Luk 23
23
Mbə́ num Yeso ŋu ifigi paled
(Mat 27.1, 2, 11-14; Mak 15.1-5; Jon 18.28-38)
1Unoŋ ba wu ujum noʼ atey num Yeso ŋu abú Paled, 2Mbə́ pey awu yi zi usaʼa atəw ma ighayn kwi, “Mba zən wa ŋunə umə bure inja abey ighayn kwi ka ba mə naʼa ma ukab abú ufon kyayn Roman, u yə ghayn kwi uŋwən amə wa Nwiye zoʼo anigə uŋwən amə ufon.”#23.2 Ufon kyayn Roman amə Kayisa.
3Paled zəw ney ibiri abú Yeso kwi, “Ngwə mə ufon abú ba Jû?” Yeso ywiri kwi, “Amə nigə ngwə ghayn.”
4Paled ghayn abú ba kyayn ambəŋ Nwiye foro abú unóŋ ba ŋunə yə mə́ awu kwi, “Cha a zən aŋu anó iboŋ moʼ wa ŋunə u aghəy.”
5Mbə́ mə́ bə ghayn akə ikay kwi, “u yə yeŋ ungɨŋ ubey Judeya ujum yə beŋe utəw ba akə ukudu unó ŋunə umə itey. Wə ti a Galeli u ŋunə usi yeŋ zaʼa pey akəŋ.”
Mbə́ num Yeso iŋú ifigi Herod
6Amaʼazənə Paled zəw anó zəŋ u biri kwi, “Anom uŋu amə wa Galeli?” 7Amaʼazənə paled zəw kwi Yeso du aba ambayn zənə amə Herod mə tumə, yə cha Yeso abú Herod. Herod mə Yerusanem maʼa wu. 8Herod mə wuʼe ma azəd Amaʼazənə yə zən Yeso damugə yə si zəw anó da Yeso anigə yə mə bə kaba inji kwi u aghəy ayere anó moʼ u zən. 9Herod biri unó nanaʼ abú uŋwən anigə cha yə di ywiri ma kaba moʼ. 10Ba kyayn ambəŋ Nwiye nə ba mbənə mbə́ mə́ ataʼa ba akə unoʼo du zaʼa imbey izi usaʼa atəw ma akə ikay. 11Herod nə usogwi ma mə tébe Yeso ibaʼara uŋwən. Mbə́ zi ndwi yimə iboŋ inyo ma gha cha uŋwən abú paled. 12Aney wu, Herod nə paled u ti ni jəgə azi nu mbə́ mə́ ba abana.
Paled sob kwi u zwere Yeso
(Mat 27.15-26; Mak 15.6-15; Jon 18.39–19.16)
13Paled tiya ba kyayn ambəŋ Nwiye, utəw abú ba abey nə ba ujum, 14anigə ighayn abú úŋwən kwi, “Mbən num wa ŋunə zaʼa iniŋ kwi u yə bure ba, mə si nwini uŋwən itən ifigi izən kwi cha u gow ma anó moʼ akə unó mbənə mbən ghayn da uŋwən. 15Kaba Herod cha u zən ma anó moʼ yimə u gow damugə yə gha cha uŋwən ina. Anigə cha wa uŋu di gow ma anó moʼ yimə atey kwi mba zwere uŋwən. 16Anigə ayi som uŋwən isayn u ŋuw ma.” 17[Aney umə jəgə Ufere Izaʼara Chigə Igun paled mə́ chiyə wa ndəŋ feyn sayn].#23.17 Cha asin zəŋ ungɨŋ uŋwaʼanayn moʼ.
18Ba jum foro kyay ghayn kwi, “Zwere uŋwən! Chi Barabas naʼ ina!” 19(Mbə́ zi Barabas andəŋ da indum moʼ yə duw ungɨŋ abey u zwere wa). 20Paled kab inji ujum i sayn Yeso anigə yə gha ghayn abú ba wu kwi cha uŋwən gow ma anó moʼ. 21Anigə mbə́ kyay ghayn kwi, “komo uŋwən azad baʼara komo uŋwən azad baʼara!”
