मत्ती 28
28
यीशु रा पुनरुत्थान
(मरकुस 16.1-10; लूका 24.1-12; यूहन्ना 20.1-10)
1सब्ता रे धियाड़े बाद हप्ते रे पहिले धियाड़े दोती ही मरियम मगदलेनी होर दूजी मरियम कब्रा हेरदी आई। 2होर हेरा, एक बड़ी जाजरी होई, किबेकी परमेश्वरा रअ एक स्वर्ग दूत स्वर्गा का उतरु होर सेटा इच्छी करे तेऊ कब्रा का पाथर सकेऊदअ थी, होर तेऊ पैंदे बेठअ। 3तेऊरा रूप बिज़ल़ी साही होर तेऊरे झिकड़े हीऊ साही शेते थी होर चमकदार थी। 4दूता हेरी करे पहरेदार डरी करे कामदे लागे, होर मुएँदे रे बराबर होई। 5स्वर्गदूते बेटड़ी बे बोलू, नांई डरा, हाऊं जाणा कि तमे यीशु बे जोह क्रुसा में चडाऊ तेऊ लोडदी लागी दी साहा। 6सह अखे नांई आंधअ, पर आपणे बचना रे साबे जिऊंदअ होऊ। इच्छा, एसा जागहा हेरा, ज़खे प्रभु डाहू दअ थी 7होर छेकअ नाहीं करे तेऊरे चेले बे बोला कि सह मुएँ दे मेंज़ा का जिऊंदअ होऊ, होर तमा का पहिले गलीला बे नाठअ, तखे तेऊरे दर्शन पाउंणे! हेरा मांई तमाबे बोलू। 8त्या डरी होर बड़े आनन्दे संघे कब्रा का तेभरी बापस फिरी करे तेऊरे दूजे चेले बे समाचार दींणे बे ठुरी। 9तेबा यीशु त्या भेटअ। होर बोलू, सलाम। त्याह सेटा इच्छी करे होर तेऊरी ज़ांघा ढाकी करे नमस्ते करी। 10तेबा यीशु तयाबे बोलू, नांई डरे; मेरे भाई बे नाहीं करे बोला कि गलीला बे नाहा, तखे हाऊं हेरनअं।
पहरेदारा बे रिश्वत
11एखा बेटड़ी बाता में नाहंदी ही लागी दी थी, कि पहरी मेज़ा का ऐखा नगरा में इच्छी करे पूरा हाल प्रधान याजका बे शुणाऊं। 12तेबा बडे महापुरोहित प्राचीना संघे कठे होई करे यह सलाह करी करे सपाही बे बहू चाँदी देई करे बोलू, 13यह बोलणा कि राची जेबा हामे सुते थी, तेबा यीशु रे चेले इच्छी करे होर त्याहे तेऊरी लास चोरी नीई । 14होर अगर यह गल राज्यपाला रे कणेट पुजली, तेबा हामे तेऊ समझाउले होर तमा, मुशिकिला का बचाउले। 15जोह पहरे करन आले थी त्याहे ढबे माँगी करे जेड़ा त्यावे बोलू थी, तेड़ा ही करू। यह गल आज तणी यहूदी में च़ली दी साहा।
यीशु हेरणअं होर लास्ट आज्ञा
(मरकुस 16.14-18; लूका 24.36-49; यूहन्ना 20.19-23; प्रेरित 1.6-8)
16ग्यारा चेले गलीला प्रदेशा में तेऊ पहाडा में नाठे, जोह यीशु तयाबे खोजू। 17त्याहे तेऊरे दर्शन पाई करे तेऊबै नमस्ते करी, पर कासु-कासु शक होऊ 18यीशु त्या सेटा इच्छी करे बोलू, स्वर्ग होर धरती रा अधिकार महा बे दिंना दा साहा। 19एतकि तणी नाहां, सभी जाति रे लोका चेलअ बणा; होर त्या पिता, होर पुत्र, होर पवित्र आत्मा रे ना का बपतिस्मा देआ, 20होर त्याहबे सबे गला जोह मांई तमाबे आज्ञा दिंनी दी साहा, मनणा सिखाआ होर हेरा, हाऊं संसारा रा अन्त तणी तमे संघे रहंणअं।
Currently Selected:
मत्ती 28: ISJNT
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Inner Seraji (ईनर सराजी) Bible by The Love Fellowship is licensed under Creative Commons Attribution-ShareAlike 4.0 License.