Jon 3
3
Yeso nə Nikodemus
1Anom moʼ mə awu nə ba Farasay kyayn ungɨŋ abey ba Jû. Ukum ma mə́ Nikodemus. 2Anom wu ŋu abú Yeso afəb pey yi ghayn abú uŋwən kwi, “Ataʼa ba, mə kyay kwi ngwə mə ataʼa ba ŋunə Nwiye tomo. Cha wa moʼ awu umə ighey uyere unó mbənə ngwə mə ighəy amaʼazənə Nwiye bə kə ma nə uŋwən.”
3Yeso ywiri abú uŋwən kwi, “Ayə ghayn asiʼ inigə kwi cha wa moʼ awu nu umi nyi ungɨŋ anó fon Nwiye nu abə ki gha ibə́ ma uŋwən ighari chini.”
4Nikodemus biri abú uŋwən kwi, “Umi gha ibə́ wa ŋunə usi nun ighari chini ingiya? U mi gha nyi ungɨŋ ibum ingo ma iŋu pey akə ighari iŋu pey akə ibigə, ingo ma gha ibə́ uŋwən ighari chini?”
5Yeso ywiri abú uŋwən kwi, “Ayə ghayn asiʼ inigə kwi cha wa moʼ awu nu umi nyi ungɨŋ anó foŋ Nwiye nu cha umi ibə́ uŋwən ighari chini akə une foro akə Azugə zayn zayn. 6Wa ŋunə ba inyoŋ atəw ubə́ uŋwən amə wa inyoŋ atəw asɨmə azugə zayn zayn yə ibə́ azugə zənə amə ungɨŋ ba. 7I məŋəre ayə inji zənə a ghayn inigə kwi, ‘u mbi gha ibə́ wa ighari chini.’ 8Afim yə chigə ŋuw aba zənə a kaba, anigə ngwə yə zəw umugə amə kumə asɨmə cha ngwə kyay ayə asin zənə amə zaʼa akuŋ kə asin zənə amə ŋuw awu. Amə anji zənə aməŋi abú wa ŋunə Azugə zayn zayn mə ungɨŋ ma.”
9Nikodemus biri abú uŋwən kwi, “Zəŋ ami chigə ingiya?”
10Yeso ywiri abú uŋwən kwi, “Ngwə mə wa ŋunə umə tey unó abú ba Izre anigə cha ngwə kyay ayə unó mbəŋ? 11Ayə ghayn asiʼ inen kwi, mba yə ghayn unó mbənə mba kyay nibə ghayn umbənə mba si zən, asɨmə cha mbən mə beni gwən unó mbənə mba mə ghayn. 12Mə si ghayn inen da unó mbənə umə ighəy igun isəg, asɨmə cha mbən mə beni. Mbən si mi beni ingiya amaʼazənə abə ghayn da unó mbənə umə aghəy azobo? 13Cha wa moʼ di si ŋu azobo chigə akə ŋwə̂ Wa nu uswiʼi azobo. 14Anji zənə Mose beʼere ijugə bronz aneŋ azad ungɨŋ imbayn zomo, amə nibə ichin ichin umi beʼere ŋwə̂ Wa, 15boʼo ba jum mbənə u beni uŋwən umbi jəgə itəni nu cha imi noʼo mey.”