22Paled biri abú úŋwən iŋú pey akə ighari ta kwi, “ba komo uŋwən azad abaʼaray da ngiya? Amə anó ngiya u gow? Cha a zən aŋu anó moʼ u gow nu mba mi zwere uŋwən. A yi som uŋwən sayn u ŋuw ma.”
23Mbə́ ŋu imbey bə́ kyay kwi paled komo Yeso azad abaʼara. Mbə́ kyay nigə pey amaʼazənə mbə́ beŋe fiŋ paled. 24Anigə paled ghayn kwi mbən aghəy anó zənə mbən kaba. 25Paled chi anóm ŋunə mbə́ mə́ kaba sayn nu yə aghəy ndum ungɨŋ abey wa ku. Anigə inaʼ Yeso abú úŋwən kwi u aghəy abú uŋwən anó zənə u kaba.
Mbə́ kom Yeso azad baʼara
(Mat 27.32-44; Mak 15.21-32; Jon 19.17-27)
26Umugə usogwi num Yeso ni yeŋ ŋuw, mbə́ bomo nə anóm moʼ nu ukum ma mə Sayimon wa Cyrene nu yə noʼo iyad abey mə ŋuw Yerusanem. Mbə́ yimə uŋwən akə ikay i naʼa azad baʼara wu abú uŋwən ighəy uŋwən beʼe inigə anjim Yeso.
27Unoŋ ba kyayn niŋi anjim ma. Akaʼa úŋwən amə mbə ayey moʼ nu mbə mə yə idey chwey isɨ abú uŋwən. 28Yeso gha ma ghayn abú úŋwən kwi, “Buŋ ayey Yerusanem! Mbən mə chwey ngwen isiy da aŋu, mbən chwey amə da itən inyo foro da umbən buŋ. 29Damugə aney yi zaʼa nu mbən mi ghayn kwi, ‘Nwiye zi aborobod igun ayey ŋunə cha udi ibə́, igun ayey ŋunə cha u di si ma nə ŋwə̂, igun ayey ŋunə cha u di si noy ma ŋwə̂.’ 30#Nwi 6.16Anigə ba mbi noʼo ghayn abú igum kwi, ‘Mbən fwayn igun ina’ ba mbi ghayn abú igum kwi, ‘Mbə kəbərə ngwa!’ 31Ba bə aghəy anó ney abú wa ni cha u aghəy ma anó iboŋ ami si məŋi ngiya abú wa ŋunə u gow anó?”
32Mbə́ num anóm chini ubigə nu mbə gow anó iŋú zwere nə Yeso. 33Amaʼazənə mbə́ ŋú asin zənə umə tiya akə “Ayə utəw,” mbə́ kom uŋwən nə anóm mbənə mbə́ gow anó. Mbə kom wa feyn aba bugə jəgi ikom wa feyn aba bugə kyaba 34Yeso ghayn kwi, “uŋu mbaʼ waʼ unó iboŋ ma damugə cha u di kyay uma anó zənə umə aghəy.” Usogwi maʼa ibid ighaba ndwi ma. 35Ba təm iyad iyad iney umugə ba mbənə mbə́ mə́ tumə abey Jû mə baʼara Yeso ighayn abú uŋwən kwi, “Ngwə chi ba chini angəʼ chi inji inyo ighari ngwə bə mə́ wa ŋunə Nwiye zoʼo ŋunə Nwiye choʼo.”
36Usogwi wu nibi chiʼe uŋwən mbə́ naʼ anya unoʼ abú uŋwən. 37Ighayn abú uŋwən kwi, “Ngwə bə mə́ ufon abú ba Jû chi inji inyo ungɨŋ ingəʼ.” 38Mbə́ ŋwaʼanayn aghəy moʼ azad baʼara atəw ma kwi amə ufon ba Jû uŋu.#23.38 Mbə ŋwaʼanayn anó zəŋ akə inayn Latin, Greek foro akə inayn Hibru.
