Luke 7
7
Sése abɛlese muséli a ivonde cha bagɔdi
1Vayulava Sése àmane yambele na piti a baate, ndɛ nàningele gutsɔ musɛnge a Kapɛrenawume. 2Gutsɔ musɛnge muɛne, niguàbade na ivonde cha bagɔdi wa muchi Rɔme. Ivonde cha bagɔdi muɛne nàbade na muséli a ndɛ wu ndɛ tɔndenge gualotele. Muséli muɛne nàbade na mabéde mabɛle na luku. 3Ivonde muɛne àyoge maambe ma baate bàyambelenge mu mbate a Sése, nàtchindege bivonde bia ba chife gulidi Sése mu ndé ndɛ yade gu bɛlese muséli a ndɛ. 4Bivonde bia bachife bisote va Sése àbade, nibiàbɔnde ndɛ bo: «Kɔkɔle a wɛ, mutu muɛne alidi na maambe mamabuɛ. Sade tchambe le ndɛ fule wɛ. 5Ndɛ atɔnde tsɛnge a bése. Nzɔ yi bése labɔnde Nzɛmbi gutsɔ yɔ, ndɛ niwàtome baate bɛndi mu tonge yɔ.» 6Va Sése àbade kabɛle natɔde gu nzɔ ivonde cha bagɔdi bone a bivonde bia bachife, ivonde cha bagɔdi muɛne nàbàtchindege bambɛgi bɛndi gu lɛle Sése ti: «Kumu yarɔkese niute a wɛ mu yade gu nzɔ mɛ. Mɛ salidi wuwayɛbene va busu bua wɛ vɛ.» 7Nimulɔ, mɛ muɛne mɛ sabégi bungudi buayade gulidi wɛ vɛ. Lɛle lebige ndile lemochi le muséli a mɛ akibɛlege. 8Mɛ gu tchine butome bia bivonde biɛme mɛ lidi. Mɛ nɛme na bagɔdi ba mɛ tome. Mɛ lɛle mumochi mé yɛnde, akayɛnde. Mɛ lɛle wone mé yade, akayade. Mɛ lɛle muséli a mɛ mé sade bunebu, akasade. 9Sése àyoge maambe ma ivonde cha bagɔdi àyambele, nàgémbe. Sése àgɛlese mise gulidi piti a baate yiyàdukenge ndɛ, nàlɛle bɔ ndé: «Mumbuli mɛ lɛle béne mé, gu tsɛnge a Ichirayɛle yotchi, mɛ sàmàbakese mutu wulidi na lebiɔge ngane a la ivonde cha bagɔdi chinechi vɛ.» 10Bambɛgi ba ivonde cha bagɔdi ba ndɛ tchindege bàgabege, nibàbakese muséli a ndɛ amabɛlege.
Sése asole muane mukuili gutsɔ leku
11Vayulavane, Sése bone baate bɛndi na piti a baate nibàyɛnde gu musɛnge a Nayine. 12Bàsote va tsɔmbe a bole bubatɛde Nayine, nibàbuane na kɔngi a baate yàyɛndenge gu kunde mvumbi. Muane muɛne lekike àbade. Nguɛndi mukuili. 13Sése àkɛngese mukuili muɛne, àmɔne ndɛ tinge, nàlɛle ndɛ ndé: «Niage léle.» 14Sése àkukule, nàbɛmbe lekiéchi. Baate bàbàbɛgenge lekiéchi nibàtɛmene. Sése nàlɛle mufudu muɛne ndé: «A mufudu wunewu, soge.» 15Mvumbi àsoge, àtsàgele, nàyambele. Avakaniva Sése àgabese mufudu muɛne gulidi nguɛndi. 16Bɔɔme bukuate baate botchi, bàgémbe, bɔ nibàkakese Nzɛmbi bo: «Mutochi a mabige ma Nzɛmbi wa mbuli àsuti va pfuɛchi a bése béne. Nzɛmbi ayidi gu yipɔtele itsuku chɛndi.» 17Ndume a Sése niyàdunge va kɛse a Sudé na mu mala ma va kɛse yéne yotchi.
