मत्ती 24

येशुउ द्वारा मंदिरों विनाशोओ भविष्यवाणी

(मरकुस 13.1-31; लूका 21.5-33)

1जाहा येशु मंदिर मेहेरोत निहित जातु ओतु ते तियाआ चेले तियाहा मंदिरो रोचना देखा डूहु कोअता तियाआ जागे आवया. 2तिये तियाहा कोयु, तुमु ओ आखे पालीत होय ने आय तुमामे खोरो कोत्लू, ईहि दोणोपो डोणो सुधा उरिलो नाहा तो गाधल्या जानारू नाहा.

येशुउ ईजी वापस आवलो चिन्हों

3जांहा तो जैतुनाआ डोगोपो बोहयु ओतु, तेहलाम शिष्य एखालाम तियाआ जागे आविलो गोग्या, आमाहा कोअलो का याआ गोठी कांहा उवे? ताआ आवीला अने जगोआ अंताचे कोठले चिन्ह होय? 4येशु तियाहा उत्तर आप्लु, सावध रो कोडु तुमामे न ठोगीत गोयो, 5काहाके जाअखो एहलो होय जो माआ नावामेहे आवीत कोअही, आय ख्रिस्त होय अने भरपुराना ठोग्यो. 6तुमु युद्ध अने युद्धाची चर्चा होमले, ताहा घाबरील्यो जाहू नाहा काहाके याहा उवे होयुच, परंतु तियाअ वेले आखिर उवे नाहा. 7काहाके जाती उपो जाती अने राज्य उपो राज्य उठी, अने जागू जाग्तली दुष्काळ पोडी, अने भूकंप उवे. 8ए आखे गोठी पिठीनचा आरंभ उवे. 9ताहा तुमामे त्रस आपलो कोअता तुमामे तोईत आपे, अने तुमामे माईत टाकही, अने माआ नावोओ काहाके लेतजा आखे जाती तियाआ मांहे तुमाआ द्वेष कोआ. 10ताहा जाअखो जोओ ठोकर खाय, अने एक दिहीराहा तोईत आपे, अने एक दिहराहा द्वेष कोआ. 11जाअखो खोटो भविष्यवक्ता उठित उभे रोय अने ठोगीते. 12अधर्म वाढल्या मुळे जाअखो जणोपो प्रीती हेलाड्यो. 13परंतु जो आखिर पर्यंत धीर तोईत मेकीही तिया उद्धार उवे. 14अने राज्याआ ओ सुसमाचार आखा जगात प्रचार कोअयु जाय का आखे जातिई कोईता साक्ष उवे तेहलाम आखिर आवे.

महासंकोटोओ सुरवात

15याकोअता जांहा तुमु तियाअ अशुद्ध घृणित वस्तूअ तियाआ चर्चा दानीएल भविष्यवक्ताच्या उवी ओती, पवित्र स्थानात उबु रोतगोल्यु पाला (जो वाचन कोअही तो होमजीत्ले), 16तेहलाम जो यहुदियाम होय ते डोगोपो नाहीत जा. 17जे कोअलापो होय तो आपाआ कोअमे रोत एकहरको लेला उतरीणारु नाहा. 18अने जो खेतुम होय तो, आपाआ कापडे लेई मागित नाहा जानारू. 19तिया दिहोम जी गर्भवती अने दुध पिवडणारी होय, तियाआ कोअता धिक्कार. 20प्रार्थना कोईत रो काहाके तुमामे हियालामे पोन शब्बाथाआ तेदीही दौवंदेहे लागे नाहा. 21काहाके तिया समयी एहेलू पाअया त्रस उवे, जेहलो जुगाआ आरंभा पासून ओवयू नाहा. 22अने तेदीही कोम कोल्यु कायना ओतो ताहा कोडु प्राणी नि वास्तु पोन निवाडल्या च्या कारनोवाही ओ दीही कोम कोल्यु जाय. 23तिया वेले कोडु तुमामे कोअही, पाला मसीहा इंही होय पेल्योओ तीही होय ताहा विश्वास कोहू नाहा. 24काहाके मसीहा अने खोटो भविष्यवक्ता उठित उभे रोय, वोडो चिंन्ह अने अदभुत कृत्य देखाडीते उवेताहा निवाडीत मेकल्या पण भटकाडे. 25पाला, आय पाल्या पोरोत ओ आखे किबी कोईत आप्लु होय. 26याआ याकोअता ते तुमामे कोय पाला तो जंगलूम होय ताहा बारथे निहित जायलो नाहा; पाला तो मायत्या खोलीम होय; ताहा देखू विश्वास कोअला नाहा. 27काहाके विग पूर्वे पोरोत पश्चीमे जागे जीही सोमकीत ओते, तेह्लुज माअहा पोऱ्याआ पण आविला उवे. 28जीही प्रेत होय गिधाडे जमा होय.

