Jon 12
12
Mary zoʼ Yeso a Betani
(Mat 26.6-13; Mak 14.3-9)
1Amaʼazənə unəy ifəw buʼe abú ba Jû ijəgə ufere izaʼara chigə igun, Yeso ŋúw a Betani nu amə asin zənə Nazarus ŋunə yə zəmə uŋwən iwu mə chomo. 2Ba moʼ tana u aghəy jəgi abú uŋwən awu. Amə mata yə ghaba aghəy jəgi wu abú úŋwən. Nazarus mə wa moʼ akaʼa ba mbənə mbə́ chomo igun agayi imə ijəg aboʼo Yeso. 3#Luk 7.37, 38Amaʼazənə mbə́ mə́ jəgə, Meri num ichəŋ ungəd ni yə mə́ ka unun. Mbə́ tana ungəd wu akə nad izoʼ ughəw Yeso awu i ni fira akə inyoŋ atəw ma ifoy chuŋ zənə yə mə duw akə ungəd wu sugi awu ungɨŋ na wu. 4Amaʼazənə yə mə aghəy nigə, Judas Iskariyot nu amə́ wa feyn akaʼa mbə məŋə-anó Yeso nu amə uŋwən umi fənə Yeso ghayn kwi, 5“Aton zənə uki fənə uma ungəd mbənə akə akɨ tusen ta ina ukab wu abú ba ukwaŋ amə da ngiya?” 6Cha yə di ghayn ma ney amə da mugə yə mə ni fiŋ iwere ba ukwaŋ, amə damugə yə mə uji. Umugə amə uŋwən yə mə isiy abam kaba, yə mə ichi ukab awu iwere inyo ma awu.
7Amaʼazənə Yeso zəw anó zəŋ, yə ghayn abú uŋwən kwi, “Sayn uŋwən ma zeʼe yə siy ungəd mbəŋ da umi zoʼ aŋu awu anəy zənə umi mə twayn aŋu. 8Ba ukwaŋ umbi mə nə ubən akə ighari ujum, asɨmə ayi mə cha aŋu nə ubən akə ighari ujum.”
Ba kyayn ambəŋ Nwiye tana unaŋ uzwere Nazarus
9Amaʼazənə ikwiy ba Jû zəw kwi Yeso yə a Betani mbə́ ŋú awu. Cha mbə di ŋú ma awu aba da izən Yeso mbə́ nibi ŋu da izən Nazarus ŋunə Yeso zəmə uŋwən iwu. 10Anigə utəw abú ba mbənə mbə mə faʼa ambəŋ Nwiye tana kwi umbi nibi zwere Nazarus fən, 11damugə anó zənə yə aghəy abú Nazarus yə aghəy kwi ba Jû nanaʼ sayn úŋwən ibeni Yeso.
Yeso inyi a Yerusanem nu ufon
(Mat 21.1-11; Mak 11.1-11; Luk 19.28-40)
12Amaʼazənə isəg kyiʼe, ikwiy ba zənə yə́ ŋú akə ufere izaʼara chigə igun zəw kwi Yeso yə zaʼa Yerusanem. 13Anigə mbə num uzaŋ idu iŋu bomo uŋwən. Mbə mə yə kyay akə ikay ghayn kwi,
“Mba yere Nwiye!
Nwiye zi aborobod igun wa ŋunə u zaʼa akə ukum ma.
Nwiye zi aborobod igun ifon mbi Izrel.”
14Yeso num ŋwə̂ jakas ikoʼ awu igun umugə mbə ŋwaʼanayn ungɨŋ Aŋwaʼanayn Nwiye.
15“Ba Izrel mbən mə goro ngwən!
Mbən zən ufon yə zaʼa, yə koʼo iguni ŋwə̂ jakas.”
16Cha utəw mbə məŋə unó ma di zayn uma da unó mbəŋ amaʼa wu, asɨmə amaʼazənə Nwiye zəmə Yeso inaʼ iwumini abú uŋwən, mbə məŋə ma si kono kwi mbə ŋwaʼanayn anó zəŋ da uŋwən foro kwi mbə si aghəy anó wu abú uŋwən.
17Ikwiy ba zənə yə́ mə́ aboʼo Yeso amaʼazənə yə tiya Nazarus ungɨŋ isey izəmə uŋwən iwu mbə́ ghayn anó wu abú ba chini. 18Aton zənə ikwiy ba zəŋ ŋú ibomo uŋwən amə umugə mbə zəw kwi yə aghəy ayere anó zəŋ. 19Anigə ba Farasay ghayn uma uma kwi, “Mbən zən, cha mba mə aghəy anó moʼ. Isəg jum yə sə beni aboʼo uŋwən!”
