मरकुस 1

यूहना बपतिस्मा जिऊमिठाच गा खाबोर

(मत्ती 3:1-12; लूका 3:1-18; यूहन्ना 1:19-28)

1परमेश्वर गा कोण यीशु मसीह गा अच्छा खाबोर गा सुरुवात। 2डेनोगोका यशायाह जो परमेश्वर गा कोनेटे मंडीमिठाच गा पुस्ताक गेन ओल्के होय, “डोगे इंज इंजागा खाबोर जिऊमिठाचके कुलेच्बा जो अमा घल्जी कोरा सुटेवा।” 3“सुनसान जगान म्या खाबोर जिऊमिठाच यूहन्ना गा आवाज आजुमू लक्के होय, प्रभु गा हेजे गा घल्जी कोरा तैयारे एठा दिया घल्जी सळक्को सीधाए मेना डे लिंजेन डीच सेंदरावा होय।” 4एठा डीका खाबोर यूहन्ना बपतिस्मा जिऊमिठाच हेन, एठा इनी खाबोर गघाल डा, “आपना-आपना पापो के आराटे परमेश्वर कोनेन मन बबादला एठा बपतिस्मा सेगे मेटे परमेश्वर आपेके आपेगा सेबाई पापो टे मापो जेबा।” 5यहूदिया म्या जिल्हा गा, एठा यरूशलेम शहर गा घोनेच थंदळ कुरकू यूहन्ना गा खाबोर आजोम हेन, एठा इकुका पापो काबुलटे यरदन गडाननी दियाटे बपतिस्मा सावे। 6म्याखोम जो परमेश्वर कोंटे खाबोर गघाल मिठाच यूहन्ना बपतिस्मा जिऊमिठाच गा आंगी ऊँटो गा हुफटे आरुके डा। एठा देटेन हेजे मयांग गेन कतळे टे आरुके म्या पट्टा टोलके डा, एठा देटेन तोतोरकु एठा निलीकु डा जोजोम डा। 7जब यूहन्ना बपतिस्मा जिऊमिठाच घालके डा डीचनी कुरकू के मंडीके डा, “म्या कोरो जो इंजाटे चोटोका खाट महान होय, जलदिका हेजेवा होय, इंज्नी इनी लायको भी बाने होय, कि दियागा भाग्य गा रुपोन होम्बाटे दियागा बुट्टा कोखला लयको बाने।” 8इंज्नी आपेके डा टे बपतिस्मा जीके होय, पेनो देडेन आपेके पवित्र आत्मा टे, बपतिस्मा जेबा।

यीशु गा बपतिस्मा

(मत्ती 3:13-4:11; लूका 3:21-22; 4:1-13)

9डी दिनेन, यीशु नी गलील जिल्हा गा नासरत पुराटे हेन डो, यरदन गडान यूहन्ना टे बपतिस्मा सावे। 10एठा मेटे देडेन डा टे ओलेट जेडो बल्लान ओट्जेन, एठा तुरुटो डीचनी बदळा खुल्ला डोके एठा परमेश्वर गा आत्मा के कबूत्तर गा रुपोन आपना मठान आगुरुटे डोकेनेच। 11एठा बदळा कोनेटे आवाज हेन, आम इंजगा अच्छा कोण होय, अमाटे इंज खुशोके होय।

यीशु गा मुके डा

12यीशु गा बपतिस्मा सगा बादोन पवित्र आत्मा नी तुरुटो डीचके सुनसान जगान कुल्केनेच। 13सुनसान जगान नी चालीसो दिन एठा चालीसो रातो टाएन, मेटे शैतान नी डीचके अंदाजोएच लक्के डा। एठा देटेन जानवरकु गेलटा पेळाके डा, एठा स्वर्गदूत दियागा ध्यान दोडो गा वोजीटे सेवा दडा लज्जे।

गलीलेन यीशु गा खाबोर

(मत्ती 4:12-17; लूका 4:14-15)

14थोळा दिन गा बादोन जब यूहन्ना जेलेन येंडाकेनेज गा, एनेगा बादोन यीशु नी गलील जिल्हान ओले एठा कुरकू के परमेश्वर गा राज्य गा बारेन अच्छा खाबोर जिऊ डा। 15यीशु नी मंडीके, “परमेश्वर गा कालाम्के टेमो पुराएन होय, एठा परमेश्वर गा राज्य मेरान हेन होय। इनिघल्जी आपेगा पापो टे मन बदलाए एठा आपे अच्छा खाबोर लिंजेन विश्वास डोए।”

उफुन भुई के हाकोकेकु

(मत्ती 4:18-22; लूका 5:1-11)