मांहो सुआआ इजी आवलोओ

29तियाअ दिहोम क्लेशा फासाडी दिह अंधाराहोस उवे, चंद्र प्रकाश आपी नाहा अने तारे जुगोमोरत पोडे, अने जुगोमेरयो शक्ती डगमगली जाय 30तेहलाम मांहाहा पोऱ्याआ चिन्ह जुगोम देखाईलो, अने तेहलाम धोरती उपो आखे जातीही मांहे छाती ठीकीते; अने माअहा पोऱ्याहा वोडा सामर्थ्याआ अने वैभवाणे जुगोमेरयो ढगावरून आवातल्या पालिलो 31ते तुरही महानादाबाआरी आपाआ स्वर्गदूतो मुकलिही, अने आकाशामें आव तीवोगरोत तियाअ टोका पर्यंत चारू दिश्या पोरोत तियाआ निवाडीत मेकल्या एकठे कोआ.

अंजीरो साड़ोसी सिक्षा

32अंजिराआ साडोपोरोत ओ उदाहरण हिकिलो जांहा तियाआ डाली कोमल होतगोयो जाहो अने पाने गळू लागत्ले, तेहलाम तुमु होमजीत लत्ले का उनालू जागे आवयू होय 33आव प्रमाणोओ जांहा तुमु आखे गोष्टी देखे ताहा होमजीत ल्या का तो जागे म्हणजे बाअणारी होय. 34आय तुमामे खोरो कोत्लू का जो पर्यंत आव आखे गोठी पुरो उवनारा नाहा, तो पर्यंत आव पिढीही आखिर उवे नाहा. 35जुग अने धोरती टोलीते जाय पण माआ वचने केधीज टोलणार नाहा.

जागते रोवा

(मरकुस 13.32-37; लूका 17.26-30,34-37)

36तिया तेदीही अने तियाअ घटकाआ विषयामे कोडोबी मालुम नाहा, न होर्गा दूतो न पोऱ्याहा फक्त बाह्हाहा. 37जेहलो नोहाचे दीही ओते, तेहलूज माअहा पोऱ्याआ आविला उवे. 38काहाके जेहलो पाई प्रल्याआ पूर्वीच्या दिहोम, ज्या दिहे पर्यंत नूह जहाज पोओ नाहा सोड्यू तांहू जाआ मांहे खायलो पीत ओते, अने तीयाम वेहवाल उवनारा ओते. 39अने जो पर्यंत पाई प्रलय आवीत तियाअ आखाहा वोहीत लेत नाहा गोल्यो तो पर्यंत तियाहा किबी मालुम पोडये नाहा; तेहलूज माअहा पोऱ्याआ आविला उवे 40तियाअ टायमोमें बेन जोओ खेतुम होय, एक लेदो जाइअलो. 41बेन बोई कोअटीपोओ होय, एक लेदिओलो जाय अने दिहरी सोडीत आप्या जाय. 42याकोअता जागतू रो, काहाके तुमामे मालुम नाहा, का तुमाआ प्रभू कोडला तेदीही आवे. 43परंतु ओ जाईत ल्या का केधी को मालक्येहो मालुम ओते का बांड कोडला पहर आवेताहा को मालक जागू रोला ओतलू, अने आपाआ को फोडू आप्लु कायना ओतो. 44याकोअता तुमुभी तीयारिमे रो, काहाके ज्या वेले विषयामे तुमु विचार पण कोअयु ने ओय, एहलो वेळेला माअहा पोऱ्या आवीत जाय.

विश्वासयोग्य सेवक अने दुष्ट सेवक

(लूका 12.41-48)

45तियाअ वेले विश्वासयोग्य अने बुद्धिमान दास कोडू होय, ज्याहा स्वामींनी आपाआ पावर चाकारापो नेमिलो का टायमोपो तियाहा रोटू आपे? 46धन्य होय ते दास, ज्याहा आपाआ स्वामींनी ऐहलेच अतांवाही पालीलो. 47आय तुमामे खोरो कोत्लू तो आपाआ धन उपो अधिकार आपे. 48परंतु तो खराब दास विचार कोअला लागे का माआ स्वामीला आविलो वेल होय, 49अने आपाआ होबतीई दासाहा मरेलो लागे अने झिंगलेल्या आरी खाहू पियलो लागे. 50ताहा तियाअ पावरोओ स्वामी एहलो वेले आवे तियाहा मालुम नाहा, 51तेहलाम तो तियाहा हाजा शिक्षाम आपे अने तियाहा कपटीया आरी मोजीलो कोअही तीही रोडीलो अने दात खायलो होय.

Currently Selected:

मत्ती 24: NOINT

ማድመቅ

Copy