मत्ती 26

यीशु रे विरोधा में चाल चालाउणी

(मरकुस 14.1,2; लूका 22.1,2; यूहन्ना 11.45-53)

1जेबा यीशु या सभे गला बोली छेकी तेबा आपणे चेले बे बोलदअ लागअ, 2तमे जाणा कि दुई धियाड़ी बाद फसह री जाच साहा, होर मणशा रअ शोहरू; क्रुसा में चढ़ाउंणे री तणी ढाकणे बझयाल़णअं। 3तेबा प्रधान याजक होर प्रजा रे पुरनिए काइफा ना रअ होर ग्रा रे बजुर्ग आँगणे में कठे होई, 4होर आपु में बिचारा करदे लागे कि यीशु धोखे संघे ढाकी करे मारी पाउंणअं। 5पर त्या बोला, जाचा रे वक्ते नांई, कई एडा ना होए कि लोका में बबाल मचे।

बैतनिय्याह में यीशु रा स्वागत

(मरकुस 4.3-9; यूहन्ना 12.1-8)

6जेबा यीशु बैतनिय्याह में सिमोन कोढ़ी रै घरे नाठअ, 7तेबा एक बेटड़ी संगमरमरा री बोतली मेंजे बहुमूल्य इत्र आंणी करे तेऊ सेटा बे आई, होर जेबा सह रोटी खांदअ बेठअ, तेबा तेऊरे मुडे पेरू। 8यह हेरी करे तेऊरे चेले जलन होई होर बोलदे लागे, एतका किबे सत्य नाश करू? 9एउ तअ ठीक रेटा में बेची करे कंगाला में बांडी सका। 10यह जाणी करे यीशुये तयाबे बोलू, बेटड़ी किबे बोलदे लागे? तेसे मांई संघे भलाई करी। 11कंगाल तअ सदा तमे संघे रहंदा, पर हाऊं तमा संघे सदा नांई रहंणअं। 12तेसे मेरी देहा में जोह यह इत्र पाउ, यह मेरे गाढ़ने री तणी करू। 13हाऊं तमाबे सच बोला, कि सारे संसारा में ज़धे कन्धे यह सुसमाचार प्रचार हूँणा, तखे तेसके एउ कामा रा बर्णन भी तेसकी यादी में हूँणा।

यहूदा इस्करियोती रा बिश्बासघात

(मरकुस 14.10,11; लूका 22.3-6)

14तेबा यहूदा इस्करियोती, जोह बारहा चेले मेंज़ा का एक, प्रधान याजका सेटा नाहीं करे बोलू, 15अगर हाऊं तेऊ थारे हाथे ढाकी देऊ तेबा महाबे कैह दींणा? त्याहे तेऊबै तीह चान्दी रे सिक्के तोली करे दिने। 16होर सह तेऊ वक्ता का तेऊ ढाकणे रे मोके लोडअ लागअ।

चेले संघे फसह रा आखरी धाम

(मरकुस 14.12-21; लूका 22.7-13,21-23; यूहन्ना 13.21-30)

17अखमीरी रोटी री जाचा का पहिली धियाड़ी, चेले यीशु सेटा इच्छी करे पूछते लागे, तुह कई चाहंदा कि हामे तेरी तणी फसह खाणे री त्यारी करे? 18तेऊ बोलू, नगरा में एकी मणशा रे सेटा नाहीं करे तेऊबै बोला, गुरु बोला कि मेरा वक्त नेड साहा। महा आपणे चेले संघे तेरअ फसह पर्ब मनाउंणअं। 19पर चेले यीशु री आज्ञा मनी होर फसह त्यार करू।