Sa Mbatise atchindege baate bɛndi gu mboge a Sése
18Va Sa àbade gu tsugu, baate bɛndi nibàyɛnde gu lɛle ndɛ maambe motchi ma Sése àsadenge. Sa àtɛde baate bɔli vatsɔ baate bɛndi, 19nàtchindege bɔ gu mboge a Sése gu fule ndɛ ti: «Wɛ ni mutu wu Nzɛmbi àsɔle wu bése latale, voki mukime ákábáyade?» 20Baate muɛne bàsote gu mboge a Sése, nibàlɛle ndɛ bo: «Sa wuwàtubenge baate mu maambe niwutchindigi bése gu mboge a wɛ gu fule wɛ ti, wɛ ni Mupotili wu bése latale, voki mukime ákábáyade?» 21Vakɛtiavane, Sése nàtɛmese bikate. Nàfunze matɛnge màmàbade mapapene baate. Nàtɛndele bapɛpidi mise. 22Sése nàkale baate ba Sa ndé: «Yɛndani, béne leyole Sa musame a maambe ma béne leyugi na béne lemoni. Bapɛpidi kamɔne. Bikate katɛmene. Baate bababɛle makédi kabɛlege. Bakutchi kayoge. Bamvumbi kasoge. Tsaange yiyibuɛ ka gulidi baate ba makake makime batɔse.» 23Bubuɛ gulidi mutu wuwabise tamene lebiɔge lɛndi mu mɛ. 24Va baate ba Sa bàgabege, Sése nàyambele maambe ma mu niute a Sa, gulidi piti a baate yiyàbade vane ndé: «Gu itchige cha legɛngi, béne na làyɛnde gu mɔne? Béne mutu wu levoge labéte ngule na ngule làyɛnde gu mɔne?» 25Wu béne làyɛnde gu mɔne gu itchige cha legɛngi naa? Mutu wuwaluate mangoyi mama gɔbe? Tɔ baate babaluate mangoyi mama gɔbe, bɔ ngɛ gutsɔ manzɔ ma bakumu ba matsɛnge batsagele. 26Béne na làyɛnde gu mɔne gu itchige cha legɛngi? Mubigi a mabige ma Nzɛmbi? Ɛɛ. Mumbuli mɛ lɛle béne mé: «Ndɛ lutili kiti mubigi a mabige ma Nzɛmbi.» 27Tɔ Sa muɛne niwubàlɛle gutsɔ mabige ma Nzɛmbi bo: Nzɛmbi ndé: «Mɛ nitchindege tome a mɛ gu busu bua wɛ gu vange wɛ ndjile.» 28Mumbuli mɛ lɛle béne mé vatsɔ baate botchi ba bakaase bàbote, gusalidi na mutu wu walotele Sa vɛ. Sabone mutu wuwachinge Buyumune bua Nzɛmbi ngane a muane a ngɛbe alutili Sa. 29Baate botchi bàbàyogenge maambe ma Sa àyambelenge namoni a babongi ba mapaga, nibàchilele bo: «Nzɛmbi ka mumbuli alidi wuwayɛbene nachinge bo Sa atube bɔ mu maambe.» 30Tɔ baate ba lebuli la bafarichi na basupili ba mangidi ma Nzɛmbi, nibàbisenge maambe ma Nzɛmbi àtɔndenge sadele bɔ, na bɔ Sa àtube bɔ mu maambe. 31Sése nàlɛle bɔ ndé: «Mɛ baate ba mvuɛgi ka nabane mɛ fuanese?» Bɔ kabana bafuane? 32Mɛ bɔ na baane ba bangɛbe babatambe va itchige cha mukungii mɛ fuanese, babatɛdene pfuɛchi abɔ muɛne na bɔ muɛne nalɛle bo: «Va bése lechigi ndunge, béne lesakini vɛ. Va bése leyimbi dimbe la mvumbi, béne lesalili vɛ.»
33Sa àyade, ndɛ biéle bi baate botchi batchade tchade vɛ. Ndɛ malame niɔde vɛ. Béne nilalɛle ndɛ ti: «Ndɛ lɛdi.» 34Tɔ mɛ Wuwàbɔnge ndjime a baate mɛ yade, mɛ tchade na niɔde, béne lekabalɛle ti: «Ndɛ na mundibili atchade na nzungi a niɔde malame. Ndɛ mbɛgi a babongi ba mapaga na baate bangua bubi bua maambe.» 35Tɔ yabani ti buyédi bua Nzɛmbi na baate babachilele maambe mɛndi bulidi.
