Jon 5
5
Yeso zwey anóm nu yə buʼe
1Amaʼazənə amaʼ moʼ chigə, Yeso koʼ ŋuw Yerusanem da ijəg ufere ba Jû. 2Atum moʼ umə itiya akə inayn Hibru kwi Betzata mə Yerusanem. Yə mə iyad uchəw ukam ŋunə u mə itiya kwi Uchəw Ukam Injəg. Uchəw ukam wu mə nə uboʼo itəŋ. 3Ba sɨgə nanaʼ mə awu atum niŋe. Ifəg, u buʼiri ba nə ba mbənə aba inyo ma feyn si ku. [Mbə́ mə chomo awu nəmə kwi angəd gha une, 4damugə angəd Asɨyisəg mə swiʼi ŋuw ungɨŋ atum wu pey yi gha une. Yə tey kwi wa isɨgə ŋunə u dey nyi ungɨŋ atum wu amaʼazənə angəd wu gha une wu, u yi boro akə isɨgə zənə umə sɨgə]#5.4 Cha asin aŋwaʼanayn zənə ati akə 3b-4 ungɨŋ uŋwaʼanayn moʼ. 5Anom moʼ mə awu nu yə́ si sɨgə akə atuʼ ighum ta cho ifəŋi. 6Amaʼazənə Yeso zən uŋwən, yə kyay kwi yə si niŋe awu akə agha sa. Anigə yə́ biri abú uŋwən kwi, “Ngwə mə kaba iboro?”
7Anom isɨgə awu ywiri abú uŋwən kwi, “Masa, cha wa moʼ iniŋ izi aŋu ungɨŋ atum zəŋ amaʼazənə Angəd gha une. Ki a sə ŋu nyi, wa chini si dey inyi.”
8Yeso ghayn abú uŋwən kwi, “Noʼo atey num inja abaʼa yeŋ ŋu.” 9Aba ighari wu anóm wu boro anigə yə noʼ inum abaʼa ma yeŋ ŋu.
Aney wu amə aney aku ba Jû. 10Anigə ba kyayn ungɨŋ abey ba Jû biri abú anom ŋunə Yeso zwey uŋwən kwi, “Akə̂choŋ mə aney aku, anigə cha umba unoʼo tey uma kwi ngwə beʼe abaʼa igun aney zəŋ.”
11Yə ywiri abú úŋwən kwi, “Anom ŋunə yə zwey aŋu ghayn iniŋ kwi, ‘Num injə abaʼa iyeŋ ŋu.’”
12Mbə́ biri abú uŋwən kwi, “Anom ŋunə yə ghayn inigə kwi num abaʼa iyeŋ ŋu amə ingwa?”
13Cha anóm ŋunə yə boro di kyay ma wa ŋunə yə zwey uŋwən damugə Yeso si sene ma asin wu, foro kwi unoŋ ba si fere asin awu.
14Asin naʼa, Yeso zən anom ŋunə yə zwey uŋwən ungɨŋ imbəŋ Nwiye, anigə ighayn abú uŋwən kwi, “Zən ngwə si boro, i gha ighəy ayə anó iboŋ boʼo ka anó nu a chigə ma akə zəŋ nyi ma igun inigə.”
15Anom wu noʼ ŋu pey yi ghayn abú ba kyayn ungɨŋ abey ba Jû kwi, “Amə Yeso yə zwey aŋu.” 16Mbə zəw nigə ti ni nwini inya ughəw Yeso damugə yə zwey wa aney aku. 17Asɨmə Yeso ywiri abú úŋwən kwi, “Uŋu Mbaʼ yə faʼa izaʼa pey akə̂choŋ, anigə umugə ayə nibə faʼa.” 18Inayn zənə Yeso ghayn aghəy kwi, ba kyayn ungɨŋ abey ba Jû ni kaba inji jum ni zwere uŋwən. Cha mbə kaba izwere uŋwən aba da umugə yə gow anó aney aku, mbə́ mə́ nibi kaba izwere uŋwən damugə yə tiya Nwiye kwi Mbaʼ ma. Anigə u yə kaba itey kwi iyə ichin ichin nə Nwiye.
Amə Nwiye naʼa ikay abú Ŋwə̂
19Yeso ghayn abú ba kyayn ungɨŋ abey ba Jû kwi, “Ayə ghayn asiʼ inen kwi cha Ŋwə̂ mə aghəy ma anó moʼ akə ighari ma. U yə ighəy aba unó mbənə u zən Mbaʼ aghəy. Anó zənə Mbaʼ aghəy Ŋwə̂ yi nibi aghəy, 20damugə Mbaʼ wuʼe Ŋwə̂ ma, anigə yə tey uno jum mbənə umə aghəy abú Ŋwə̂. U yi tey unó kyayn abú uŋwən chigə umbəŋ. Anigə mbən yi yere. 21Anji zənə Mbaʼ mə zəmə ba inaʼa itəni abú úŋwən, amə ichin ichin nu Ŋwə̂ mə naʼa itəni abú ba mbənə u wuʼi. 22Cha Mbaʼ mi saʼa ma wa moʼ, yə si naʼa ikay jum abú Ŋwə̂ kwi u saʼa ba. 23Yə ghəy nigə boʼo ba jum wumini Ŋwə̂ anji zənə umə wumini Mbaʼ. Wa ŋunə cha umə wumini Ŋwə̂, cha umə nibə wumini Mbaʼ ŋunə yə cha Ŋwə̂.”