20जेबा ब्याल्क होई तेबा सह बारह चेले संघे रोटी खांदअ बेठअ। 21जेबा त्या खांदे लगे थी, तेबा तेऊ बोलू, हाऊं तमाबे सच बोला कि तमा मेंज़ा का एकु हाऊं ढाकणे बझयाल़णअं। 22एता में त्या बहू दुखी होई, होर हर एक तेऊका पूछते लागे, हे प्रभु, कैह सह हाऊं साहा? 23तेऊ उतर दीना, जूणी माए संघे थाली में हाथ पाउदअ, तेऊ हाऊं ढाकणे बझयाल़णअं। 24मणशा रअ शोहरू तअ जेड़ा तेऊरे बारे में लिखुदा साहा, नाहंदा ही साहा; पर हाय तेऊ मणशा बै शोक साहा जासू के साबे सह ढाकणे बझयाल़ण अगर तेऊ मणशा रा जन्म ही नांई हुँदा, तेबा तेऊबै भला हुँदा। 25तेबा तेऊ ढाकणे बझयाल़णअं आले यहूदा बोलू, हे गुरु कैह सह हाऊं साहा? यीशु तेऊबै बोलू, तांई बोली छेकू।

प्रभु-भोज

(मरकुस 14.22-26; लूका 22.14-23; 1 कुरिन्थियों 11.23-25)

26चेले सगे रोटी खांदे बक्ते यीशुये रोटी चुआकी होर आशीष मांगी करे चोड़ी, होर चेले बे दीनी होर बोलू, खाआ; यह मेरी देह साहा। 27तेबा तेऊ कटोरे चुआकी करे धन्यबाद करु, होर त्या हेरी करे बोलू, तमे सभे एउ मेंज़ा का झुटा, 28किबेकि यह वाचा रा मेरा लोहू साहा जोह बहू री तणी पापा री क्षमा रे निमित बहाउंदा। 29हाऊं तमाबे बोला कि दाखा रा यह रस तेसा धियाड़ी तणी नांई झूटणा, जेबरे तणी तमे संघे आपणे बापू रे राज्य में नउंआँ नांई झूठे। 30तेहुकी त्या भजन गाई करे जैतूना पहाडा बै नाठे।

पतरसा रे नांई करने री भविष्यवाणी

(मरकुस 14.27-31; लूका 22.31-34; यूहन्ना 13.36-38)

31तेबा यीशु तयाबे बोलू, तमा सभी आज राची ही मेरे बारे में ठोकर खाणी, किबेकि लिखू दा साहा, महा फुआल मारनअं, होर छुड़ा री भेडा तितर बितर हूँणी। 32पर महा जिऊंदे हूँणा बाद में तमा का पहिले गलीला बे नाहंणा। 33एता में पतरसे तेऊबै बोलू, अगर सबे तेरे बारे में ठोकर खाए तअ खाए, पर महा कधी भी ठोकर नांई खाणी। 34यीशु उतर दिंना, हाऊं तमाबे सच बोला कि आज ही मुर्गे बाषणे का पहिले, ताह चीण बारी महा जाणने का हूदणा। 35पतरसे तेऊबै बोलू, अगर महा तांई संघे मरना भी पड़े, तेबा भी ताहका नांई हूदणा। होर एडा ही सभी चेले बोलू।

गतसमनी री प्रार्थना

(मरकुस 14.32-42; लूका 22.39-46)

