Malikɔ 7
7
Maeyechi me bando be kaɛ
(Mat 15:1-9)
1Bafalisayɔ ne bamɔ baeyechi be Salia batokea Yɛlusalɛma na kukumbakana kombaa kwa Yɛsu. 2Abɔ na kɔmɔa bamɔ ko baeyechwa bakɛ bae mo kolya ne manja me ikɔya, nɛ kɔɔcha itɛ ndebaɔya manja bɔtɔɔcha asili yee lini lyabɔ.
3Baɔchaya bobo kɔmɔa Bafalisayɔ ne bakinɛ Bayula basɛ baanga kɔnyɛmya bikete bye baisibɔ mokoo. Bia bikete bitokandea mondo kolya kotaasi kɔɔya manja botowaena.#7:3 Yɔɔla Luk 11:38. 4Kabee aɔtɔka abɔ ku kituka ndibingalya kombaa kwe kwisokocha. Babɛchaya mo kɔnyɛmya ne bikinɛ byabua, bwe kɔɔya bibacha, ne tusiki ne mbachi che mitali.#7:4 atɔɔtɔkaya abɔ ku kituka Ikinɛ njea yee kɔɔcha ndebabɛchaya mo kolya keemo ketotoka ku kituka kombaa kwe kɔkɛɔya.
5Ko bobo baa Bafalisayɔ na baa baeyechi be Salia na komobocha Yɛsu: «Ko booni baeyechwa bao abɔ baatɔnyɛmya bikete bye baisito mokoo? Kɔmɔa bae mo kolya ne manja me ikɔya!» 6Yɛsu na kobasaolea: «Ee banu bando be tobee tobee! Lyɛmɔ lya Kakua Isaya waiambea kɔɔcha bye kiinɛkinɛ kombanga yiinu akunya awɛ:
‹Kakua ɔsɔɔcha:
Bando baba, kɔ mɛɔmɔ bokata ndombeka abɔ,
alakini metema yaabɔ ne njɔɔ naanɛ!
7Kɔmɔa maiyayeo mabɔ maanga ne me bokata!
Maeyechi mabɔ matotoka ne ku bikete bye bando.›»#7:6-7 Yɔɔla Isa 29:13.
8Yɛsu na koseboa kobasaolea: «Baanu, mwaanga kɔlɛkɛa salia ya Kakua, kokoyea bikete bye bando!»
9Kabee na koseboa kobasaolea: «Kiinɛkinɛ motocheba kwiyambela kɔlɛkɛa Salia ya Kakua ne kɔnyɛmya bikete bye baisinu mokoo. 10Mbaya motocheba bwaɔcha isao na inao.› Kabee na kɔɔcha itɛ: ‹Ɔsɔtɔnda isakɛ ɔbɛɛ inakɛ otowaena kuchiiwa.›#7:10 Yɔɔla Kot 20:12; 21:17; Law 20:9; Koe 5:16. 11Alakini baanu mwaanga kɔɔcha itɛ mondo otowaena kosaolea isakɛ ɔbɛɛ inakɛ: ‹Bingakokwasa mee nabyo bie Kɔlɛbani.› Ne kɔɔcha biusia koochiwa kwa Kakua. 12Ko boa, mo koketa boa ne botokandea mondo ndakwasaya isakɛ ɔbɛɛ inakɛ. 13Bia bikete byabasiela baisinu mokoo, kende moe mukubieyecha ne bisobaketa mwikuule kabee ne makomo ma Kakua. Bwakaɛ moe mo koketa makomo makinɛ mabua matoeyana na mama.»
Biemo byaanga kulisa mondo ikɔya
(Mat 15:10-20)
14Kusia, Yɛsu na kwitana kabee ndongo yee bando, na kobasaolea: «Banu basɛ munungweeche bwaachi ne mochebe makomo matoenga mee kobasaolea. 15Bitwingea mo mondo biisi bitomoketa koba mondo wa bea, alakini bitoola monda mwakɛ. [16Oe ne mawɛ me kuungwa, uungwe!»]#7:16 Boo bɔlɔlɛɔ bwe 16 ndebwakunyiwa ne bamɔchi bakunyi be kombaa.
17Kɔmɔngɔ Yɛsu na kɔlɛkɛchana ne ndongo. Aingea awɛ mo ndabo, baeyechwa bakɛ na komobocha bitɔɔcha kɛɔ kisimo. 18Awɛ na kobasaolea: «Banu muunachiboewa lokani? Inde mootocheba itɛ kɛsɛ kitwingia monda mwe mondo kiisi ne ketomoketa koba wa bea! 19Kɔmɔa bia biemo bitoingia mo motema waakɛ, alakini bitwingea ne mwikundu. Kɔmɔngɔ na bisoola ne koya kwichinga.» Mɔ kɔɔcha bɔbɔ, Yɛsu wakonda kɔɔcha itɛ, biewa biisɛ biitowaena kolewa.