16Nwiye kaŋa wuʼ isəg anigə yə cha Ŋwə̂ ma yugə nu aba ufeyn da ka wa moʼ ŋunə u beni uŋwən nim ma. Asɨmə u jəg itəni nu cha imi noʼo mey. 17Nwiye tom Ŋwə̂ ma ungɨŋ isəg akə ma kwi u zaʼa zi usaʼa igun ba ungɨŋ isəg asɨmə kwi ba ungɨŋ isəg mbi chigə anjim ma idu angəʼ. 18Cha Nwiye zi ma usaʼa igun ba mbənə u beni uŋwən, yə si zi amə igun ba mbənə cha udi beni uŋwən, damugə cha udi beni Ŋwə̂ Nwiye yugə ufeyn. 19Usaʼa yi nyi igun ba da kwi uzayn zayn si zaʼa ungɨŋ isəg, asɨmə ba tey kwi mbə wuʼ amə asin firi chigə uzayn zayn damugə umə́ ighəy unó iboŋ. 20Ba jum mbənə umə ighəy unó iboŋ umbə bana uzayn zayn. Cha umə zaʼa ungɨŋ uzayn zayn da ka ba zən uma unó iboŋ ma. 21Asɨmə ba mbənə umə ighəy unó mbənə ukoʼoro umbi ŋu ungɨŋ uzayn zayn da ba zən kwi amə Nwiye naʼa ikay kwi ughəy unó mbənə u wuʼi.
Jon ŋunə yə́ mə́ naʼa une ghayn anó da Yeso
22Amaʼazənə Yeso si ghayn unó mbəŋ, yə noʼ ni mbə́ məŋə-anó ma u ŋu aba abey Judeya. Yə pey yi chomo awu nə úŋwən nibi naʼa une abú ba. 23Jon mə nibə naʼa une abú ba á Anon iyad Salim. Yə́ mə́ naʼa une awu damugə une mə awu. Ba mə ŋuw abú uŋwən u naʼa une abú úŋwən. 24#Mat 14.3; Mak 6.17; Luk 3.19, 20Anó zəŋ aghəy ki usə zi Jon andəŋ.
25Mbə məŋə-anó Jon moʼ nə ba Jû moʼ ti ni taŋa da anó ni isəw inyo nibi səw ughəy ki wumini Nwiye. 26Mbə məŋə-anó Jon ŋu abú uŋwən pey yi ghayn abú uŋwən kwi, “Ataʼa ba, anóm ŋunə yə mə anjin ugwi Jodan nu ngwə ghayn da uŋwən, uyə naʼa une, anigə ba jum umbə ŋuw abú uŋwən.”
27Jon ywiri kwi, “Cha nji amə aghəy wa mə nə aghəy moʼ nigə kwi amə Nwiye naʼa abú uŋwən. 28#Jon 1.20Mbən mə uzənə kwi mə si ghayn kwi, ‘Cha amə aŋu wa ŋunə Nwiye zoʼo asɨmə Nwiye cha aŋu imbey ma.’ 29Wa ŋunə ugən mə uma, amə unom ugən. Uzi unom ugən mbə təm iyad zəw umugə ugən mə inayn, umbi wuʼ kwaʼa azəd damugə u zəw igəg unom ugən awu. Anigə iwuʼi kaŋa sugi ungɨŋ inyi fiŋ. 30Unó ma mbi sə ŋuw imbey, umbəŋ sə ŋuw anjim.”
31Wa ŋunə u zaʼa azobo chigə ba jum, u ŋunə u zaʼa igun isəg amə wa igun isəg. Uŋwən yə ghayn aba unó igun isəg. Wa ŋunə u zaʼa azobo chigə ba jum. 32Uŋwən yə ghayn unó mbənə u si zən nibi zəw, asɨmə cha wa moʼ awu u beni anó zənə umə ghayn. 33Wa moʼ ŋunə u beni anó zənə u ghayn, si nibi beni kwi anó zənə Nwiye ghayn amə anó asiʼ. 34Inayn zənə wa ŋunə Nwiye tomo ghayn amə inayn Nwiye damugə azugə Nwiye yə igun ma nu cha inji amə ghəy wa uməg. 35#Mat 11.27; Luk 10.22Mbaʼ wuʼe Ŋwə̂ ma anigə yə si sayn unó jum inya ubugə ma. 36Wa ŋunə u beni Ŋwə̂ Nwiye si jəg itəni nu cha imi noʼo imey. Cha wa ŋunə cha umə wumini Ŋwə̂ Nwiye mi jəg ma itəni, asɨmə Nwiye yi sə itəm abú uŋwən.
© 2023 CABTAL
