Yoane 15
15
Yeso a nɨ Ngótɨ́ Atɨ a Mɨluʼ ə
1Ma nɨ ngótɨ́ atɨ a mɨntam ma bɨ nyɛtɨnɨ mɨluʼ ɨwu, Ta ɨghan a be ŋwɔn wa a lánɨ́ atú nɨ ɨtɨ mɨntam mɨ mɨluʼ ə. 2Wɛrə a bɛ́ʼtɨ́ abó atɨ atsum za ka a nkónə́ ayi mɨntam nkə́ nyɛ́tɨ́ abó atsum za a kónɨ́nɨ́ mɨntam, taŋ á atɨ za a fɛm nkɨ nkonɨ mɨntam mə ghaʼnə. 3Ɨnu tsa ma diʼnə awən nɨ tsɛrə lá, tsɨ byinə sugɨ awən, nɨ fɛmə. 4Nɨ ghɔŋ a mbúm bɨgɨnə a ɨnye me, á ma kɨ ntsi a mbúm a ɨnye bɨŋ ə. Abó atɨ a chi keʼ konɨ mɨntam zɨzɨ; a chi konɨ tsɛʼ mbáʼ be a bvurɨ nchwuʼnɨ a nye atɨ ə. Ndəŋndəŋ, nɨ chi keʼ mɨntam konɨ tɨgha nɨ chwuʼnɨ ɨtumbəm ɨtsən a nye me ghe.
5“Ma nɨ atɨ a mɨntam ma bɨ nyɛtɨnɨ mɨluʼ ɨwu, nɨ be mbó ɨmyi ɛ. Ɨbɛn ba bɨ ghɔŋnɨ a mu ɨnye me, ma kɨ nghɔŋ a mu ɨnye bo, ghɨ kónɨ́ mɨntam á mɨ gháʼ ngɛn nɨ mbyi; mbɨ́ʼ ngə́ o chi koʼ anu zə tsɛrə ghɨ tɨ me ghe. 6Ŋwɔn tsum wa a se ghɔŋ a mu ɨnye me, bɨ mɨ nyɛʼ ayi tso abó atɨ á zomnkə; bɨ ghótɨ́ mbó mɨ atɨ məma ngěn nkúmə́ a ɨmugɨ, mɨ kɨənə ghe. 7Be nɨ ghɔŋ a mu ɨnye me, mɨgham ɨmə kɨ nghɔŋ a mu ɨnye bən, muŋ nɨ mɨ bitɨ azúm atsum za nɨ kɔŋnɨ ɨ kɨ tsi nɨ zɛrə ghe. 8A nɨ a ntsǎ a ndzum mɨntam mə ghaʼnɨ ma nɨ kónɨ́nə́ mbáʼ mɨ diʼnɨ nɨfáŋ nɨ Ta ɨghan; a nye ndóm məwen nɨ tiʼ mbe bɨyɛʼ ɨbə. 9Ma kɔŋ awən tsɛʼ adzaŋ za Tarɨ a kɔŋnɨ aghə; á nɨ ghɔŋ a mu akɔŋnɨ azan a nye bɨŋ ə. 10Be nɨ ndzúʼnɨ́ ntɨgə ɨtsan muŋ nɨ mɨ ghɔŋ a mu akɔŋnɨ azan, tsɛʼ tso mbáʼ ma zúʼnɨ́nɨ́ ntɨgə Ta ɨghan nkɨ nghɔŋ a mu akɔŋnɨ azhi lá.
11Ma soŋ ɨnu tsen lá taŋ á nɨdorɨ ɨnə tsi a mu ɨnye ɨtsən, á nɨ kɨ ntsi nɨ nɛrə a nɨ́lónɨ́ ə. 12Ntɨgə ɨzan ɨ be ngə́: kɔŋnɨnə awən bən nɨ bɨŋ ə, tsɛʼ adzaŋ za ma kɔŋnɨ awən lá. 13Akɔŋnɨ za a tsanɨ mbó mbáʼ be ŋwɔn a tsi nɨ zɛrə a nye bɨson ɨbyi a nɨ ngə́ á kfo mbɨ́ʼ atú aza ghe. 14Nɨ nɨ bɨson ɨban mbáʼ be nɨ len ntɨgə ɨtsə. 15Ka ma mbvúrə́ ntɔ́ŋə aghə awən lá nɨ ɨbɔ bɨ afaʼ ɨbə, mbɨ́ʼ ngə́ ka mɔn afaʼ a zhi ayi akyaŋtɨ a tafaʼ ɨyi ɛ. Ma baŋnə ntɔŋə awən nɨ bɨson ɨban, mbɨ́ʼ ngə́ ma soŋnə anu atsum za ma zuʼnɨ a mbó Ta ɨghan a mbó bɨŋ ə. 16Nɨ sé aghan zarɨ; ma zárɨ́ awən nkɨ ntsɔ́ʼ awən ngə́ á nɨ ghɛn nkónɨ́ mɨntam mə ghaʼnɨ, ɨbə́ŋ mɨntam ma mɨ ghɔ́ŋnə́ nɨnkoŋ ə. Ma lan, Tarɨ a mɨ gha azúm atsum za nɨ bitɨnɨ wəmbo nɨ ɨkum ɨghə. 17Ntɨgə za ma ghanɨ a mbó bən ɨ nɨ ngə́: kɔŋnɨnə awən bən nɨ bɨŋ ə.”
