लूका 4

येशुउ परीक्षा

(मत्ती 4.1-11; मरकुस 1.12-13)

1येशु पवित्र आत्मावांहि पुरो ओतगोयु यार्देन खाडीरोत फासि आवयु तियाहा आत्माआ जंगलूम घेऊन गोल्यो. 2जागापो शैतान तियाहा सालीह दीही पर्यंत परीक्षा लेदि तियाअ दिहोम येशु किबी खादे नाहा फासाडी दिह पुरो उवलानंतर येशुहू जाखो भूक लागीई. 3तेहलाम शैतान तियाहा कोयु, “जर तू परमेश्वरोओ पोऱ्या होय ताहा आव दोणाहा भाकर बोनीलाकाजे कोअलो” 4तेहलाम येशु उत्तर आप्लु, “शास्त्रात लेखिलो होय, मांहु फक्त रोटावांईच जीवे एहलो नाहा” 5फासाडी शैतान तियाहा जाखो उसापो घेऊन गोल्यो, अने होमला क्षणोम आखे जगतो राज्य देखाडीत, 6शैतान तियाहा कोयु, “आय याआ राज्याआ अधिकार अने वैभव ताहु आपी काहाके ओ माहु आप्लु होय अने आय याहा ज्याहा गोमे तियाहा आपुहू शकतो” 7कोईत तू माहु नमन कोअही ताहा ओ आखे ताआ उवे 8येशु तियाहा उत्तर आपित कोयु, “शास्त्रात लेखिलो होय का, तू फक्त आपाआ प्रभू परमेश्वर याहाज नमन को अने तीयाआज सेवा को.”

9तेहलाम तो तियाहा यरुशलेम मेहे लेत गोल्यो अने तियाअ जागापो मंदिराआ उचो जागापो लेत उभे कोल्यु अने तियाहा कोयु, “जर तू परमेश्वरोओ पुत्र होय, ताहा याआ ती जागेरोत निसे उडी टाक. 10काहाके शास्त्रात लेखिलो होय तो आपाआ स्वर्गदूतोहो आज्ञा आपीत ते ताहु रक्षा कोए, 11अने लेखिलो होय ते ताहु अने आपाआ खोआ मेहे एहलो विसित लेणारे का ताआ गुडाहा डोणु ने वाजे नाहा” 12येशु तियाहा उत्तर आपित कोयु, “शास्त्रात एहलो पण लेखिलो होय का, तू आपाआ प्रभू परमेश्वरोओ परीक्षा मेहे पाडहु कायना.” 13जाहा शैतान तियाआ आखे प्रकाराआ परीक्षा लेदलापो संधी जोडताहुजा तियाहा सोडीत गोल्यो.

गलील मेहे सेवा कार्य

(मत्ती 4.12-17; मरकुस 1.14-15)

14फासी येशु आत्माआ शक्तीवांही पुरो ओतगोयु गालीला मेहे फासी आवयू अने तियाअ आखे भागुम येशुउ चर्चा ओवुहू लागीई. 15येशु तियाआ सभास्थान जात संदेश आपुहू लाग्यू अने तियाआ आखे गौरव कोईत ओते.

नासरत मेहे येशुउ इन्कार

(मत्ती 13.53-58; मरकुस 6.1-6)

16फाशु तो नासरेथ मेहे आवयू, जीही तो हानाआ वोडू ओयु ओतु अने आपाआ नियमाप्रमाणे शब्बाथ तेदीही यहुदी प्रार्थना सभाम गोल्यो. 17जाहा तो शास्त्र डीले बासिलाकाजे उबु रोला तेहलाम तियाहा यशायाह संदेष्टाआ पुस्तक आपलो आवयू तिये जांहा पुस्तक उगड्यो तेहलाम तियाहा ओ स्थान जोडयेहे तीयाम लेखिलो ओते, 18प्रभूआ आत्माआ मामेहे वास कोईत होय तिये माहु अभिषेक कोल्यु होय त्याकोता का आय गोरब्योहो सुवार्ता कोईली तिये माहु तोईत मेकलेल्याआ सुटीत अने आंदलाहा फासी पालता आवे घोषणा कोईली, दाबल्यो जात होय तियाहा सोडवीत मोकलित. 19देवाची कृपाआ घोषणा कोईली. 20फासी तिये पुस्तक बंद कोईत आपाआ पावरोहो फासी आप्यी अने तो निसे बोहयु प्रार्थना सभामे आखाआ नजर तियापो टिपाईत रोली ओती. 21तेहलाम तिये कोहू सुरवात कोअयी आज तुमु होमल्या शास्त्राआ वचन पुरो उवे. 22हर एक मांहे तियाआ वाहवा कोईत ओते तियाआ सोबिमरोत जे हाजी वचन आवीत ओते, त्यापो आखे चक्कित उवे ओते ते कोयु, नाहाकोत ओ योसेफाआ पोऱ्या नाहा होय? 23फासी येशु तियाहा कोयु, खरोज तुमु माहु कहावत, ओ वैदया तू माअकोता हाजो को कफर्णहुमात ज्या गोठी आमाहा तोहबारामे होमल्या होय त इंही ए को. 24ताहा येशु तियाहा कोयु, “आय तुमामे खोरोज कोत्लू का कोडनीबि संदेष्टाहा आपाआ गावामेहे मान सम्मान ने जोडत्लू.” 25आय तुमामे खोरोज कोत्लू, इस्राएलोमे एलियाआ टायमोमें जांहा जुग बंद उवे ओते अने साडेतीन वर्ष पर्यंत आखे देशुम भिवाडनारू दुष्काळ पोडीत ओतु तेहलाम तियाअ जागापो मोजित आविलो नाहा ओतो रोंडाली कोयु. 26परंतु सिदोन भागोमेऱ्या सारफत इही एक विधवाहा सोडीत दिहरी रोंडाली जागे एलीयाहा मोक्ल्यीत निमिले. 27अने एलीशा संदेष्टाआ कालामे इस्राएल माय जाखो कुष्ठ मांहे ओते परंतु त्यामेरोत सिरीया माय रोणाआरा नमानाआ व्यतिरिक्त दिहराहा शुध्द कोल्यु निमिले. 28जाहा यहुदियाआ ओ होमल्यु मंदिर तियाहा जाखो खोत आवयू, 29ते उभे रोल्या अने तियाहा गावो बारथे मोकलित आप्लु ते तियाहा डोगोओ कडेवर घेऊन गोये ज्यापो त्याआं गाव ओते, याकोअता का तियाहा तियाअ काडापोरोत निसे टाकुहु पाल्ये. 30पोन तो तीयामरोत निहित आपाआ वाटी निहित जातलू गोल्यो.

