मरकुस 12

यीशु व्दारा बुरा खिटीनकु गा उदाहरण

(मत्ती 21:33-46; लूका 20:9-19)

1एनेगा बादोन यीशु उदाहरणेन बातो लज्जे, “म्या कोरोनी हेजा खिटीन अंगूर एंदाके।” दिच्नी खिटी गा उफुन भी कोनेन म्या घोटा गा दीवार आरुके। दिच्नी उफुन भी कोनेन जानवरकु टे खिटी रखवाली दडा घाल्जी ठुम्बी आरुके एठा डाबोलटे दिच्नी खिटीके लागुन टे जीके एठा दूसरा देशो कोनेन ओले। 2जब अंगूर गा अनोजो हागम हेन मेटे मालिकोनी आपना गा भाग्यकूटे म्या भाग्या के मंडीके कि दिकु अंगूर गा खिटीन सेने एठा लागुन मिंकूटे डेगा नफा गा जमाटे दियागा मेरान सेगे। 3पेनो लागुन मिंकू डीचके उठाटे मुंडाकेनेच एठा बिना चोचका दडा गा डीचके डाबोलटे हिराकेनेच। 4डाबोलटे खिटी मालिको हेजा गा म्या एठा भग्याके लागुन मिंकू मेरान कुल्केनेच। पेनो दिकुनी दियागा कपार के फाळिके एठा दियागा अपमान डाके। 5डाबोलटे खिटी गा मालिकोनी म्या एठा भग्याके कुल्केनेच। लागुनमिंकूनी डीचके घोच्केनेच मेटे मालिकोनी घोनेच्कुके कुलकेकु दिकु तलान थोडाकु के मुंडाके कु एठा थोडाकु के गोचके कु। 6अखिरीन मालिको मेरान कुकूल घाल्जी सिर्फ म्या एठा कोरो डा डीच दियागा कोंटे डा। अखिरीन मालिकोनी हेजा कोंटे लागुन मिंकू मेरान इनी सोचातिंजे कुल्केनेच कि इंकू इंजा कोण गा मन डोएबा। 7लेकिन मेटे खिटी कोरो दियागा कोणटे के हेजे टे डोकेनेच मेटे दिकुनी म्या बर्खिंजाटे मंडीके, एटेन डीचका होय जो अंगुरा बगीचा गा मालिको होय, हेजे आबु इनिज्के घोजेज इनी खिटी आबुगा आरुवा। 8एठा लागुन मिंकुनी इनिज्के घोच्केनेच एठा लासोके अंगूर गा खिटी टे बल्लान टेप्पाके। 9“आपेन चोच लगातिंजुवा कि अंगूर खिटी गा मालिको चोच डाएवा? डीच हेजेवा डो डी लागुन मिंकूके घोच्कुबा एठा अंगूर गा खिटी दूसरा लागुन मिंकूके जेबा। 10चोच आपेनी पवित्र ग्रंथ गा डी भागो बान पडातिंज्दुका जो मसीह गा डे रोंगो म्या कास घोटा टे डाएवा होय? डीच मंडीवा होय जो घोटा मिस्री कुरकू नी टेप्पाके। डीका घोटा होय जो खाट उरा सेबाई टे कास आरोएन। 11प्रभु नी एनोगो डा डाके, एठा इनी आलेगा घाल्जी ठायका अचाम्बो होय!” #भजन. 118:23 12मेटे यहूदी कुरकू गा अगुवाकु समझातिंजे कि यीशु नी दिकुगा खिलाफबेन इनी उदाहरण घाल्के डा इनिघल्जी इंकू डीचके जेलेन येंडाएच डा। पेनो दिकुनी डीचके जेलेन बान येंडाकु चोयाकी डीच कुरकू टे हिगरा डा। इनिघल्जी दिकु डीचके एकला आराटे ओले।

कैसर गा कर जिऊ लिजेन प्रश्न

(मत्ती 22:15-22; लूका 20:20-26)

