Jon 9
9
Yeso zwey anóm moʼ nu mbə́ ibə́ uŋwən u fəgə
1Amaʼazənə Yeso mə yeŋ chigə, yə́ zən anóm moʼ nu mbə ibə́ uŋwən u fəgə. 2Mbə məŋə-anó ma biri abú uŋwən kwi, “Ataʼa ba, amə unó iboŋ ngwa ughəy kwi u ibə́ anom ŋunə u fəgə? Amə uma kə umbi mbaʼ ma kə umbi ingo ma?”
3Yeso ywiri abú úŋwən kwi, “Akə ma kwi amə anóm uŋu ughəy unó iboŋ kə mbaʼ ma kə ingo ma. Uŋwən fəgə boʼo ba zən umugə Nwiye mə faʼa. 4Mba yi faʼ afaʼa zənə wa ŋunə u tom aŋu naʼa ina. Asɨmə mba yi faʼ amaʼazənə usi mə zayn. Afəb yə zaʼa nu ayi mi mə cha nji amə ghəy wa faʼ. 5#Mat 5.14; Jon 8.12Mbən kyay kwi amaʼazənə amə ungɨŋ isəg, amə́ uzayn zayn abú isəg.”
6Amaʼazənə yə ghayn anó zəŋ, yə́ chad amira asəy tobo achaʼ inum achaʼ wu izoʼ aghɨ anóm wu awu, 7ghayn abú uŋwən kwi, “Ŋuw səw inji figi ungɨŋ atum zənə amə Silom.” (Aton akə ukum wu akə kwi, “Tom”). Anom wu ŋu səw ifigi wene zaʼa ni zən usin.
8Ba mbənə mbə mə iyad akuw ma umbənə mbə́ mə́ zən ə uŋwən amaʼazənə yə́ mə́ ibiyə ughəy biri kwi, “Aka anom ŋunə yə́ mə́ chomo akəŋ ibiyə ughəy?” 9Ba moʼ mə ghayn kwi, “Amə uŋwən,” uchini ni ghayn kwi, “Akə ma uŋwən amə wa chini u chomo aba ni uŋwən.” Anom wu ma ambuŋ ghay kwi, “Amə umugə mə́ mə ibiyə ughəy.”
10Mbə́ biri abú ŋwən kwi, “Asi chigə ingiya nu ngwə mə zən ə usin?”
11Yə́ ywiri kwi, “Anom ŋunə umə itiya akə Yeso tobo isəg zoʼ inyi aghɨ awu, ghayn iniŋ kwi noʼ ŋu səw ifigi a silom. Mə ŋu səw anigə gha ni zən usin.”
12Mbə biri abú uŋwen kwi, “Anom wu awayn?”
Yə ywiri kwi, “Cha adi kyay aŋu asin zənə umə awu.”
Ba Farasay nwini ufəgə wu
13Ba wu num anóm ŋunə yə fəgə iŋu abú ba Farasay. 14Anəy zənə Yeso tobo achaʼ izwey ufəgə wu awu amə aney akuw ba Jû. 15Ba Farasay wu nibi biri abú uŋwən kwi, “Yə chigə ingiya ki ngwə sə gha zən usin?” Yə́ ywiri abú úŋwən kwi, “Yə tobo achaʼ izoʼ inyi aghɨ awu, mə ŋu səw anigə akinine ayə sə zən ə usin.”
16Ba Farasay moʼ ghayn kwi, “Akə ma Nwiye tomo anom ŋunə ughəy anó zəŋ damugə cha uŋwən di num ma anəy ku.”
Asɨmə mbi moʼ ghayn kwi, “Cha anom ŋunə umə ighəy unó iboŋ mi kyay ighəy ma ukudu iyere unó uŋu.” Umugə mbə ghayn ney, aghaba du akaʼa uma.
17Ba Farasay wu gha biri abú anom wu kwi, “Yə si aghəy ngwə zən usin, ngwə ghayn kwi ingiya da uŋwən?”
Anom wu ywiri kwi, “Mə kyay kwi uŋwən mə kwaʼa wa ukən Nwiye.”
18Cha ba Kyayn ungɨŋ abey ba jû di ibeni uma kwi anóm wu si fəgə, anigə uyə sə gha zən usin pey amaʼazənə mbə́ tiya mbaʼ nə ingo ma. 19Amaʼazənə mbə́ zaʼa, mbə́ biri abú úŋwən kwi, “Amə ŋwə̂ ŋunə mben ghayn kwi mbən ibə́ uŋwən ufəgə, usi mə gha zən usin ingiya?”
