a kfǒ mbɨ́ŋə́ nzhwémnə́, bɨ yén a mbó Yeso ɨ soŋ ngə́,#20:27 Ɨfaʼ Ntóm Yeso 23:8 28“Ndiʼ aŋwaʼnɨ, Mǒse a ŋwáʼnɨ́ a nyɔngɔŋ wen a mbó bɨgɨnə ngə́: ‹Be ŋwɔn a kfo ɨ nyɛʼtɨ a ngwe ɨyi tɨgha bo zɨ jwi ɨbɔ, mɨma ɨyi wu mbáŋnɨ́ a tsi nɨ ndzɔʼ nkfugɨ wa taŋ á bo zɨ chi jwi ɨbɔ ba bɨ mɨ lɔgɨ ngə́ a nɨ ɨbɔ bɨ mɨma ɨyi wu mbáŋnɨ́ wa a kfonə lá.›#20:28 Ditronomi 25:5 29Ɨbɔmbɨma bə mbáŋnɨ́ bi samba yén ntsí ɨwu; wu ntsambyi a zɔ́ʼ nkfo tə atú ə. 30Wa a zɔ́ŋtɨ́nɨ́ a nye ɨdiʼ tsi bá a zɔ́ʼ a nkfugɨ wa, 31wa a zɔ́ʼŋtɨ́nɨ́ a nye ɨdiʼ tsi tárə́ a kɨ́ ndzɔ́ʼ a nkfugɨ məwa. A fú a nye bo ndəŋndəŋ ɨ kɔʼ kuʼ a nye wa a zɔ́ŋtɨ́nɨ́ a nye ɨdiʼ tsi samba ghe — bɨtsum kfó tə atú ə. 32Mangye wa a kɨ́ ndwɨgɨnɨ nkfoə. 33Mangye wa ghɨ bé wu ɨwa a njwi za ɨbɛn zhwemnɨnɨ a mbó nɨvwo le? Bo wa bi samba zɔ́ʼ a táʼ mangye wa.”

34Yeso a chwɨ́gɨ́ a mbó bo ngə́, “Mbáŋnɨ́ bo bɨ bəngye zɔ́ʼnə́ tɨtsɔŋnɨ ə, 35lá mbáŋnɨ́ bo bɨ bəngye ba bɨ kuʼnɨnɨ a nzhwémnə́ a mbó nɨvwo ɨ bə kɨ tsi a nye nkfu za ghɨ yen lá, nɨzɔ́ʼ ghɨ keʼ ɨwu chyɛ. 36Bo mɨ tsi tsɛʼ tso bɨtsen bɨ ndá bɨ Ŋwi ɨ chi keʼ bə nkfoə. Bo nɨ ɨbɔ bɨ Ŋwi mbɨ́ʼ ngə́ bo zhwemnɨ a mbó nɨvwo ə.

37Mǒse a diʼ asaŋəsaŋ ngə́ bɨkfú zhwémnə́ nkúŋə́ a mu ntsi ntən nɨnkoŋ ə. A mu adiʼ aŋwaʼnɨ a Ŋwi za mɨjwutɨ atɨ wa a kɨ́nə́ nkɨ́ə lá Mǒse a sóŋ ngə́, ‹Maʼmbyí a nɨ Ŋwi wu Abraʼm, Ŋwi wu Isak bo Ŋwi wu Yakɔb ə.›#20:37 Ɛksɔdɔsɨ 3:6 38Wɛrə nɨ Ŋwi bə ntsi ntɨŋ ə, nkeʼ wu ɨkfú ɨbɛn be, mbɨ́ʼ ngə́ a mbó wɛrə ŋwɔn tsum a tsi ntɨŋ ə.”

39Bɨdiʼ bɨ Nyɔngɔŋ ba bə tse chwɨ́gɨ́ ngə́, “Achwɨgə zə shiʼnɨ ə, a Ndiʼ aŋwaʼnɨ!” 40Mbɨ́ʼ ngə́ bo kɨ chi keʼ bə njwəŋtɨ a mbítɨ́ zɨ nɨ anu zə daŋ ə.

Abítɨ Mbɨ́ʼ a Ŋwɔn wa Wa bɨ Zɔ́ʼnɨ́ a nɨ Wɛrə ghe

(Mat 22:41-46; Mar 12:35-37)

41Yeso a bítɨ́ awa ngə́, “Bɨ tsa lá ɨ nə́ a sóŋə́ ngə́ Wa bɨ Zɔ́ʼnɨ́ lá a ghɨ bé mɔn ɨlə̌ Devidɨ le? 42Mbɨ́ʼ ngə́ Devidɨ zɨmboŋ a sóŋ a mu aŋwaʼnɨ a bɨsalms ngə́,

‹Maʼmbyí a sóŋ a mbó Maʼmbyí ɨghan ngə́: tsi adiʼ wen abó me zə maʼə

43nkuʼnɨ nkfu za ma mɨ nyɔŋ ngaŋ kɨban ɨtso a nye atɛkɨ a mɨku azo ə.›

44Devidɨ a tɔ́ŋ a wɛrə ngə́ ‹Maʼmbyí›; bɨ tiʼ tsa lá ɨ nə́ ntɔ́ŋə́ a Wa bɨ Zɔ́ʼnɨ́ nɨ ŋwɔn ɨlə̌ Devidɨ le?”

Yeso a Kwantɨ Bɨyɛʼ ɨbyi mbɨ́ʼ Bɨdiʼ bɨ Nyɔngɔŋ ə

(Mat 23:1-36; Mar 12:38-40)

45Mbáʼ ŋwɔn tsum a kɨ́nə́ njwíʼtə́ wəmbo lá, Yeso a sóŋ a mbó bɨyɛʼ ɨbyi ngə́, 46“A nɨ lə atú nɨ bɨdiʼ bɨ Nyɔngɔŋ, ba bɨ kɔŋnɨ ɨ shwugɨ bɨtɔgɨ ɨ núm karɨ, nkɨ nkɔŋ be tɨ́sə́n ngə́ á bɨ ntsáʼtə́ awa ngvótə́ a ɨshi bo a samnɨ mɨtan lá. Bo kɨ nkɔŋ a nchyɛ́ atú ɨlaŋ ɨbɛn bə wi a mu ndáŋwi bə Yuda abɔʼnɨ ɨlaŋ ɨbɛn bə wi a nye ɨdiʼ nɨdorɨ ə. 47Bo kə́ nyɔ̌ʼ mɨntɔŋ mɨ bɨkfugɨ nkwarɨ njwuʼ ɨtsa, ngɨ̌ ɨtsi nɨ ɨtsaʼtɨ Ŋwi tsɨ sa ghe! Ɨnɨŋ ngɨ́ʼ ɨza ghɨ tən be tɨsɨŋə!”

Currently Selected:

Alukasɨ 20: MNT

ማድመቅ

Copy