मरकुस 6

नासरत शहरेन यीशु गा बुरा डाके

(मत्ती 13:53-58; लूका 4:16-30)

1मेटे यीशु कफरनहूम पुराटे हेजा पुरान नासरत डेन हेन। दियागा चेलाकू दियागा टाऊटे ओले। 2परमेश्वर गा चोखरा दिन जब यीशु परमेश्वर गा वचन आराधना जगान इथू लज्जे, एठा घोनेच कुरकू आजुमटे अचम्बोएन मेना एठा दिकुनी कोम्बराके, “इनी कोरोनी इनी बातो तुंगटे इथूके? इनीजेन तुनिरोंगो ज्ञान एठा इनी रोंगो खाट अचम्बो कामय शक्ती जे जीके होय?” 3दिकुनी जे होय दिकु कुरकू इनी मंडीटे अपमान डाके, “चोच इनी सिर्फ म्या मिस्त्री बाने? चोच इनिज सिर्फ मरियम गा कोणटे बान? चोच इनिज सिर्फ याकूब, योसेस, यहूदा, एठा शमौन गा खाट डाईटे बाऊ होय, डीचके आबु सेबाईकु हाडाई होय? चोच दियागा सानी बोकोजाईटे येटेन आलेगा तालान बान थांदळ?” 4यीशु नी दिकुटे मंडीके, “परमेश्वर गा कोनेटे मंडीमिठाच तोटेन काभी सेनेवा होय दियागा मान डोएबा होय। पेनो दियागा गाँवेन, दियागा उरान एठा दियागा हेजा सगाकु तालन दियागा मान बान डाऊ।” 5इनी कारण यीशु घोनेच खापेट अचम्बो कामय बान दडुका, चोयाकी कुरकू दिया लिंजेन विश्वास दोडो टे बान मेंके। अदा बिमारी कुरकू के लिंजेन हेजा टी धोटे सजाके सिवाय चोचकाभी बान दाडुका 6एठा दिच्नी दिकुगा बान विश्वास लिंजेन बिचारजे होय, एनेगा बादोन यीशु आसो-पासो गाँवेन ओले एठा कुरकू के परमेश्वर गा खाबोर इथूकेकु।

यीशु गा व्दारा बारा कलमके चेलाकूके कुलकेकु

(मत्ती 10:5-15; लूका 9:1-6)

7अदा टेमो यीशु नी बारह चेलाकूके हेजा मेरान हकोलेकु एठा डाबोलटे दिकुके भूतोकुके कोखला गा हाक जीके। मेटे डीचनी दिकुके बारखीन्ज-बारखीन्ज के अलग्गो-अलग्गो गाँवेन कुल्केकु। 8एठा डीचनी दिकुके मंडीके, “इकुगा पैदल सेन्द्रा घल्जी म्या लाकडी सायोम। पेनो न जोजोम गा घाल्जी चोचकाभी सेगे, न तुनिका झोरा, न पकीदेन दमा। 9बस बुट्टा उरे पेनो जदा आंगी गा जरुरत बाऊ होय।” 10एठा यीशु नी दिकुटे मंडीके, “अगर जेका आमके हेजा उरान थंदळ घांजी हाकोटासो, डो जब टाएन आपे डी शहरेन थंदळ लठ्ठाका, मेटे टाएन दियागा पाओना आरुका थांदळे। 11अगर डी जगा टे तुनिका कोरो आमगा मान सम्मन बान दडा, एठा अमागा बान आजोम, डी जगा के आराकी एठा अमा नंगा गा धुल्ला कुठाकी। म्हणजे दिकुके चताराए जिऊ गा घाल्जी परमेश्वर गा कोनेटे घाटाऊमिनी सजा गा घाल्जी डीच नका हेज्का जिम्मेदार होय।” 12एठा चेलाकूनी ओलेडो कुरकू मांदिके, “आमेन अमागा पापो टे मन बदलाए एठा परमेश्वर कोनेन दोडो होना।” 13एठा चेलाकूनी घोनेच जगान ओलेडो भूतोकुके ओटकेकु, एठा घोनेच बिमारी कुरकून लिंजेन जैतून सुनूम एंदाके एठा दिकुके सजाकेकु।