36तेबा यीशु आपणे चेले संघे गतसमनी ना री ज़ागा में आउए होर आपणे चेले बे बोलदअ लागअ, अखे बेशी रहे, जेबरे तणी हाऊं तखे प्रार्थना करू। 37होर तेऊ पतरस होर जब्दी रे दुई शोहरू संघे नीई, होर नराझ होर परेशान हुंदअ लागअ 38तेबा तेऊ तयाबे बोलू, मेरा जी बहू दुखी साहा, अखे तणी कि मेरे प्राण निखल़ी चाली। तमे अखी रहा होर मांई संघे ज़ागदे रहा। 39तेबा सह थोड़अ होर जेह बढ़ी करे पुरअ उटअ होऊ, होर यह प्रार्थना करी, कि मेरे बापू, अगर होई सका कि एउ कटोरे महा का दूर कर, तेबा भी हाऊं जेड़ा चाहंदा तेडा नांई, जेड़ा ही तूह चाहंदा तेडा ही हो। 40तेबा तेऊ चेले सेटा इच्छी करे त्या सुते दे हेरी होर पतरसा बे बोलू, कैह तमे मांई संघे एक घड़ी भी नांई ज़ागी सकी? 41ज़ागदे रहा होर प्रार्थना करदे रहा कि तमे परीक्षा में नांई पड़ा, आत्मा तअ त्यार साहा, पर शरीर कमज़ोर साहा। 42तेहुकी तेऊ दूजी बारी नाहीं करे यह प्रार्थना करी, हे मेरे बापू, अगर यह कटोरअ मेरे झूटे बिना नांई हटी सकतअ तेबा तेरी ईच्छा पूरी हो। 43तेबा तेऊ इच्छी करे त्या भी सुतेदे हेरी, किबेकि त्याह री आछी निज़ा में भरी दी थी। 44त्या छाडी करे भी नाठअ, होर त्याही शब्दा में भी चिउंणी बारी प्रार्थना करी। 45तेबा तेऊ चेले सेटा इच्छी करे बोलू, एबा सूती रहा, होर अराम करा, हेरा, बक्त पूजा, होर मणशा रअ शोहरू पापी रे हाथे ढाकणे बझयाल़ण। 46उठा, च़ाला! भाल़ा, महा ढाकणे आले नेड़ पुजे!

यीशु रा धोखे संघे ढाकणा

(मरकुस 14.43-50; लूका 22.47-53; यूहन्ना 18.3-12)

47सह यह ही बोलदअ ही लागदअ थी, कि यहूदा जोह बारा मेजा का एक थी आऊअ, होर तेऊ संघे तुलारी होर शोठे, आणी करे बहु लोका रअ छुड, जोह बडे प्रधान याजक होर ग्रा रे प्राचीनों री तरफा का भेजी दी थी। 48तेऊ ढाकणे बझयाल़णे त्या बे यह चिन्ह करू थी, जासूबे हाऊं मुघी देलअ सह साहा; तेऊ ढाके। 49होर तेभरी यीशु सेटा इच्छी करे बोलू, हे गुरु, नमस्कार! होर तेऊबै बहू मुघी दीनी। 50यीशु तेऊबै बोलू, हे मित्र, जासू कामा री तणी तूह आउअ दअ साहा, तेऊ कर। तेबा त्याह सेटा इच्छी करे यीशु बे हाथ पाई होर सह ढाकु। 51यीशु रे संधी मेजा का एकु हाथ बढ़ाई करे आपणी तुलार खिंची होर महायाजका रे नोकरा बे चलाई करे तेऊरअ कणेट काटू । 52तेबा यीशु तेऊबै बोलू, आपणी तुलार म्याना में डाह किवकि जोह तुलार चलाऊदा त्या सबे तुरारी संघे नष्ट करने। 53कैह तुह नांई ज़ाणदअ कि हाऊं आपणे बापू संघे बिनती करी सका, होर स्वर्ग दूता री बारह पलटन का ज्यादा महा सेटा एबरे हाजिर करणी? 54पर पवित्र शास्त्रा री या गला साहा कि एडा ही हूँणा जरूरी साहा, केडे पूरी हूँणी? 55तेऊ वक्ते यीशु भिड़ा बे बोलू, कैह तमे तुलार होर डाहुले आणी करे महा चोरा साही ढाकणे री तणी आएदे? हाऊं हर धियाड़ी देहुरे में बेशी करे उपदेश दिंदा थी, होर तमे हाऊं नांई ढाकु 56पर यह सब एतकी तणी होऊ कि भविष्यद्वक्ता रे वचन पवित्र शास्त्रा रअ पूरा होए। तेबा सभे चेले तेऊ छाडी करे ठुरी।