39wa feyn akaʼa ba mbənə mbə́ komo nə Yeso jim uŋwən ghayn kwi, “Aka ngwə mə wa ŋunə Nwiye zoʼo? Chiyə inji inyo angəʼ ichi ngwa fən!”
40Anigə wa uwi nya uŋwən ghayn kwi, “Ngwə kə goro yə Nwiye? Amə anó ngiya u aghəy ki u si sob usaʼa ma chin nə uma? 41Mbə sob usaʼa inyo ina yə kəʼ da anó zənə mba faʼa. Cha wa ŋunə gow ma anó moʼ.” 42Umugə yə ghayn nigə, u ghayn kwi, “Yeso kono aŋu aney zənə ngwə mi zaʼa ni ufon!” 43Yeso ghayn abú uŋwən kwi, “Ayə asiʼ inigə kwi akə̂choŋ ngwə yi mə nə umugə a Paradayis.”#23.43 Paradias amə asin iwuʼi zənə ba mbənə umə aghəy unó chuŋ umə ikuw ŋuw awu.
Iwu Yeso
(Mat 27.45-56; Mak 15.33-41; Jon 19.28-30)
44A sə ŋu si akə nyama ighum cho bigə angom, usin fid awu ungɨŋ abey ujum. Mbə fid nigə iŋu pey akə nyama ta. 45Cha achugi mə mbigə ma. Ndwi zənə mbə́ kárá ungɨŋ imbəŋ Nwiye siŋe akə uba ubigə. 46Yeso kyayn akə ikay kwi, “Uŋu mbaʼ mə sayn inyi Azugə ungɨŋ umbə ubugə!” Umugə yə ghay iney, yə mene.
47Amaʼazənə atəw abú usogwi zən anó zənə yə duw, yə yere Nwiye ghayn kwi, “A mə asiʼ kwi cha anóm ŋunə di gow ma anó moʼ!”
48Amaʼazənə unóŋ ba ŋunə yə fere imə ney zən anó zənə yə duw, mbə́ wene iŋu unuʼ akə akənə. 49Ba ujum mbənə mbə́ kyay Yeso nə mbə ayey mbənə mbə́ niŋe anjim ma iti Galeli tə agha sa sə́ ney unó mbəŋ.
Mbə́ twayn Yeso
(Mat 27.57-61; Mak 15.42-47; Jon 19.38-42)
50Anom moʼ mə awu nu ukum ma mə Josef yə du asin moʼ ungɨŋ Judeya nu umə tiya akə Arimathea. Wə mə wa moʼ akaʼa ba mbənə umə saʼa abey Judeya. A mə wa chuŋ nu yə mə aghəy unó ni ukəʼərə. 51Cha yə di beni ma nə anó zənə mbə́ num ni aghəy. Yə́ mə́ nəmə anó ufon Nwiye mi zaʼa. 52Wə ŋú boʼo ubugə abú paled inum awu Yeso. 53Paled beni anigə yə ŋú iswiʼiri awu Yeso ifed ungɨŋ ndwi fəw. Yə́ ŋú zi ungɨŋ asin ni mbə́ toŋo ungɨŋ ukob nu cha u di si zi ma wa moʼ awu ungɨŋ. 54Aney wu amə aney nu mbə́ mə́ tana inyo uma nu aney aku ba Jû mə sə ŋú kəʼ.
55Mbə́ ayey mbənə mbə zaʼa nu uŋwən iti Galeli ŋu aboʼo Josef. Mbə́ pey yi zən asey zənə mbə́ zi awu ma akuŋ. 56Mbə́ zən nigə iwene ŋú tana ifuʼ izoʼ awu ma nə ungəd nyoʼoro nyoʼoro ni umi zoʼ awu ma awú. Asə aney aku, mbə zwere numugə noʼo mə́ tey.
© 2023 CABTAL