यूहन्ना बपतिस्मा जिऊमिठाच गा घोगेच

(मत्ती 14:1-12; लूका 9:7-9)

14मेटे हेरोदेस राजा नी डी कमाय गा चर्चा आजुम्के जो यीशु दडा लक्के डा। चोयाकी घोनेच कुरकू यीशु गा बारेन हाडाई डा एठा दियागा विषय गेन चर्चा लक्के डा। एठा यीशु गा बारेन मंडी लक्के डा, “जरुरी का देटेन यूहन्ना बपतिस्मा जिऊमिठाच होय! जो डाबोलटे गोएन मिठाच जाटे जीटाएन होय! इनी वोजीटे देटेन एनोगो अचम्बो कामय दडा डा।” 15एठा अलग्गो कुरकू नी मंडीके, “इनिज परमेश्वर गा कोनेटे मंडीमिठाच एलिय्याह होय” पेनो एठा अलग्गो कुरकू मंडीके, “जुना नियम गा परमेश्वर गा कोनेटे मंडीमिठाच रोंगो दिकु म्या परमेश्वर गा कोनेटे मंडी होय।” 16राजा हेरोदेसनी इनी आजुमटे मंडीके, “इनी यूहन्ना बपतिस्मा जिऊमिठाच होय! इंज खुद दियागा कपार के म्हाके डा। पेनो डीचनी गुजूटे जीवनेन डबोलटे हिराके।” 17-18हेरोदेस राजा नी अदा टेमो पेला हेजा डाईटे फिलिप्पुस गा जापाएटे हेरोदियास टे ब्याह डावे डा। पेनो यूहन्ना नी डीचके मंडीके, “इनी मूसा गा नियम गा रोंगो सही बाऊ होय। कि अमा अमागा डाई गा जपाएके साजोम जब टाएन अमा डाई जीटा होय।” इनी वोजीटे हेरोदियासके कुकूशो घांजी हेरोदेस राजा नी यूहन्ना के जेलेन येंडाकेनेच। #लैव्य. 18:16; 20:21 19इनिघल्जी हेरोदियास यूहन्ना टे दुश्मनी दोडो डा एठा इनिज मेंबा, कि डीचके घोजेज पेनो एनोगो बान दडुका। 20चोयाकी हेरोदेस राजा यूहन्ना के धर्मी एठा चोखरा कोरो मेंटटोन दियाटे हिगरा डा, इनिघल्जी जेलेन डीचके सजाका डोएच डा। हारबार मेटे हेरोदेस राजा यूहन्ना के मंडीटे आजुम्डा, डीच भेबाव घबरातिंजू डा, पेनो एठाभी डीचके आजोम पपासंद डा। 21हेरोदेस राजा नी हेजा गा जनमदिन मनातिंजबे। डीचनी हेजा अदा खापेट हाक गेल्लामिंकूके, सेना गा सेबाई कास कमाए सेंसान्द्रा मिंकूके एठा गलील जिल्हा गा सेंसान्द्रा मिंकूके तिवारेन बेल्लाऊ घाल्जी हाकोलेकु। इनी आटा टेमोन हेरोदियासेन यूहन्ना के घोगेज गा म्या मौका घाटाएन। 22जब हेरोदियास गा कोंजाई टे तिवार गा तलान हेके, दिच्नी नाचोटे हेरोदेस राजा एठा दियागा पाओनाकुके खुशोकेकु। मेटे राजा हेरोदेसनी तैराई टे मंडीके, “आमेन जो होना इंजाटे आसे इंज आमके जेबा।” 23हेरोदेस राजा नी तराईटे कासोम जोम्टे मांदिके, “इंज इंजागा अदा राज्य टाएन जो चोचकाभी अमा इंजाटे आसिवा इंज आमके जेबा।” #एस्ते. 5:3,6; 7:2 24तराईनी बल्लान ओलेडो हेजा आंटे टे कोम्बाराके, “इंज चोच आसे?” दियागा आंटे डीचके मंडीके कि डीच “यूहन्ना बपतिस्मा जिऊमिठाच गा कपार म्हाटे आमके जिकी।” 25मेटे तराई तुरुटो राजा गा उरा तलान हेन एठा दियाटे बिनती डाके, “इंज मेंबाकी कि अमा यूहन्ना बपतिस्मा जिऊमिठाच गा कपार म्हाटे म्या थळान सेगे।” 26मेटे राजा भेबाव नराजोयेन, डीच हेजा कासोम डो पाओनाकु वोजीटे दियागा बिनतीके ममानातिंज बान डा। 27एठा राजा नी तुरुटो म्या सिपाई मांदिके जेलेन सेने, एठा यूहन्ना कपार म्हाटे डी तराई मेरान जिकी। 28शिपाईनी जेलेन ओलेडो दियागा कपार म्हाके, एठा म्या थळाननी साले एठा तैराई के जीके, एठा तैराई नी हेजा आंटे के जीके। 29जब यूहन्ना गा चेलाकून मालूम्जेकी कि डीचके घोच्केनेच। दिकुनी दियागा माळाके सैईये एठा गुफा गा मर्गोटो डोके।

