Vakatekivu 16
16
Ko Eka kei Isimeli
1Ia ko Serai na wati Eparama sa sega ni vakaluveni vua. A sa dua na nona vada (yalewa-bobula), a yacana ko Eka na yalewa ni Ijipita. 2A sa kaya vei Eparama ko Serai, “Raica, sa tarovi au ko Jiova me'u kakua ni vakaluveni; mo la'ki veiyacovi mada kei na noqu yalewa-bobula; de'u na vakaivakawa vua.” A sa vakarorogo vei Serai ko Eparama. 3Sa yabaki tini ko Eparama e na vanua ko Kenani, sa qai kauti Eka na nona vada ni Ijipita ko Serai na wati Eparama, a sa solia vei Eparama me watina. 4A rau sa veiyacovi kei Eka ko koya, a sa kunekune ko koya; ia ni sa kila sa kunekune ko koya, sa qai beca na nona marama ko koya. 5A sa kaya vei Eparama ko Serai, “Sa bale vei iko na noqu vakacacani! Au a solia na noqu vada ki na lomaseremu; ia ni sa kila ko koya sa kunekune, sa qai beci au ko koya. Me lewa mada e na kedaru maliwa ko Jiova!” 6Ia sa kaya vei Serai ko Eparama, “Raica, sa tu ga vei iko na nomu vada; mo kitaka ga vua na ka ko vinakata.” A sa qai vakararawataki koya ko Serai, ka sa dro tani yani mai vua.
7A sa kunei koya na agilosi i Jiova mai na dua na mata-ni-wai mai na vanua lala, io mai na mata-ni-wai e na sala ki Suri. 8A sa kaya ko koya, “I Eka, na vada i Serai, ko sa lako mai vei? Ko sa lako talega kivei?” A sa kaya, “Au sa drotaki Serai na noqu marama.” 9A sa kaya vua na agilosi i Jiova, “Mo lesu tale mada vua na nomu marama, ka vakayalomalumalumutaki iko vua.” 10Sa kaya talega vua ko koya na agilosi i Jiova, “Au na vakalevutaka vakalevu na nomu kawa, ka na sega ni wili rawa e na vuku ni kena levu.” 11Sa kaya talega vua ko koya na agilosi i Jiova,
“Raica, ko sa bukete, ko na vakasucuma talega e dua na gonetagane,
ia ko na vakayacani koya mada ko Isimeli,#16.11 A kenai balebale Sa rogoca na Kalou
ni sa kila na nomu rarawa ko Jiova.
12Ia ena tamata kila ko koya,
a ligana ena via vakacacana na tamata kecega,
kei na liga ni tamata kecega ena via vakacacani koya;
ia ena tiko ko koya e na matadra na wekana kecega.”
13A sa vakatoka ko koya na yaca i Jiova ka vosa vua, “Koi kemuni na Kalou ka raici au tiko”,#16.13 Yaca ni Kalou vakaIperiu El-roi se na Kalou sa dau raica na ka ni sa kaya, “E ke talega ka'u sa sega li ni raici koya ka dauvakaraici au?” 14O koya sa vakayacana kina na mata-ni-wai ko ya ko Pieri-leai-roi [Na mata-ni-wai nei Koya sa bula, ko Koya sa raici au]; raica, sa tiko e na kedrau maliwa ko Ketesa kei Pereti.
15 #
Kala 4.22
A sa vakasucuma vei Eparama ko Eka e dua na luvedrau tagane; ia ko Eparama sa vakayacana na luvena oqo ko Isimeli. 16A sa walusagavulu ka ono na yabaki i Eparama, ni sa sucu na luvena ko Isimeli vei Eka.
Currently Selected:
Vakatekivu 16: FRV21
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