16म्या दिन मेटे यीशु गलील जिल्हा गा समुद्र गा धुरा-धुराटे चेल्के डा, मेटे डीचनी शमौन एठा दियागा सनी डाईटे अन्द्रियास के समुद्र गेन जली येंडाटे डोकेनेच। चोयाकी दिकु भूईकु डा। 17यीशु नी दिकुके मंडीके, “इंजा टाऊटे हेजे, आए टाएन आपे काकूकु उठा डा।” पेनो नका टे इंज आपेके इथूकोम्बा कि कुरकू के इंजा मेरान चेलाकू टोनोंगो सा होना। 18दिकु तुरुटो काकू उठामिंकू जली आराटे यीशु गा चेलाकिंज आरोएन। 19जब यीशु धुरा-धुराटे सेंद्रा लठ्ठाका थोळासा एठा सम्मान ओले, मेटे डीचनी एठा बरी डाईटे ताकिंज के डोकेकिंज। दिकिंज गा जीमू याकूब एठा यूहन्ना डा। दिकु जब्दी कोंटे डा। दिकुके डोंगान जली सुटिटे डोकेनेच। 20डेनोगोका दिकुके यीशु नी डिच्के डोकेनेच, दिकुके मंडीके, इंजागा सेंग्गोन हेजे एठा इंजागा चेला आरोए। एठा दिकुनी हेजा जब्दी बाटे एठा कामय दडामिंकू के डोंगान आराटे यीशु गा चेला आरु घाल्जी दियागा टाऊटे ओले।

भूतो टे कोरो के आराकेनेच

(लूका 4:31-37)

21यीशु एठा दियागा चेलाकू कफरनहूम पुरान हेन। जब #1:21 जीटायु प्रभु गा डूगु एठा स्वर्ग गेन सेने 16:9-20परमेश्वर गा चोखरा दिन हेन, मेटे यीशु आराधना जगा गेन ओलेडो एठा इथूलक्के। 22कुरकू दियागा शिक्षानौर टे बिचारजे। चोयाकी मूसा गा नियम इथूमिठाच गुरजी गा रोंगो बाऊ पेनो हाकगेल्ला गा सेंग्गोन शिक्षानौर जिऊ डा। 23जब यीशु इथूका लक्के डा, अचानक आराधना जगा नी म्या कोरो डा, दियेन भूतोकु डा। 24डीचनी कल्लटे मंडीके, “हे नासरत पुरान थांदळ मिठाच यीशु, आलेन अमाटे चोच कामय? चोच आम आलेके ननाशो घांजी हेन? इंज आमके अच्छा टे हडाई-कि अमा जे होय? अमा जीटा परमेश्वर गा चोखरा कोंटे होय जो परमेश्वर कोनेटे हेन होय।” 25यीशु नी भूतो मुके कोरो के कल्लाटे मंडीके, “कायोमे एठा डी कोरो टे वोटजू।” 26मेटे भूतो डी कोरो के इटान बोचोकेनेच एठा कोळेच्टेका, चिल्लातिंजटे दियाटे वोटजे। 27मेटे आराधना जगान नी घोनेच कुरकू अचाम्बोएन डो एक-मेग टे कोकाम्बारा लज्जे, “येटेन घोनेच एकदम अलग्गो शिक्षा होय, आले चोलाकाभी एटो हाकगेल्ला इथूलक्के लठ्ठाका बान आजुमडूका।” देडेन हाकगेल्ला भी भूतोकुके भी हुकूम जेबा होय, एठा भूतो भी दियागा हुकूम आजुम्बा होय। 28तुरुटो का कुरकू दुसराकुके यीशु गा वोजीटे डाके मिनी अचाम्बो कामय बारेन गघाल लज्जे। एठा गलील जिल्हा गा आसो-पासोन थांदळमिंकू कुरकून यीशु गा खाबोर गा बारेन मालूम्जे।

बिमारी के सासजा

(मत्ती 8:14-17; लूका 4:38-41)