13मुख्यायाजक कुनी अदा फरीसि कुरकू एठा हेरोदेस राजा गा साथो गा अदा कुरकू के यीशु गा मेरान कुल्केकु ताकी दिकु यीशु के अदा बातो फसातिंज घाल्जी कुल्केकु ताकी दिकु यीशु के मुंजिरीम आरोएच्बा। 14एठा दिकुनी हेन डो यीशु टे मंडीके, “हे गुरु आले हाडाई कि अमा हमेशा सच्चो गघालबा होय। एठा अमा इनी बातो टे अमा बान हिगरा कि दूसरा कुरकू अमा बारेन चोच सोचातिंज्बा होय। आपे सेबाईकु म्यासारिका व्यवहार दोडोवा एठा परमेश्वर गा कोरा सच्चाई टे घालेवा होय। चोच मूसा गा नियम आलेके रोमी सम्राट कैसर टेक्सा जिऊ गा हुकूम जेबा या बाने? 15चोच आलेन कर जिऊ होना या बाने?” यीशु नी दिकुगा खोटो चिनाटे कोम्बराके, आपे इंज्के चोच्का गलत मंडी गा वोजीटे पपासातिंज गा कोशिश चोया दडा लक्के होय? म्या दिनार इंजा मेरान सेगे कि इंजभी डोगेवा। म्या दिनार म्या रोमी चिक्खा डा डी चाँदी गा आरुके डा (म्या दिन गा मुंजीरी)। एनेगा कामयसा गा यहूदी कुरकू वोजीटे रोमी सरकार के हेजा कर गा जिऊ गा घाल्जी दडा डा। दिनार गा मठान सम्राट गा जीमू मारा डाऊ डा। 16डीच साले होय, एठा यीशु नी दिकुटे मंडीके, “इंज्के घाले कि इनी चाँदी गा चिक्खान जेगा फुटू डो जेगा जीमू होय?” दिकुनी मंडीके, “रोमी सम्राट कैसर।” 17यीशु नी दिकुटे मंडीके, “जो रोमी सम्राट कैसर गा होय डीचके जे जो परमेश्वर गा होय डीके परमेश्वर के जे।”

डबोला टे जीटाऊ गा बारेन प्रश्न

(मत्ती 22:23-33; लूका 20:27-40)

18मेटे सदूकी कुरकू गा अदा कुरकू यीशु गा मेरान हेन सदूकी कुरकू विश्वास बान दोडो कि कुरकू जो गोएन मिठाच जाटे जीटाएन होय। डाबोलटे दिकु यीशु गा मेरान हेन डो दियाटे कोम्बराके, 19“हे गुरु मूसानी चोखरा ग्रंथन आलेगा घाल्जी म्या कानून ओलके डा कि अगर जेकाभी ब्याह डाके पोट्टा गोएन टासो एठा बिनाकोण गा जपाए टेके आराटे गुजूवा होय।” मेटे डी कोरो डाईटेके विधवा जापाएटे ब्याह दडा होना एठा कोण पेपैदा होना जो दियागा डाईटे गा वारिश होय। #उत्प. 38:8; व्यवस्था. 25:5 20म्या टेमो आईय्या डाईकु डा सेबाईकु टे खाट मिठाच ब्याह डावे लेकिन बिनाकोण गा गोएन। 21दूसरा डाईटेनी डी विधवा टे ब्याह डावे लेकिन डीच भी बिनाकोण गा गोएन। इनिका बातो आफाई डाईकु गेल्ला एठा सेबाई आईय्या डाईकु गेल्ला डाएन। 22डी जपाएनी डी आईय्या डाईकु टे जेका घाल्जी म्या कोण के जनम बान जिडुका एठा अखिरीन डी जपाए भी गोएन। 23नका आलेके घाले, डी टेमो जब गोएन मिठाच जाटे जीटाएन डा, मेटे डीच जेगा जपाए आरुवा? आले इनी इनिघल्जी कोम्बराके डीचनी डी आईय्याकु टे ब्याह डावे डा। 24यीशु नी दिकुटे मंडीके, “आपे गलत होय चोयाकी आपे बान हाडाई कि पवित्र ग्रंथ चोच मेंबा आपे परमेश्वर गा शक्तीगा बारेन बान हाडाई। 25चोयाकी जब डीच गोएन मिठाजा टे जीटाऊवा, मेटे कुरकू ब्याह बान। डेनोगोका स्वर्गेन थंदळ मिंकू स्वर्गदूतकु रोंगो आरुवा। 26गोएन मिंकूटे जीटाऊ गा बारेन चोच आपेनी मूसा पुस्तक गेन डी भागो बान पडातिंज्दुका? जो भागो जुलू मिनी झाळीटे मूसा टे बातोवा होय। देटेन परमेश्वर मंडीवा होय इंज अब्राहम गा परमेश्वर एठा इसहाक गा परमेश्वर एठा याकूब गा परमेश्वर होय? 27जबकी परमेश्वर मंडीवा होय जो कुरकू गोएन होय, दिकु दियागा आराधना दडा लक्के होय मेटे दिकुके आए भी जीटाका थंदळ होना। आपेनी इनी विश्वास बान मेंटो म्या गलती डाके होय कि परमेश्वर गोएन मिंकूके जीवन गा घाल्जी ठुठूलबा होय।”

महान हुकूम

(मत्ती 22:34-40; लूका 10:25-28)

