मत्ती 21

यरूशलेमा में जीती करे इंहणे री खुशी

(मरकुस 11.1-11; लूका 19.28-38; यूहन्ना 12.12-19)

1जेबा त्या यरूशलेमा नेड पूजी होर जैतून पहाडा पैंदे बैतफगे सेटा आउए, तेबा यीशु दुई चेले यह बोली करे भेजी, 2सामने रे गराएँ नाहा। तखे पूजदे ही एक गाधी बान्हीं दी साहा, होर तखे गाधी रअ बचअ भेटणअं। तेऊ खोली करे महा सेटा बे आंणा। 3अगर तमाबे कोई कुछ बोल्ले, तेबा बोले कि परमेश्वरा एउरा रा काम साहा, तेबा तेऊ त्या तेभरी भेजणे। 4यह एतकी तणी होऊ कि जोह तमे बचन भविष्यद्वक्ता बोलुदा थी, सह पूरा हो 5सिय्योना री शोहरी बे आज्ञा दे, हेर, तेरअ राजा ताह सेटा बे इहंदा सह नम्र साहा, होर गाधे में बेठअ आसा गाधी रे शोहरू पेंदे बोझे चकण आल़े रे शोहरू पेंदे। 6दुहे चेले नाठे, जेड़ा यीशु बोलूदा थी, तेडा ही करू। 7होर गाधी होर बच्चे आणी करे, त्या पैदे आपणे झिकड़े पाई, होर सह त्या पैंदे बेठअ। 8तेबा बहू लोके आपणे झिकड़े बाता में बिछाई, होर लोके बूटे का डाल़ी काटी करे बाता में बिछाई। 9जोह भीड़ जेह-जेह नाहंदा, होर पीछे-पीछे हाडदा थी, पुकारी-पुकारी करी बोला, दाऊदा रे शोहरू बै होशाना, धन्य जोह प्रभु रे ना का इहंदा, सरगा मे होशाना। 10जेबा यीशु यरूशलेमा में पूजअ, तेबा सारे नगरे हलचल मची, होर लोका बोलदे लागे, यह कुंणअं साहा? 11लोके बोलू, यह गलीला रे नासरता रअ भविष्यद्वक्ता यीशु साहा।

देहुरे का बयपारी काहडने

(मरकुस 11.15-19; लूका 19.45-48; यूहन्ना 2.13-22)

12यीशु परमेश्वर रे देहुरे में नाहीं करे त्याह सभे, जोह देहुरे में लेन देना करदे लागे थी, त्याह काहडी, होर सर्राफो रे पीछे होर कबूतरा बेचणे आले री चौउकी उलटाई; 13होर तेऊ बोलू, लिखुदा साहा, परमेश्वरा रअ घर प्रार्थना रअ घर हुणअ; पर तमे तेऊ चोरा री खोह बणाउंदा। 14तेबा काणे होर लेगडे, देहुरे में तेऊ सेटा बै आउए, होर तेऊ त्या ठीक करी। 15पर जेबा प्रधान याजक होर शास्त्री याह चमत्कारा आल़े कामा, जोह तेऊ करी, होर बालका देहुरे में दाऊदा रे शोहरू बे होशाना पुकारदे हेरी, तेबा त्या रोष उठू, 16होर तेऊबै बोलदे लागे, कैह तूह शुंणा कि या कैह बोला? यीशु तयाबे बोलू, हा; कैह तमे यह कधी नांई पढू: बालका होर दूधा झुटते शोहरू रे मुँहा का तांई अपार स्तुति कराई? 17तेबा सह त्याह छाडी करे नगरा का बागे बैतनिय्याह बे नाठअ होर राच तखे बिताई।

बिना फला रे फागू रअ बूटअ

(मरकुस 11.12-14,20-24)

18दोती जेबा सह नगरा बे बापस इहंदअ लागअ थी, तेबा तेऊ भोछ लागी। 19सड़का रे कनारे अंजीरा रे बूटे हेरी करे तेऊ सेटा बे नाठअ, होर पाचा छाडी करे तेता में किछे नांई हेरी करे तेऊबै बोलू, एबरा बाद ताह में कधी भी जुगे -जुगे तणी फल़ नांई लागणे। 20यह हेरी करे चेले हैरान होई, होर त्याहे बोलू, यह अंजीरा रअ बूटअ तेभरी केहडअ शुकअ? 21यीशु तयाबे उतर दिंना, हाऊं तमाबे सच बोला, अगर तमे बुशाह डाहले होर शक नांई करले, तेबा नांई सीधी यह करना जोह अंजीरा रे बूटे संघे करू, पर एउ पहाडा बे भी बोलले, उड़, होर समुद्रा में नाहीं करे पड़, तेबा तेडहा ही हूणा। 22होर जोह कुछ तमे प्रार्थना में बुशाह का माँगले सह सबे तमाबे भेटणा।

यीशु रअ अधिकारा पैंदे प्रश्न

(मरकुस 11.27-33; लूका 20.1-8)