29एनेगा बादोन यीशु एठा दियागा चेलाकू आराधना जगा टे ओले, शमौन एठा अन्द्रियास गा उरान ओले। एठा याकूब एठा यूहन्ना दिकुगा सेंग्गोन डा। 30डी टेमो शमौन गा कणकर राँवा डा एठा डीच राँवा गा वोजीटे बिंदीलेंका गिटीच्के डा। जब यीशु उरान आदिरजे, मेटे चेलाकू हेन डो यीशु के घाल्के शमौन गा कणकर टे राँवा लक्के डा। 31यीशु नी दियागा टी उठाटे डीचके बिंदिल टे बिट घाल्जी मदत डाके, एठा डीका टेमोन राँवा आगोरोएन। मेटे शमौन गा कणकर टे नी सेबाईकु घल्जी आटा डा जिऊ वोजीटे सेवा डाके। 32डी दिन सिंगुरूप, जब कि पवित्र#1:32 चोखरा दिन गा अर्थ गा मतलब मूसा नियम रोंगो शनिवार दिन आराम्बो गा दिन शुक्रवार गोमेच नामुरजे गा बदोन शनिवार गोमेच नामुरजे टाएन डाऊवा होय। यहूदी कुरकून चोखरा दिन गा कामय बाने डा, म्या बिमार कोरो के टूलटे सा दिकु घाल्जी म्या कामय डा। इनिघल्जी दिकुनी बिमार कुरकू के यीशु गा मेरान ससा घाल्जी गोमेच नामुरु गा इतजार डाके, म्हाणजे चोखरा दिन बितातिंजू दिन ओले डा मेटे डी पूरा गा। मेटे कुरकू घोनेचकु का बेमार जे एठा दिकु डेन भूतोकु डा यीशु गा मेरान साले। 33कफरनहूम पूरा गा कुरकू खाट घोंजा शमौन एठा आंद्रियास गा उरा सम्मान जमाएन। 34मेटे यीशु नी डी सेबाई कुरकू के जो अलग्गो-अलग्गो रोंगो बिमारी टे कासु डा, दिकुके साजाकेकु, एठा भूतोकुके कोलाकेकु, एठा भूतोके हेजा सम्मान मंडी दाडुका, चोयाकी भूतोकुन मालूम डा कि यीशु मसीह परमेश्वर गा कोन्टे होय।

एकलान यीशु मसीह गा प्रार्थना दडा

(लूका 4:42-44)

35आंगुटे ठायका उजालऊ गा पेला, मेटे यीशु बिटजे डो म्या येनोगो जगान देटेन डीच एकलान थंदळ टे प्रार्थना दडा लज्जे। 36जब शमौन डो एठा दियागा सोपतिकुन इनी मालूम्जेकी डी जगा टे यीशु ओले होय, मेटे दिकु डिच्के घागटा लज्जे। 37जब दिकुनी यीशु घाटाकेनेच, मेटे शमौन एठा सोपतीकु डीचके मंडीके “घोनेच कुरकू आमके घागटा लक्के डा।” 38यीशु नी दिकुके मंडीके, “हेजे आबु डी गाँवेन डो जो आसो पासोन पुरान बो, म्हणजे इंज कुरकू तालन भी परमेश्वर गा खाबोर गघाल होना। चोयाकी इंज इनीघाल्जी दुनियान हेन होय।” 39मेटे यीशु एठा दियागा चेलाकू गलील जिल्हा गा घोनेच पुरान ओले एठा दिकुगा आराधना जगान परमेश्वर गा खाबोर जिऊ लक्के डा, एठा भूतोकुके कोखाला डा।

यीशु नी कोढया के ससाजा

(मत्ती 8:1-4; लूका 5:12-16)

40म्या दिन म्या कोरो यीशु गा मेरान हेन डी कोरो कोळ्या गा बिमारी डा, डी कोरो यीशु मसीह टे बिनती डावे डो मंडीके दियागा सम्मान टोपेरे तेकाटे मंडीके, “इंजेन मालूम होय कि अमा मेरान इंज्के ससाजा गा शक्ती टाकु होय। अगर आम इंजा मदत दडा टासो डायेबा होय।” 41यीशु नी दिया लिंजेन आस्वान हेन डो। हेजा टी डी कोरो लिजेन डोके जो कोळया डा, एठा डिच्के मंडीके, “आम सजायु।” 42एठा डीका टेमो डी कोरो पुराका साजाएन। 43-44मेटे यीशु नी डी कोरो हुशार टे मंडीके, “जेकाकेका बाकी गघाल कि इंज्नी आमके सजाकेमी, आराधना गा जगान सेने एठा परमेश्वर गा याजक गा घाले कि सजाएन होय। एठा परमेश्वर गा घल्जी डी बलिदान के पेळेजे डेगा बारेन मूसानी घोनेच टेमो पेला दडा घाल्के। ताकी परमेश्वर गा याजक इनी घालेवाकी कि अमा सपा मेंबाकी एठा इनिज सेबाई कुरकू गा घांजी गवाही मेंबाकी कि अमा साजाएन।” 45पेनो डी कोरो डी जगा टे ओलेडो एठा घोनेच कुरकू के घाल्के कि यीशु नी डीचके सजाकेनेच। इनी कारण टे यीशु सपा-सपा पुरान बान सेंडुका, पेनो यीशु शहर टे बाल्लन सुनसान जगान थंदळके। एठाभी हार जगा टे कुरकू दिया मेरान हेजे डा।

Currently Selected:

मरकुस 1: GOKNT

ማድመቅ

Copy