महासभा रे सामने यीशु

(मरकुस 14.53-65; लूका 22.54,55,63-71; यूहन्ना 18.13,14,19-24)

57तेबा यीशु रे डाकण आणे तेऊवे काइफा नाआ रे बडे महायाजका ज़ेह निऊ, जखे शास्त्री होर पुरनिए कठे होई। 58पतरस दुरा ही दुरा का तेऊ पीछे-पीछे महायाजक रे आँगणे तणी नाठअ, होर मितर नांई करी हेरन आले सेबका संघा बैठअ। 59प्रधान याजक होर सारी महासभा यीशु मारने री तणी तेऊरे विरोध में झूठी गुआई री खोजा में थी, 60पर बहु झूठी गुआई इहंणे बाद भी ना पाई। लास्टा में दुई लोका आए, 61होर बोलू, एउ बोलुदा कि हाऊं परमेश्वरा रे देहुरे ढोली सका होर तेऊ चीई धियाड़े में बणाई सका।

62तेबा महायाजक मेंजे खड़े होई करे यीशु वे बोलू, कह एतका उतर ताह सेटा साहा? 63पर यीशु चूप रहू। तेबा महायाजके तेऊवे बोलू, हाऊं ताहवे जिऊंदे परमेश्वरा री कसम दिंदा कि जेबा तूह परमेश्वरा रअ शोहरू मसीह साहा, तेबा हामा वे बोली दे। 64यीशु तेऊवे बोलू, ताई आपे ही बोलू; हाऊं ताहवे यह भी बोला कि एबरा का तूह मणशा रअ शोहरू सर्वशक्तिमाना रे दाहिनी तरफ बैशे, होर सरगा रे बदलां पैंदे इन्दअ हेरनअ। 65तेबा महायाजके आपणे झिकड़े थोची करे बोलू, एऊऐ परमेश्वर री निन्दा करी, एवा गुआही री केह जरुरत? हेरा, तमा एबरे यह निंदा शुणी! 66तमे कह सोचा? त्याहे उतर दिना, यह मारने लायक साहा। 67तेबा त्या तेऊरे मुँहे थुकू होर मुके बाही, दूजे थप्पड़ बाही करे बोलू, 68हे मसीह, हामा बे भविष्यवाणी करी करे बोल कि कुंणी ताह बाही?

पतरसा रा नांई करणा

(मरकुस 14.66-72; लूका 22.56-62; यूहन्ना 18.15-18,25-27)

69पतरस बागे आँगणा में बेठअ दअ थी, कि एक सेवा करने आली दासी तेऊ सेटा बे आई होर बोलू, तुह भी यीशु गलीली संघे थी। 70तेऊ सभी रे सामने यह बोलदे नांई करू, हाऊं नांई ज़ाणदअ कि तांई कैह लाईदी। 71जेबा सह बागे डेहली में नाठअ, तेबा दूजी सेवा करने आली तेऊ हेरी करे जोह तखे, बोलू, यह यीशु नासरी संघे थी। 72तेऊ कसम खाई करे भी नांई करू हाऊं तेऊ मणशा नांई ज़ाणदअ। 73थोड़ी देरा बाद लोके जोह तखे खड़े थी, पतरसा सेटा इच्छी करे बोलू, सच्ची तूह त्या मेंज़ा का एक साहा, किबेकि तेरी बोली तेरा भेत खोज़ा। 74तेबा पतरस नाँई करदअ होर कसमा खांदअ लागअ, हाऊं तेऊ मणशा नांई ज़ाणदअ। होर तेभरी मुर्गअ बाठअ। 75तेबा पतरसा यीशु री बोली दी गला याद आई, मुर्गे बाशणे का पहिले ताह चिण बारी मेरा नांई करणा। होर सह बागे नाहीं करे हिकी-सणीकी करे लेरु।

Currently Selected:

मत्ती 26: ISJNT

ማድመቅ

Copy