24“Ayə ghayn asiʼ inen kwi wa ŋunə u zəw inyi inayn, anigə ibeni wa ŋunə u tomo aŋu, si jəg itəni nu cha imi noʼo mey. Cha umi saʼa uŋwən, asɨmə yə si du uchəw iwu ijəg itəni. 25Ayə ghayn asiʼ inen kwi amaʼ yi zaʼa, anigə amaʼ wu si zaʼa nu uwu ba mi zəw igəg ŋwə̂ Wa. U mbənə u zəw u mbi gha tənə. 26Anji zənə itəni mə ungɨŋ Mbaʼ nu umə naʼa abú ba, anigə yə si nibi aghəy kwi Ŋwə̂ naʼa itəni abú ba. 27Mbaʼ si nibi naʼa ikay abú uŋwən kwi u saʼa ba damugə uŋwən amə ŋwə̂ Wa. 28Ka zəŋ mə ma ayere anó inen. Amaʼ yi zaʼa nu ba jum mbənə umə ungɨŋ isey mi zəw igəg ma, 29anigə du ungɨŋ isey. Ba mbənə umə aghəy unó chuŋ umbi zəmə ijəg itəni asɨmə umbənə umə aghəy unó iboŋ umbi zəmə Nwiye zi usaʼa igun uma. 30Cha anó moʼ amə ighəy akə inyi ikay. A yə saʼa ba aba akə inji zənə Nwiye ghayn iniŋ. Anigə ayə saʼa úŋwən akə inji zənə ikoʼoro damugə cha amə ighəy anó zənə akaba. A yə aghəy amə anó zənə wa ŋunə u tom aŋu kaba.”
Ba mbənə umə ghayn asiʼ da Yeso
31“Abə mə ghayn anó da inyi inyo umugə ambuŋ, nji cha ba mi beni uma unó mbəŋ. 32Asɨmə wa moʼ yə awu umə ghayn unó da aŋu. Mə kyay kwi unó mbənə umə ghayn amə unó asiʼ. 33#Jon 1.19-27; 3.27-30Mbən tom ba abú Jon ŋunə yə́ mə́ naʼa une anigə yə́ ghayn asiʼ da aŋu inen. 34Akə ma kwi ba mbi ghayn anó da aŋu, asɨmə a yə ghayn umbənə Jon ŋunə yə mə́ naʼa une ghayn da mbən du angəʼ. 35Jon chomo ni anam amə bəŋə. Mbən wuʼ i chomo ungɨŋ uzayn zayn ŋunə yə ghəy kwi u tey. Anigə mbən chomo aba akə ŋwə̂ maʼa moʼ. 36Unó mbənə amə ighəy, amə uzənə iniŋ. Mbə chigə umbənə Jon ŋunə yə́ mə́ naʼa une ghayn da aŋu. Unó mbənə Mbaʼ zi ungɨŋ umbəŋ ubugə kwi a aghəy, anigə amə umbənə a mə aghəy. Umə tey kwi amə Mbaʼ tomo aŋu. 37#Mat 3.17; Mak 1.11; Luk 3.22Mbaʼ ŋunə u tom aŋu mə nibə uzənə iniŋ. Cha mbən di si noʼo zəw igəg ma kə izən ifigi ma. 38Cha inayn ma ungɨŋ itən fiŋ damugə cha mbən beni ngwən wa ŋunə u tomo. 39Mbən yə kwaʼa kweme aŋwaʼanayn Nwiye damugə mbən kono kwi mbən yi zən umugə inji ijəg itəni məŋi ungɨŋ aŋwaʼanayn wu. Mbən kyay kwi aŋwaʼanayn wu ayə ighayn da aŋu. 40Anigə cha mbən mə beni izaʼa iniŋ boʼo ijəg itəni.
41Cha amə kaba aŋu kwi ba yere aŋu. 42Asɨmə mə kyay ngwən kwaʼa anji chuŋ. Mə kyay kwi cha mbən wuʼe Nwiye ungɨŋ itən fiŋ. 43Mə zaʼa akə ukum uŋu Mbaʼ anigə cha mbən num ngwən aŋu. Asɨmə wa moʼ bi zaʼa akə ighari ma mbən yi num uŋwən. 44Mbən mi beni ingiya nu mbən mə wumine aba umbən unya, nu cha mbən mə kaba kwi Nwiye yugə nu aba feyn wumine ngwən? 45Ka mbən kono ngwən kwi amə umugə ami zi usaʼa igun inen ifigi Mbaʼ. Amə Mose ŋunə mbən niŋi itən kono igun ma mi zi usaʼa igun inen. 46Mbən di bi beni Mose, nji mbən mi nibi beni aŋu damugə Mose ŋwaʼanayn da aŋu. 47Asɨmə, umugə cha mbən di beni unó mbənə yə́ ŋwaʼanayn, mbən mi si beni umbənə amə ghayn inen ingiya?”
© 2023 CABTAL