यीशु गा मोनाई हजार कोरोकु के चाचरा

(मत्ती 14:13-14; लूका 9:10)

30जब दिकु बारह कलामके मिंकू चेलाकू दिकुके यीशु कुल्केकु डबोलटे हिराके दियागा उफुन भी कोनेन म्याखठठा जमाएन एठा जो चोचकाभी दिकुनी डाके एठा इथूकेकु डा। सेबाई यीशु के घाल्के। 31घोनेच कुरकू देटेन हेजे सेने डा एठा इनी वोजीटे यीशु एठा दियागा चेलाकू टे आटा जोजोम गा टेमो भी बान घटाऊ डा मेटे चेलाकू टे मंडीके, “हेजे नका म्या एनोगो जगान बो देटेन आले एकला थंदळकु एठा थोळासा टेमो आरम्बोयु होना।” 32इनिघल्जी यीशु एठा दियागा चेलाकू डोंगान लिजेन पेळेन डो, सुनसान जगान नी अलग्गो ओले। 33पेनो घोनेच कुरकू नी सेने टे डोकेनेच एठा चिनाएनेच डा कि दिकु तुगन चेलके डा। इनिघल्जी दिकु डी जगान कोनेन आसो-पासो गा वोटे लिंजटे सेने डोन साळूपा डोन दिकुटे पेला देटेन पोचातिन्जे। 34जब यीशु डोंगाटे आगुरुके एठा खाट गर्दी डोके, एठा दिकु लिजेन आस्वान हेन, चोयाकी दिकु डी मेंडाकू रोंगो डा, दिकु मेरान जेकाभी अगुवा बाऊ डा, जो अच्छा टे दिकुगा देखभाल दडा जेका बाऊ, “डीच दिकुके परमेश्वर गा राज्य गा बारेन घोनेच बातो इथूकु लज्जे।” #2इति. 18:16; 1राजा. 22:17 35डया गा काफी बादोन सिगुरूप यीशु गा चेलाकू दियागा मेरान हेके डो मंडी लक्के, “इनी सुनसान जगा होय एठा भेबाव सिंगुरूपजे होय। 36गर्दी भिडकू कि उफुन भी कोने गा गाँवेन एठा बस्तीन नी सेने डो, आबु घाल्जी चोचकाभी जोजोम गा मोलटे साली।” 37यीशु नी चेलाकूके जवाब जीके, “आमका दिकुके जोजोम गा जे।” दिकुनी डियटे मंडीके, “एटो घोनेच सोकळा भाव बरी साड्डी सौ दिनार होय (बरी साड्डी सौ दिन गा मुंजीरी बराबोर होय)।” 38यीशु नी दिकुटे मंडीके, “सेने डो डोगे आपे मेरान चोटो सोकडा होय?” दिकुनी कोम्बार टे मंडीके, “मोन्या सोकडा एठा बरी काकू भी।” 39मेटे यीशु नी चेलाकूके हुकूम जीके कि सेबेय कु के निला झरा लिंजेन सुबानकेकु। 40दिकु सौ-सौ एठा पचास-पचास कुटे डो सुबानकेकु। 41यीशु नी डी मोन्या सोकडा के एठा बरी काकूके सावे, एठा स्वर्ग कोने धोटे परमेश्वर गा धन्यवाद जीके, एठा सोकडा तुकाडा-तुकाडा टे चेलाकूके जीके म्हणजे दिकु कुरकू के कतीन्जे, एठा डी बरी काकूके भी दिकुके सेबेय नी कटिंज के। 42एठा सेबेय कु जोम्टे लाच भेटटेन। 43जब सेबाईकु नी आटा जोफे मेटे चेलाकूनी सोकडा एठा काकूकु तुकडाके म्या जगान के। देंटे बारह टोपला भेटटेन। 44जापाएकु एठा चाफ्नीकुके आराटे जो कुरकू सोकडा जोवे, दिकु मोनाई हजार सानाकु डा।