28मूसा गा नियम इथूमिठाच कु तलान म्याखोम नी हेन डो आजुम्के यीशु एठा सदूकी इकुका चोच बातो लक्के डा चिनाटे यीशु टे कोम्बराके। “परमेश्वर नी जोभी हुकूम जीके होय। डे तलाटे सेबाई टे कास हुकूम तुनी होय?” 29यीशु नी डीचके जवाब जीके, “सेबाई आज्ञा टे नी इनी मुख्या होय। हे इस्राएली कुरकू आजुमे! प्रभु आबुगा परमेश्वर का बस प्रभु होय। 30एठा आपे प्रभु आपना परमेश्वर टे आमगा पूरा मन टे, एठा आपना पूरा जानटे, एठा पूरा दिमाग टे, एठा आपना पूरा शक्तीटे प्यार डोकी। 31एठा दूसरा सेबाई कास हुकूम इनी होय। दुसराकूटेभी देटोका प्यार डोए देटोका आपना खुद टे प्यार दोडो।” 32मूसा गा नियम इथूमिठाच कुनी यीशु टे मंडीके, “हे गुरु ठाय सजाका होय आमनी सच्चो मंडीके कि परमेश्वर का म्याका परमेश्वर होय। एठा तुनिका दूसरा परमेश्वर बाऊ होय। #यशा. 45:18; व्यवस्था. 4:35 33प्रभु आपना परमेश्वर टे आमगा पूरा मन टे, एठा आपना पूरा जानटे, एठा पूरा दिमाग टे, एठा आपना पूरा शक्तीटे प्यार डोकी। एठा आपना मेराकुटे आपना रोंगो प्यार डोए, सेबाई बलिदान एठा भार पेपेळेचटे जदा महत्वपूर्ण होय।” #व्यवस्था. 6:4-5; लैव्य. 19:18; होशे. 6:6 34मेटे यीशु नी डोके कि डीचनी समझोटे जवाब जीके डीचके मंडीके, “अमा परमेश्वर गा राज्यन मुगा मेरान होय।” एठा जेकान का यीशु टे चोचकाभी कोकाम्बारा गा हिम्मत बान दडुका।

यीशु गा प्रश्न

(मत्ती 22:41-46; लूका 20:41-44)

35एनेगा बादोन यीशु नी यरूशलेम गा मंदिर गा दरोमेन खाबोर गघाल लठ्ठाका मंडीके, “मूसा गा नियम इथूमिठाच मंडीवा कि मसीह, राजा दाऊद गा कोण होय।” जब दिकु एनोगो मंडीवा होय मेटे डेगा चोच मतलब होय? 36चोयाकी जब राजा दाऊद पवित्र आत्मा गा शक्तीटे मंडीके, “प्रभु परमेश्वर नी इंजा प्रभु टे मंडीके, इंजगा धखुरी देळेन सुबाने जब टाएन कि इंज अमा दुश्मनकूके हरातिंज डाए बाने।” #भजन. 110:1 37“एटो टाएन राजा दाऊद नी भी मसीह के प्रभु मंडीटे जीमू मेटे डीच दाऊद कोण टोनोगो डाऊवा होय।” यीशु इथू आजुमटे म्या खाट घोंजा खुशी ममानातिंज लक्के डा।

यीशु गा व्दारा घालके

(मत्ती 23:1-36; लूका 20:45-47)

38यीशु नी हेजे गा इथू गेन दिकुके मंडीके, “मूसा गा नियम इथूमिठाचकुटे ध्यान टे थांदळे जो लाम्बा महंगा आंगी उरिके टे इखाटबा एठा हाटीन गेन कुरकू टे आदर गा सेंग्गोन नमस्कार सा पपासंदबा, 39डीच आराधना जगा गेन एठा मुख्या जागा गेन सेनेवा डो ऊँचा जगान सुबान पपासंदबा होय। 40दिकु धोकाटे जीटे विधवा जपाएकु गा डामा सैय्यावा होय। एठा दिकु कुरकू तलान खाट टाएन प्रार्थना दडावा होय ताकी कुरकू इनी सोचातिंजे कि दिकु अच्छा होय। जरुरी होय परमेश्वर दिकुके खाट सजा जेबा।”

विधवा गा दान

(लूका 21:1-4)

41एठा यीशु मंदिर गा भंडार गा सम्मान सुबानटे दोडो लक्के डा कि कुरकू मंदिर गा भंडार इनी रोंगो टोनोगो येंडावा होय। चोटोका डामा कुरकू नी घोनेच्का डामा येंडाके। 42एटोगेन म्या गिरबो विधवा हेन डो बरी तम्बा चिक्खा (सेबाई टे कामती भाव) डेगा भाव ठायका काम डा। 43मेटे यीशु नी हेजा चेलाकूके मेरान हाकोटे दिकुटे मांदिके, “इंज आपेटे सच्चो मंडीवा होय कि मंदिर गा भण्डारेन येंडा मिठाच कुटे इनी गिरबो विधवानी सेबाई टे खाट येंडाके होय। 44चोयाकी दिकु सेबाई कुरकू लकपति एठा दिकुनी डे तलाटे अदा का जीके डेगा जरुरत बाऊ। लेकिन इनी विधवानी गिरबो भी माका डीच सेबाईका जीके। जो दियागा मेरान बचातिंज्के डा। एटे टाएन कि डीच भी जो दियेन जीटा थंदळ गा घाल्जी होना डा।”

Currently Selected:

मरकुस 12: GOKNT

ማድመቅ

Copy