मरकुस 15

पिलातुसा रे समाने यीशु

(मत्ती 27.1-2,11-14; लूका 23.1-5; यूहन्ना 18.28-38)

1दोत हुँदै ही तेबरी बडे प्रधान याजकों, प्राचीणे, होर शास्त्री होर सारी महासभा यह फैंसला करी करे यीशु बाहनू, होर तखा का नी करे पिलातुसा वै सम्भालू। 2पिलातुसे तेऊ कअ पुछू, कैह तूह यहूदी रअ राजा सा? यीशु तेऊबे उत्तर दीना, तूह आपे लागदअ बोलदअ। 3प्रधान याजके तेऊ पैंदे बहू दोष लाऊ। 4पिलातुसे सह भी पुछू, तूह किछे नांई बोली, हेर याह ताह पैंदे केथरी गला रा दोष ताह पैंदे लाऊ? 5यीशुये भी किछे नांई बोलू; अखे तके की पिलातुस भी बड़ी हेरानी होई।

माौऊता रे दण्डा री आज्ञा

(मत्ती 27.15-26; लूका 23.13-25; यूहन्ना 18.39-40; 19.16)

6पिलतुस तेसा जांचा वै एकी कैदी छाड़ा थी, जासू त्याह चाहन्दा। 7बरअब्बा ना रअ एक मणश त्याह बलबे संघे जेला मे थी, ज़ुणीये बलवे में हत्या करी दी थी। 8होर भीड़ उझे नाशी करे तेऊका अर्ज करी, जेड़ा तूह माहरी तणी करदअ आऊद तेडा ही कर। 9पिलातुसे त्याह वै उत्तर दीना, कै तमे चाहन्दा की हाऊ यहूदी रे राजा छाडू? 10किबेकि सह जाणा, कि प्रधान याजक सह जल़णा री बजा का ढाकुदअ साहा। 11पर प्रधान याजके लोका भड़काई सह बरअब्बा त्याह री तणी छाड़े। 12यह शुणिकरे पिलातुसे सह भी पुछू, तेबा जासू वै तमे यहूदी रअ राजा बोल्दा, तेऊरा केह करणा? 13त्याहे भी हाला पाऊ, एऊ क्रुसा में चढ़ा!

14पिलातुसे त्याह वै बोलू, किबे एऊ केह बुराई करी दी? पर त्याहे होर भी जोरे हाला पाऊ, एऊ क्रुसा पैंदे चड़ाआ! 15तेबा पिलातुस भीड़ा खुश करने री तणी बरअब्बा त्याह री तणी छाड़ू, होर यीशु वै कोड़े लाई करे छाडू की क्रुसा पैंदे चड़ाए।

यीशु री वेइज्जती

(मत्ती 27.27-31; यूहन्ना 19.2-3)

16सपाही सह किले रे मितर खोले बे नीऊ जासू वै प्रीटोरीयुस बोल्दा, होर सबे फऊजी शदाई। 17तेबा त्याहे बैजनी रगा रे झिकड़े तेऊवै पहनांई होर कांडे रअ मुकट बुणीकरे तेऊरे मुंडे लाई दीनअ, 18होर यह बोलिकरे तेऊवै नमस्कार करदे लागे, हे यहूदी रे राजा, नमस्कार! 19त्याह तेऊरे मुंडे सरकण्डे बाहनी होर तेऊ पैंदे थूकते, होर ठुंगरु वैशी करे तेऊ जेह नमस्ते करदे रही। 20जेबरे त्याह तेऊरा ठठा करी मुके, तेऊरे बैजनी रगा रे झिकड़े खोली होर तेऊरे झिकड़े पहनेई; होर सह क्रुसा पैंदे चढ़ाउणे री तणी बागा वै नीऊ।

यीशु रा क्रुसा पैंदे चढ़ाउणा

(मत्ती 27.32-44; लूका 23.26-43; यूहन्ना 19.17-27)