Adzaŋ za Atuəshe a Banɨ Bɨyɛʼ bɨ Yeso ghe
18“Be ɨbɛn bɨ atuəshe ban awən, á nɨ zhi ngə́ bo fom ban lá aghə. 19Be nɨ tsi a mbó ɨbɛn bɨ atuəshe, muŋ ɨbɛn bɨ atuəshe mɨ kɔŋ awən tso ɨba ɨbɛn ə. Lá ma zárɨ́ awən a tɨtərɨ ɨbɛn bɨ atuəshe, nɨ keʼ a mbó ɨbɛn bɨ atuəshe tsi; nə nɨ anu za a ghɨnɨ ɨbɛn bɨ atuəshe ban awən lá. 20Waʼtɨnə anu za ma sóŋnɨ́ a mbó bɨŋ ə: ‹Ka ɨbuʼ be awa ɨbɛn bə wi ntsatɨ a tabuʼ ɨwa ghe.› Be a be ngə́ ɨbɛn dɨ́gɨ́ aghan, bɨ ghɨ kɨ dɨgɨ awɨŋ ə; be a be ngə́ bo zúʼnɨ́ ɨnu tsa ma díʼnɨ́, bo ghɨ kɨ zuʼnɨ ɨtsɨŋ ə. 21Bo mɨ dɨgɨ awən lá mbɨ́ʼ ngə́ nɨ zɔŋə aghə; mbɨ́ʼ ngə́ bo se zhi a ŋwɔn wa a tságɨ́nɨ́ aghə. 22Ma bá bé tú yen gham a mbó bo muŋ ka bo vwo awa ɨsáʼ ngə́ bo ghɨ ɨbvu ə; adzaŋ za a tsinɨ, tɨtsɔŋnɨ bo chi keʼ soŋ ngə́, ‹Bɨgɨ sé zhi ngə́ ɨnu tsa bɨgɨ ghɨ́nɨ́ lá tsɨ bé mɨbvu ə.› 23Ŋwɔn tsum wa a banɨ aghan, a kɨ mban a Ta ɨghə. 24Ma bá bé tú ghɨ ɨnu a tɨtərɨ bo tsa ŋwɔn tse a láʼnə mbvurɨ tɨ ghɨ muŋ ka bo vwo awa ɨsáʼ ngə́ bo ghɨ ɨbvu ə; adzaŋ za a tsinɨ, bo zɛnə a za ma ghɨ́nɨ́, ntiʼ mban awɨgɨ Ta ɨghə. 25Lá, zen a zágɨ́ ntsi nɨ ɨ fuə taŋ ɨ chi kɔʼ bomnkɨ bo anu za bɨ ŋwaʼnɨnɨ a mu Nyɔngɔŋ ngə́: ‹Bo bán aghan tsɛʼ atú adaŋədaŋə ghe.›
26Nkwatɨ, zɨ wa a nɨ Azhwi zə nkənu lá, a ghɨ yiŋə, wa a kyɛʼnɨ nkənu mbɨ́ʼ a Ŋwi, wa a kɨnɨ ndo lá a mbó Tarɨ lá. Ma mɨ kwarɨ ayi a mbó Tarɨ ɨ tsagɨ a mbó bən, á tiʼ ngam mbɨ́ʼ aghə. 27Nɨ mɨ tiʼ kɨ gham mbɨ́ʼ aghan mbɨ́ʼ ngə́ nɨ tsí bɨgɨnə ndɔgɨnɨ a mbiʼnə ghe.”
© 2023, CABTAL