23सह देहुरे में नाहीं करे उपदेशा करदअ लागअ थी, तेबा प्रधान याजक होर ग्रा रे प्राचीने तेऊ सेटा इच्छी करे पुछू, तुह यह काम कास्के अधिकारा का करा? होर ताहबे यह अधिकार कुंणी दिंना? 24यीशु तयाबे उतर दिंना, हाऊं भी तमा का एक गल पूछा; अगर तमे महा बै खोजले, तेबा हाऊं भी तमाबे खोज़लअ कि काम कासु अधिकारा का करा। 25यूहन्ना रा बपतिस्मा कंधा का थी? स्वर्ग री तरफा का या मणशा री तरफा का? तेबा त्या आपु में बिबादा करदे लागे, अगर हामे बोलले स्वर्गा री तरफा का, तेबा तेऊ हामा बे बोलणाा, तेबा तमे तेऊरा बुशाह किबे नांई करू? 26अगर बोले मणशा री तरफा का, तेबा हामा भिड़ा री डर साहा, किबेकि सब यूहन्ना भविष्यद्वक्ता मना। 27तेबा यीशुये त्याबे उतर दिंना, तेबा हाऊं भी तमाबे नांई खोज़दअ कि यह काम कासके अधिकार का करा।

दुई शोहरू रा दृष्टान्त

28तमे कैह सोचा? कासु मणशा रे दुई शोहरू; तेऊ पहिले सेटा नाहीं करे बोलू। हे पुत्र, आज दाखा री बारी में काम कर। 29तेऊ उतर दिंना, महा नांई नाहंणा, पर तेहुकी पछताई करे नाठअ। 30तेहुकी मालके दूजे सेटा नाहीं करे एडा ही बोलू, तेऊ उतर दिंना, जी जरुर नाहलअ, पर नांई नाठअ। 31या दुई मेंज़ा का कुंणी बापू री ईच्छा पूरी करी? त्याहे बोलू, पहिले। यीशु तयाबे बोलू, हाऊं तमाबे सच बोला कि चुंगी मागणे आले होर बेश्याएँ तमा का पहिले परमेश्वरा रे राज्य में प्रबेश करा। 32किबेकि यूहन्ना धर्मा री बात रिहाउंदे तमा सेटा बे आउअ, होर तमे तेऊरा बुशाह नांई करू; पर चुंगी माँगण आले होर बेश्या तेऊरा बुशाह करू: होर तमे यह हेरी करे तेहुकी भी नांई पछताए कि तेऊरा बुशाह करे।

दुई किसाना रा दृष्टान्त

(मरकुस 12.1-12; लूका 20.9-19)

33एक होर दृष्टान्त शुंणा: एक गृहमालक, जूणी दाखा री बारी लाई, तेतके चहु फेरे बाड लाई, तेता में रसा रअ गाढ़अ कोतू होर गुम्मट बणाऊ, होर किसाना बे तेतका ठेका देई करे प्रदेशा बे नाठअ। 34जेबा फला रा वक्त नेड़ आउआ, तेबा तेऊ आपणे दास तेऊरे फला आंणने बे किसाना सेटा बे भेजी। 35पर किसान तेऊरे दासे ढाकी करे, एखा चिकी होर एखा मारी, होर कासु पैंदे पथराब करू। 36तेहुकी तेऊ पहिले का ज्यादा होर दास भेजी, होर त्याहे भी तेडा ही करू। 37लास्टा में तेऊ आपणे शोहरू तेऊए सह एडा सोची करे भेजू की त्याह एउरी इजत करले। 38पर किसान शोहरू हेरी करे आपु में बोलू, यह तअ बारिस साहा, ईच्छा, यह मारी पाउण एउरी मीरास लउणी। 39पर त्याहे सह ढाकु होर दाखा री बारी का बागे काहडी करे मारी पाऊ। 40एतकी तणी दाखा री बारी रअ मालक इलअ, तेबा त्या किसाने संघे कैह करना? 41त्याहे तेऊबै बोलू, तेऊ त्या बुरे लोका बुरी रीति संघे नष्ट करने; होर दाखा री बारी रा ठेका दूजे लोका बे दींणा, जूणा तेऊबै वक्ता में फल़ देले। 42यीशु तयाबे बोलू, कैह तमे पवित्र शास्त्रा में यह नांई पढू: जूण पाथर राज मिस्त्री नकामअं डाहू, सहे कुणे रअ पाथर होऊ? यह प्रभु री तरफा का होऊ, होर माहरी नजरा में अदभुत साहा।

43एतकी तणी हाऊं तमाबे बोला कि परमेश्वरा रा राज तमा का माँगणा होर एडी जाति बे जोह तेऊरअ फल़ आणी दींण। 44“जोह एउ पाथरा पैंदे पड़लअ, सह चकनाचूर हूँणअं; होर जासू पैंदे सह पड़णअं, सह पिशणअं।” 45प्रधान याजक होर फरीसी रे दृष्टान्ता शुंणी करे समझी कि सह त्यारे बारे में बोला। 46होर त्याहे सह ढाकणअं चाहू, पर लोका का डरी किबेकि त्या तेऊ भविष्यद्वक्ता मना थी।

Currently Selected:

मत्ती 21: ISJNT

ማድመቅ

Copy