20Yɛsu na koseboa kabee kɔɔcha: «Bitoketa mondo koba wa bea, bie ne bitoolaya mo motema waakɛ. 21Kɔmɔa, mo motema we mondo ne motoola lokani lwa bea lotoketa mondo kwingea mwi isɛmi, ne mu luubo, ne mu kuchiana, 22ne mu bukɔni, ne mo ketama kyabea, koketea bakinɛ bwabea, nɛ kɔɔcha manu, ne koongaya bakinɛ, ne koongwa ne mesako ya bea, ne kekee, nɛ kɔtɔnda bakinɛ, ne muuma, ne bochenjebee. 23Boo bwabea bɔɔsɛ botoola ne mo motema we mondo, ne botoketa mondo koba wa bea.»
Iekekeo lye mwamokachi Musulia
(Mat 15:21-28)
24Kɔmɔngɔ kwa bɔbɔ Yɛsu na koola aɔ na koya mbanga yee mɔsɛngɛ mo mosomba we Tilɔ. Awɛ na kwingea mɔ ɛmɔ ndabo, alakini ndakonde bando bachebe itɛ oe monda. ɔbɛɛ bɔbɔ, ndibyaɔsɔka kwakɛ kwisama. 25A kea kyanya, ɔmɔ mwamokachi na kuungwa boombe bwa Yɛsu. Katombe ka olya mwamokachi kabɛchaya kaubundeka ne isombo. Akaɛ alya, awɛ na koba kwaikosoe mo meende ya Yɛsu. 26Olya mwamokachi ndabɛchaya wɛ kɛbɛɔ kye Bayula, alakini wabɛchaya Mukiliki, mondo we kalya ke Fuliniki, mɔ mɔsɛngɛ we Sulia. Awɛ na kɔɛngɛa Yɛsu ulikite isombo lyaba monda we mwaana waakɛ.
27Alakini Yɛsu na komosaolea: «Talɛkɛa baana bataemboke! Kɔmɔa, biisi bwaachi koenda byekolya bye baana na kɔɛcha imbwa.» 28Olya mwamokachi itɛ: «Mwaame, biɛ bɔbɔ. Alakini, naa ne imbwa chitolya mabumbu matokecha baana kotokea kɔ kɔmɛmɛsa.» 29Yɛsu na komosaolea: «Ku kuungwa bitɔɔcha awɛ, ɔtɔka kyao? Lea isombo liusia koola mu katombe kao.»
30Aolea olya mwamokachi kwakɛ, na kosanga mwaana waakɛ usiuɔnɔna byalale mo kyandwa, na lea isombo lesomoola.
Yɛsu osoolola kauma ke bukio
31Kɔmɔngɔ kwa bɔbɔ, Yɛsu na koola mo olya mɔsɛngɛ mwabea mosomba we Tilɔ. Na koeta mo kalya kɛ Silɔna, ne koya mbanga yee looche lwe Kalilaya, mɔ mɔsɛngɛ we Tolya Ikumi. 32Abɔ na komobea ne mondo ɔmɔ wabɛchaya ne bukio ne itɛtuma. Abɔ na kwiyaya kwa Yɛsu omobekee manja. 33Kɔ bɔbɔ Yɛsu na komotosa mo ndongo yee bando na kumwisɔkya. Kɔmɔngɔ na kɔmɔtɛcha mesani mo matwe, kutua sɔki mo manja na kɔmɔkɔbɔcha loleme. 34Awɛ na koelalaa mwiyoo, na komokandokea: «Efata!» nɛ kɔɔcha «Chiboka!» 35Akaɛ alya, matwe ma olya mondo na kuchiboka. Ne loleme lwakɛ, nalo na kuchiboka, na kobangoa kɔchɔbɔa bwaachi.
36Yɛsu na kabakandea bando babeaya mɔ kɔɔcha lee ilɔngɔ. Alakini, awɛ mo kobakandea, abɔ na kututumuka kɔɛnja lea ilɔngɔ kɔsɛ. 37Bando na kokanakana, na kobangoa kɔɔcha: «Bia biisɛ bie Yɛsu mo koketa, bie byaachi! Ɔbɛɛ be bukio otobaketa baongwe ne tuuma, ɔsɔtɔɔchɛkya.»
Currently Selected:
Malikɔ 7: ZMB
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
©2022 Seed Company in coordination with Forum Communautaire des Traducteurs de la Bible et Alphabétisation