Sése bone ivɛchi cha mukaase
36Letsuge lemochi, mutu wa lebuli la bafarichi wubàtɛdenge Chime nàtɛde Sése gu tchade. Sése àningele gu nzɔ mutu muɛne, bɔ nibàtchade. 37Mukaase wa ivɛchi wuwàbade gu musɛnge muɛne, àyoge ndé Sése gu mboge a Chime atchade, nàyɛnde gu bakese ndɛ. Ndɛ nàtsuale muyɔmbe gutsɔ tsɛdi yibàpake na lemani lebàtɛde Alebatre. 38Mukaase muɛne àkukule va Sése àbade, àsome mabɔnge va mbise a Sése, nàléle. Matsaange mɛndi màbɔlese matɛmbi ma Sése, àgɔne mɔ na nange a ndɛ, àdukuge muniɔ ndɛ mu matɛmbi ma Sése, nàyitele muyɔmbe va yulu amɔ.
39Va mutu wa lebuli la bafarichi wuwàtɛde Sése gu tchade àmɔne tchambe muɛne, nàlɛle gutsɔ mutéme a ndɛ ndé: «Lebagele lineli mbégi mubigi a maambe alidi, mbégi amayabe ndé mukaase wuwabɛmbe ndɛ wunewu mukaase ngua maambe mamabi.» 40Avanekaniva va Sése àkale Chime ndé: «A Chime, mɛ na tchambe lafule wɛ.» Chime nàkale ndɛ ndé: «A Mulongichi yambele.» 41Sése nàlɛle Chime ndé: «Mutu nàsɔmbese baate bɔli badɔle. Gulidi mumochi ndɛ nàsɔmbe mululi mumochi na makumi masamene ma mitochini mia badɔle. Awone ndɛ nàsɔmbe makumi mɔli ma mitochini mia badɔle na mitochini misamene. 42Tɔ baate muɛne bàsabage matsɔnge ma gabese badɔle muɛne vɛ. Mutu wuwàsɔmbichi baate muɛne badɔle nàtamene. Vatsɔ baate muɛne babɔli, wuwàlotele mɔne mutu wuwàsɔmbese bɔ badɔle bubuɛ kawuni?» 43Chime nàkale Sése ndé: «Mɛ tase mé mutu wuwàbade na tsombi a mbuli.» Sése nàkale ndɛ ndé: «Wɛ buédi wɛ yégili.»
44Avane Sése àgɛlese mise gulidi mukaase, nàlɛle Chime ndé: «A Chime, wɛ mɔne mukaase wunewu? Va mɛ ningili gu nzɔ wɛ, wɛ savédi mɛ maambe ma tsoke matɛmbi vɛ. Tɔ ndɛ atsuki mɛ matɛmbi na matsaange mɛndi. Nagoni mɛ mɔ na nange a ndɛ. 45Wɛ sasɛmbini nɛme va mɛ ningili gu nzɔ wɛ vɛ. Tɔ mukaase wunewu nachi ndɛ ningili gu nzɔ wɛ, ndɛ saroki na dukuge muniɔ ndɛ mu matɛmbi mɛmɛ vɛ. 46Wɛ sayitili mɛdi va yulu mutsɔ mɛ vɛ. Tɔ ndɛ ayitili muyɔmbe va yulu matɛmbi mɛmɛ. 47Nimulɔ mɛ lɛle wɛ mé, mu ndɛ muéchi letɔnde lɛndi la mbuli mu mɛ, maambe mɛndi motchi mamabi ma ndɛ chidingi, bamachindele. Wubachindele maambe mamabi pése, letɔnde lɛndi gulidi wawachindele ndɛ mɔ ndile pése.» 48Sése nàlɛle mukaase muɛne ndé: «Maambe motchi mamabi ma wɛ chidingi, mɛ chindili wɛ mɔ.»
49Baate bàbàtchadenge na Sése gu mboge a Chime, nibàyambele pfuɛchi abɔ muɛne na bɔ muɛne bo: «A wunewu mutu wuwachindele baate maambe mamabi guni amate?» 50Tɔ Sése nàlɛle mukaase muɛne ndé: «Wɛ mafuade moyi mu lebiɔge le wɛ buli mu mɛ. Pɔle yibade na wɛ.»
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES
