Jon 14
14
Yeso amə inji iŋu abú Mbaʼ
1Yeso ghayn abú mbə məŋə-anó ma kwi, “Ka itən fiŋ mə toboro ma gwən. Mbən beni Nwiye nibi beni aŋu. 2Utəw na nanaʼ mbə ungɨŋ na uŋu Mbaʼ. Yə di koʼ ma nigə, nji cha mə mi ghayn kwi ayə ŋuw tana asin inen? 3Amaʼazənə asi ŋu tana asin inen, ayi zaʼa pey yi num ngwən kwi mbən zaʼa aboʼo inyi da asin zənə amə awu, mbən yi mə awu. 4Mbən kyay nji zənə imə ŋuw asin zənə amə ŋuw akuŋ.”
5Tomas ghayn abú uŋwən kwi, “Asɨyisəg, cha mba kyay asin zənə ngwə mə ŋuw akuŋ, mba mi si kyay inji zənə imə ŋuw akuŋ ingiya?”
6Yeso ywiri abú uŋwən kwi, “Umugə amə inji nə asiʼ foro itəni. Cha wa moʼ mi ŋu abú uŋu Mbaʼ nu uki chigə ma inyi injim. 7Mbə bə kaŋa kyay wa ŋunə amə uŋwən, nji mbən yi nibi kyay wa ŋunə amə uŋu Mbaʼ mə uŋwən. Inoʼ akinine, mbən si kyay uŋwən anigə mbən si nibi zən uŋwən.”
8Filip ghayn abú uŋwən kwi, “Asɨyisəg, tey mbaʼ ina. Amə anó zənə mba kaba azigə.”
9Yeso ywiri kwi, “Mə si chomo aboʼo injən akə agha sá, asɨmə cha ngwə Filip, kaŋa kyay aŋu? Ba jum mbənə u zən aŋu si nibi zən Mbaʼ. Ngwə si chigə ingiya ighayn iniŋ kwi, ‘tey Mbaʼ ina?’ 10Cha ngwə di beni ayə kwi ayə akə anó feyn nə uŋu Mbaʼ foro kwi uŋu Mbaʼ yə akə anó feyn nə umugə? Inayn zənə mə́ mə ghayn inen cha mə́ mə ghayn akə inyi ighari. Amə Mbaʼ ŋunə umə akə anó feyn nə umugə yə mə aghəy unó mbənə yə kaba. 11Mben beni kwi ayə akə anó feyn nə uŋu Mbaʼ foro kwi uŋu Mbaʼ yə akə anó feyn nə umugə. Mbən bə ton ibeni mbən beni da unó mbənə mbən zən amə ighəy. 12Ayə ghayn asiʼ inen kwi wa ŋunə u beni unó mbənə amə ghayn, yi nibi aghəy unó mbənə amə aghəy. Uŋwən yi aghəy unó nu uchigə mbəŋ damugə ayə ŋuw abú Mbaʼ. 13Ayi aghəy anó moʼ zənə mbən biri akə uŋu ukum, boʼo ba wumini Mbaʼ anjim Ŋwə̂. 14Ngwə bə biri anó moʼ akə uŋu ukum, ayi aghəy anó wu.”
Yeso kaʼ kwi Mbaʼ yi cha Azugə zayn zayn
15Yeso nibi ghayn abú mbə məŋə-anó ma kwi, “Mbən bə wuʼe aŋu, mbən yi num itəŋ ikɨy. 16Mbən bə aghəy nigə, ayi biri abú Mbaʼ anigə u yi naʼ Awere ba chini inen nu umi chomo nə umbən akə ighari feyn. 17Uŋwən amə Azugə zayn zayn zənə ami ghəy kwi ba kyay asiʼ. Cha isəg mi beni ma uŋwən damugə cha ami zən uŋwən kə kyay uŋwən. Asɨmə mbən kyay uŋwən damugə uŋwən yə nə umbən foro kwi uŋwən yə ungɨŋ inen.
18Cha ami sayn ngwən ni buŋ uti, asɨmə ayi gha wene zaʼa inen. 19Asi buʼe akwere amaʼ cha isəg mi gha zən aŋu, asɨmə mbən yi zən aŋu. Anji zənə amə ikay, mbən yi mə nibə ikay. 20Amaʼazənə anəy wu yi bə pey, mbən yi kyay kwi ayə akə anó feyn nə uŋu Mbaʼ, foro kwi mbən yə akə anó feyn nə umugə. Mbən yi nibi kyay kwi ayə akə anó feyn nə umbən.
21Wa ŋunə u wuʼ aŋu, uyi zəw itəŋ ikɨy nibi num. Uŋu Mbaʼ yi wuʼ wa ŋunə u wuʼe aŋu, ayi nibi wuʼe uŋwən itey inyi inyo abú uŋwən.”
22Judas moʼ nu akə ma Judas Iskariyot ghayn abú uŋwən kwi, “Asɨyisəg, ngwə mi tey inyo ina ingiya nu cha ngwə tey abú isəg?”
23Yeso ywiri kwi, “Wa moʼ ŋunə u wuʼi aŋu, uyi zəw inyi inayn nibi num. Uŋu Mbaʼ yi wuʼ uŋwən anigə umugə nə uŋu Mbaʼ mba yi ŋu abú uŋwən pey yi chomo nə uŋwən. 24Cha wa ŋunə cha udi wuʼe ma aŋu mi zəw ma inyi inay nibi num. Unó mbənə mbən si zəw akə ma umbəŋ, amə umbi Mbaʼ ŋunə yə tomo aŋu.
25Mə si ghayn unó mbəŋ inen amaʼazənə mə́ mə nə umbən. 26Mbaʼ yi cha Awere ba akə uŋu ukum. Uŋwən amə Azugə zayn zayn zənə ami tey unó jum inen nibi aghəy kwi mbən kono unó jum mbənə mə́ si ghayn inen.
27Mə sayn aborobod inen, mə nibi naʼ inyi aborobod inen. Cha amə naʼa anji zənə isəg mə naʼa. Ka itən fiŋ mə toboro ma ngwən. Ka mbən mə goro ngwən. 28Mbən si zəw amaʼazənə mə ghayn inen kwi, ‘Ayə ŋuw, asɨmə ayi gha zaʼa inen.’ Abə mə kwi mbən kaŋa wuʼ aŋu, nji mbən yi wuʼe gwən kwi ayə ŋuw abú Mbaʼ damugə Mbaʼ chigə aŋu. 29Mə si ghayn anó zəŋ inen akinine ki asə num usin, boʼo amaʼazənə ami num usin mbən yi beni. 30Cha amaʼa nanaʼ iniŋ inayn inen damugə wa ŋunə umə tumə isəg zəŋ uyə zaʼa. Cha ikay abú uŋwən inyi igun, 31asɨmə ayə ghəy aba anji zənə Mbaʼ ghayn iniŋ boʼo isəg kyay kwi mə wuʼe Mbaʼ. Mbən zaʼa mba noʼo akəŋ.”
© 2023 CABTAL