यीशु डा लिजेन सेन्द्रावे

(मत्ती 14:22-33; यूहन्ना 6:15-21)

45मेटे डीका टेमो यीशु नी हेजा गा चेलाकू टे डोंगान कि दिकु इकुका पेळेजे एठा दियाटे पेला बैतसैदा गा पूरा कोनेन ससेंजू, जब इनिज ओले गर्दी कुरकू के बिडाकुबा होय। 46कुरकू के बिबीडा गा बादोन यीशु टुक्की कोनेन प्रार्थना दडा घाल्जी ओले। 47एठा अंदाजोटे सिंगुरूपजे, मेटे डोंगा गलील गा समुद्र गा तलान डा, एठा यीशु एकलाका वोटेनेज डा। 48एठा जब डीचनी डोके चेलाकू चाचुलू-चाचुलू घाबरातिंजे होय। चोयाकी तेजो कोयो खिलाफबेन चालुका डा, फेजेरा गा अदा टेमो पेला यीशु गलील गा समुद्र लिंजेन सेन्द्राटेका चेलाकू मेरान हेन। 49पेनो जब चेलाकूनी यीशु के डी समुद्र लिंजेन सेन्द्रा टे डोकेनेच मेटे दिकुनी चिल्लातिंजू चालुके चोयाकी दिकुनी समझातिन्जके कि इनिज म्या भूतो होय, 50चोयाकी सेबाईकु डीचके धोटे हिगराएन डा। पेनो यीशु नी तुरुटो दिकुटे बातो लज्जे कि एठा मंडीके, “हिंमत डोए, हिगरा बाकी, इंज यीशु होय।” 51मेटे डीच दिकु सेंग्गोन डोंगा लिंजेन पेळेन, एठा कोयो धुंदळ चालु बांडोएन इनी धोटे दिकु ठायका बिचारजे। 52इनिका चाहे दिकुनी यीशु गा शक्तीके डोके डा जब दिच्नी मोनाई हजार कुरकू के आटा चाराके डा। पेनो दिकु आए टेमोन आए टाएन समझातिंज्दुका डा कि दिकुनी डोके डेगा चोच अर्थ डा।

गन्नेसरत शहरेन नी बिमारीकु के सासजा

(मत्ती 14:34-36)

53जब यीशु एठा दियागा चेलाकू म्या डोंगान गलील गा समुद्रान एठा सम्मान बळातिंज्जे मेटे दिकु गन्नेसरत शहर गा धुरान आदिरजे। मेटे दिकुनी डोंगा देटेन टोल्के। 54एठा जब दिकु डोंगा लिंजाटे आगोरोएन, मेटे कुरकू नी तुरुटो डीचके चिनाएनेच, 55डी पूरा जिल्हान जल्लोका ओले एठा बिमारीकु के चाटाई लिंजेन धोटे, डीका जगान सैय्येकु देटेन कुरकू मंडीटे डोकेकु कि यीशु देटेन ओले डा। 56जब भी डीच गाँवेन, शहरेन या पुरान, या बस्तिनौरेन एठा खिटीन सेने डा, कुरकू बिमारी कुरकू साकुवा एठा दिकुके हाटीन डोकुवा। एठा यीशु बिनती दडा डा कि डीच दिकुके हेजा आंगीके उठा डाए, जोभी कुरकू डीके उठाए डा सेबाईकु साजाएन डा।

Currently Selected:

मरकुस 6: GOKNT

ማድመቅ

Copy