अशुद्ध आत्माहा बारथे काडलोओ

(मरकुस 1.21-28)

31फासी तो गलीलामे कफर्णहुम गावी निसे आवयू अने शब्बाथ तेदीही संदेश आपुहू लाग्यू. 32मांहे तियाआ संदेशापोरोत आश्चर्यचकित उवे काहाके तियाआ संदेश अधिकाराआ कोयु ओतु. 33तियाआ जागापो प्रार्थना सभाम एक माहहू ओतु तीयाम अशुध्द आत्मा वास कोअल्यू ओतु तो आवाजोमें आअड्यू, 34ऐ, येशु नासरी, तू आमापोरोत नाहाकोत अपेक्षा कोअत्लू? नाहाकोत तू आमा कोअता नाश कोइला कोअता आवयू होय? आय ताहु उलखित्लू होय का तू परमेश्वरोओ पवित्र माहुहू होय. 35येशु तियाहा धमकाव्यो कोयु, ठावकू रो, यामेरोत बारथे निहा यापो दुष्टात्मा वाही तियाअ माअहुहू मांहाहा आगाडी तियाहा आसट्यु अने तियाहा किबी नुकसान न ओतु तीयामरोत बारथे निघाल्यू. 36आखे मांहे चकित ओते ते एक दिहीराआरी गोगीत ओते, ओ केहलो वचन होय? अधिकार अने सामर्थ्यावाही दुष्ट आत्माहा तीयाहाभी आज्ञा आपित होये आने तीयामरोत निहित जातेहे. 37तिया भागुम आसेपासे हर एक जागापो त्याविषयी सुवार्ता प्रचार उवी.

पतरसो हाविह्ही अने दिहरा मांहोहो हाजु कोअलोओ

(मत्ती 8.14-17; मरकुस 1.29-34)

38तेहलाम येशु प्रार्थना मिटीगीमेहे रोत उठीत शिमानाआ कोआ गोल्यु शिमानाआ हाविह्ही जाखो ताव आवयू ओतु तीयाहा येशुहू मदत कोअला विनंती कोअयी. 39तेहलामेहे तिये जागे जात कोईत तावोहो धमकावयू अने ताव जातु रोयु अने ती तियाआ सेवा कोहू लागीई. 40जाहा दिह बुडलो टायमोमें त्याआरोत अलग-अलग माद्वाड्यो ओते, ते आखे त्याजागे घेऊन आव्ये तिये आपाआ आथे तियापो मेकीत प्रत्येकाहा हाजो कोल्यु. 41तीयाम व खूब जोआमरोन दुष्टात्मा आअडित बारथे पोडीत ओती, “तू परमेश्वरोओ पोऱ्या होय”, परंतु तिये तियाहा धमकावयू गोगुहू नाहा देदे काहाके ते उलखित्लू ओते, तो ख्रिस्त होय.

गलील मेहे प्रचार

(मरकुस 1.35-39)

42फासाडी दीही उगीतकोईत तो निहित जंगलूम गोल्यो तेहलाम मांहे जमाव तियाआ होद कोईत तियाआ जागे आव्ये अने आपामे रोत जाऊ कायना कोईत तियाहा विनंती कोईत ओते. 43पोन तिये तियाहा कोयु परमेश्वरोओ राज्याआ सुवार्ता दिहरा गावोम पण कोअला होय काहाके माहु त्याकोता मोक्ल्यीत होय. 44अने याआ प्रकारे तो यहुदी प्रार्थना सभाम हमेशा संदेश आपित ओतु.

Currently Selected:

लूका 4: NOINT

ማድመቅ

Copy