20Mbaʼ ma nə ingo ma ghayn kwi, “Mba kyay kwi anóm ŋunə amə ungwa ŋwə̂, mba nibi kyay kwi mba ibə́ uŋwən ufəgə. 21Asɨmə cha mba kyay ngwa inji zənə adu kwi u yə zən usin akinine, kə ikyay wa ŋunə ughəy uŋwən ni zən usin. Mbən biri abú uŋwən, yə si məŋi anom uyi ywiri anó ma.” 22Mbaʼ nə ingo anóm wu ghayn ney damugə mbə́ mə́ goro ba kyayn ungɨŋ abey ba Jû damugə mbə si siy kwi umbi fuw wa moʼ ŋunə u beni kwi Yeso mə wa ŋunə Nwiye zoʼo ungɨŋ ina ibomi ba Jû. 23Amə ton zənə mbaʼ anom wu nə ingo ma ghayn kwi, “Yə si məŋi anom mbən biri abú uŋwən.”
24Mbə́ tiya anom ŋunə mbə ibə́ ufəgə akə ighari iŋu pey akə ibigə ghayn abú uŋwən kwi, “Ghayn ngwə asiʼ ifigi Nwiye. Mba kyay kwi anom ŋunə yə zwey ayə amə wa nu umə ighəy unó iboŋ.”
25Anom wu ywiri kwi, “Kə umə aghəy unó iboŋ, kə cha umə aghəy unó iboŋ cha adi kyay. Anó zənə a kyay amə kwi mbə́ bə́ aŋu a fəgə, akinine ayə sə zən ə usin.”
26Mbə́ biri abú uŋwən kwi, “Yə aghəy anó ingiya inigə? Yə aghəy ingiya ki ngwə si fiʼi aghɨ?”
27Yə ywiri abú úŋwən kwi, “Mə́ si ghayn inen asɨmə cha mbən di wuʼ izwaray. Mbən si mə kaba igha zəw ighari chini da ingiya? Mbən waʼa nibə kaba i məŋi mbə məŋə-anó ma?”
28Mbə jimə uŋwən ighayn kwi, “Ngwə mə aməŋə ma. Amə da ngwa, mba mə mbə məŋə-anó Mose. 29Mba kyay kwi Nwiye nayn abú Mose. Amə da anom wu, cha mba kyay ngwa asin zənə u noʼo akuŋ.”
30Anom wu ywiri kwi, “Zəŋ amə kwaʼa ayere anó. Cha mbən kyay asin zənə u noʼo akuŋ, asɨmə yə si fiʼi inyi aghɨ. 31Mba kyay kwi cha Nwiye mə zwaray ma unó mbənə ba mbənə umə ighəy unó iboŋ mə ghayn, asɨmə uŋwən yə zwaray abú ba mbənə umə izəw uŋwən nibə aghəy unó mbənə u kaba. 32Inoʼo amaʼazənə Nwiye tana isəg, cha ba di si noʼ zəw ngwa kwi wa moʼ si fiʼi aghɨ wa nu mbə́ ibə́ ufəgə. 33Adi mə kwi akə ma Nwiye tomo anom ŋunə, nji cha yə mi aghəy ma ukudu anó uŋu.”
34Mbə́ ywiri abú uŋwən kwi, “Mbə́ ibə́ ayə ngwə kwey ungɨŋ unó iboŋ, anigə ngwə waʼa kaba itey unó ina?” Mbə́ ghayn nigə ifuw uŋwən ungɨŋ na bumi wu.
Ba mbənə umə ghayn kwi cha mbi mə ufəg
35Amaʼazənə Yeso zəw kwi mbə́ si fuw anom wu ungɨŋ na buni ba Jû, Yə ŋu kaba uŋwən zən ibiri abú uŋwən kwi, “Ngwə beni Ŋwə̂ Wa?”
36Anom wu ywiri kwi, “Masaʼ, uŋwən mə ngwə boʼo azi ibeni igun ma?”
37Yeso ghayn abú uŋwən kwi, “Ngwə si zən uŋwən. Amə uŋwən umə inayn inigə?”
38Anom wu ywiri kwi, “Asɨyisəg, mə beni.” Amaʼazənə yə ghayn nigə, yə zum utəw nwi ifigi Yeso.
39Yeso ghayn kwi, “Mə zaʼa isaʼ isəg zəŋ boʼo ifəg zən usin, umbənə umə zən ə usin u beŋe akə ifəg.”
40Ba Farasay moʼ nu mbə́ mə́ awu nə uŋwən zəw anó zənə yə ghayn, anigə mbə́ biri abú uŋwən kwi, “Ngwə waʼa kaba ghayn kwi mbə mə nibi ifəgə?”
41Yeso ywiri abú úŋwən kwi, “Adi mə kwi mbən mə ifəg, nji cha ifana anó moʼ igun inen. Asɨmə umugə mbən mə ghayn kwi mbən yə zən usin, ifana unó ti tənə igun inen.”
© 2023 CABTAL