21सिकन्दर होर रुफुस रे बापू शिमोन, एक कुरेनी मणश, जोह ग्राए का ईंदअ लाग दअ थी, तेसी निकतअ; त्याहे सह थोगे ढ़ाकू होर यीशु रअ क्रुस तेऊवै चकणे वै दीनअ। 22त्याहे यीशु गुलगुता री जागहा, जासका मातलब खोपड़ी री जागाह साहा, तखे वै आणू। 23तखे त्याह तेऊवै गन्‍धरस मिलउदा दाखरस दिंदे लागे, पर तेऊ नांई मांगु। 24तेबा त्याहे सह क्रुसा पैंदे चढ़ाऊ होर तेऊरे झिकड़े री तणी चिठ्ठी पाई, की कासु कैह भैटणा, होर त्याहे सह बांडू। 25होर एक पहर धियाड़ मुकी थी, जेबरे सह क्रुसा पैंदे चढ़ाऊ। 26होर तेऊ पैंदे दोष पत्र लाऊ जासू में लिखू दा थी, यहूदी रा राजा। 27त्याहे तेऊ संघे दूई डाकू, एक तेऊ री धूरा फेहरे होर दूज़अ तेऊरी बांयी फेहरे क्रुसा पैंदे चढ़ाई। 28(तेबा पवित्र शस्त्रा रअ यह वचन पूरअ होऊ की सह पापी संघे गीणु) 29होर बाता हांडण आले मुंडी हिलाई करे यह बोलिकरे निंदा करदे लागे, की, भाला देहुरे चोड़ण आल़ होर ची धयाडी में बणाउण आल़अ! 30क्रुसा पैंदा का निख्ली करे आपणे आपु वै बचा। 31एउ साबे प्रधान याजक होर शास्त्री आपु में तेऊरे ठठे करदे लागे, एऊ होरा बचाई, पर आपणे आपु वै नांई बचाई सकु। 32इस्राएला रअ राजा, मसीह, एवा क्रुसा पैंदे का निखल कि हामें भालि करे बुशाह करु। होर ज़ो तेऊ संघे डाकू क्रुसा पैंदे चडाईदे थी, त्याह भी तेऊरी निंदा करदे लागे थी।

यीशु रा प्राण छाड़णा

(मत्ती 27.45-56; लूका 23.44-49; यूहन्ना 19.28-30)

33दुपहरा हूणे तक सारे देश नयारा होऊ, होर चिउणे पहरे तक रहू। 34जेबा दोपहरा रे चीण बाजी तेबा यीशु ये ज़ोर संघे बोलू, इलोई, इलोई, लमा शबकतनी? जासका मतलब यह सा हे परमेश्वर, हे परमेश्वर, तांइ हांउ किबे छाडू? 35ज़ो नेड़े, खड़ी दे थी त्याहा में कैह कुछ एकी यह शुणी करे बोलू, भाल़ा यह एलिय्याह वै हाका पाऊंदअ लागदअ। 36होर एकिये स्पंज सिरकै में डूबोऊ, होर पुरअ सरकण्ड डाही करे तेऊ कै चूसाउ होर बोलू, रुका, भाल़ा, एलिय्याह एयु खोलदअ ईहंण की नांई। 37तेबा यीशुये ज़ोरे संघे हाका पाई करे प्राण छाडी। 38होर देहुरे रा परदा उपरा कै जील तक थोछी करे दूई फेरे होऊ। 39ज़ो सुबेदार तेऊ समाने खड़े थी, जेबा सह एड़अ हाका पाउंदअ हेरू तेबा तेऊ बोलू, सची यह मणश परमेश्वरा रअ शोहरू थी!

40कई बेटड़ी भी दुरा कैह भाल्दी लागी, त्याहा में कैह मरियम मगदलेनी, होछे याकूब होर योसेसा री आमा मरियम, होर सलोमी थी। 41जेबा सह गलीला में थी, तेबा या एउ संघे हुंदा थी, होर एउरी सेवा टहिल करदा; होर भी खासी बेटड़ी, ज़ो एउ संघे यरूशलेमा वै आई दी थी।

यीशु रा दवाऊणा

(मत्ती 27.57-61; लूका 23.50-56; यूहन्ना 19.38-42)

42होर जेबरे ब्याल्क होई तेऊकी सब्ता री धयाड थी, जोह सब्ता री धयाडी का एक धियाड़ी पहिले हुंदा थी, 43अरिमितिया रअ रहण आल़अ यूसुफ आऊअ, ज़ो महासभा रअ मंत्री भी थी, होर आपु भी परमेश्वरा रे राज्य नीहालदअ रहंदा थी। सह हिमत करी करे पिलातुस नेड नाठअ होर यीशु रअ शव मागु। 44पिलातुसे यह हेरी करे हेरान होऊ की यह ऐथर छेकअ मुअं; होर तेऊ सुबेदार शधाई करे पुछू, एउ मरी करे केतरी देर होई? 45जेबा तेऊये सुबेदारा कह सारी गला शूणी, तेबा लाश यूसुफा वै दीनी। 46तेबा तेऊ मलमला री चादर लई, होर लाश काहड़ी करे तेसा में लपेटी, होर एक कब्र जोह बड़ी जाणी में कोती दी थी, तखे डाऊ, होर कब्ररा रे दुआरा सेटा में एक बड़ी जाण डाई। 47मरियम मगदलेनी होर योसेस री आमा मरियम एता हेरदी लागीदी थी कि यीशु सह कंई डाहुदअ साहा।

Currently Selected:

मरकुस 15: ISJNT

ማድመቅ

Copy