Ba moʼ nu akə ma ba Jû kaba izən Yeso
20Ba moʼ nu akə ma ba Jû mə aboʼo ba mbənə mbə́ ŋu iwumini Nwiye amaʼazənə mbə́ mə́ jəgə ufere izaʼara chigə igun. 21Mbə́ ŋu abú Filip nu yə noʼo Betsayida á Galili, pey yi ghayn abú uŋwən kwi, “Masaʼ, mba yə kaba izən Yeso.” 22Filip ŋu ghayn anó zəŋ abú Andrew. Anigə úŋwən uma bigə ŋu ghayn abú Yeso.
23Yeso ghayn abú úŋwən kwi, “Amaʼ si koʼ nu Nwiye mi aghəy kwi u wumini Ŋwə̂ Wa. 24Ayə ghayn asiʼ inen kwi utiŋi ikwi feyn yi tənə aba utiŋi kwi feyn nigə kwi u nyi ungɨŋ isəg, ku, ki umi kwey si mə nə itiŋi nanaʼ. 25#Mat 10.39; 16.25; Mak 8.35; Luk 9.24; 17.33Wa ŋunə u wuʼ itəni ma, uyi sam itəni wu. Wa ŋunə u bana itəni ma ungɨŋ isəg yi jəg itəni zənə itənə akə ighari feyn. 26Wa ŋunə umə kaba ifaʼ iniŋ, yə beni aboʼo inyi da asin zənə amə awu, uŋu wa faʼa yi mə awu. Uŋu Mbaʼ yi wumini wa moʼ ŋunə u faʼa iniŋ.”
Yeso ghayn da iwu ma
27Yeso ghayn kwi, “Akinine, nyi fiŋ yə toboro aŋu. A ghayn kwi ngiya? Awaʼa ghayn kwi, ‘Uŋu Mbaʼ ibeni ayə kwi amaʼa zəŋ zaʼa igun iniŋ?’ Indəʼ, mə zaʼa da amaʼa zəŋ. 28Uŋu Mbaʼ ghəy kwi ba wumini ayə!”
amaʼazənə yə́ ghayn ney, igəg moʼ nayn azobo ghayn kwi, “Mə si ghəy kwi ba wumini aŋu, ayi gha ighəy nigə ighari chini.”
29Akama ba zənə yə́ təm iyad iyad zəw igəg wu. U moʼ zəw nigə ghayn kwi, “Amə imbeŋ mə kumə.” Asɨmə u chini ghayn kwi, “Angəd si nayn abú uŋwən.”
30Yeso ghayn abú úŋwən kwi, “Igəg zənə inayn amə da ngwən, akə ma da aŋu. 31Amaʼ si koʼ nu Nwiye mi saʼ isəg zəŋ. Uyi fuw uŋwən ŋunə umə tumə isəg zəŋ. 32Amaʼazənə u si num aŋu azobo, ayi ghəw ba jum mbənə amə umbəŋ num abú inyi inyo.” 33Yə ghayn anó zəŋ boʼo itey inji zənə umi iku.
34Akama ba wu ywiri kwi, “Ayə ungɨŋ unoʼo Mose kwi, wa ŋunə Nwiye zoʼo yi tənə akə ighari feyn. A si chigə ingiya ngwə ghayn kwi umbi num Ŋwə̂ Wa azobo? Ŋwə̂ Wa wu adi mə ngwa?”
35Yeso ghayn abú úŋwən kwi, “Uzayn zayn yi mə akaʼa injən akə ŋwə̂ amaʼa moʼ. Mbən yeŋ akə amaʼazənə isəg mə zayn boʼo ka afəb kən ma gwən. Cha wa ŋunə umə yeŋ afəb kyay ma asin zənə umə ŋuw awu. 36Amaʼazənə isəg mə zayn, mbən zi fiŋ igun uzayn zayn wu, boʼo mbən chomo ungɨŋ uzayn zayn.”
Amaʼazənə Yeso si ghayn anó zəŋ, yə noʼ akaʼa úŋwən ŋu paʼa.
Cha ba wu beni uma Yeso
37Ka di ma kwi Yeso aghəy uyere unó nanaʼ akaʼa ba mbəŋ, cha mbə di beni ma uŋwən, 38damugə inayn zənə wa ukən Nwiye Azaya ŋwaʼanayn idu akə asiʼ kwi,
“Asɨyisəg, amə ngwa beni ukən ŋunə mba mə ghayn?
Amə abú ngwa nu Nwiye tey ikay ma.
39Anigə cha mbə beni. Azaya nibi ghayn kwi,
40Nwiye si fiy aghɨ uma
Nibi aghəy fiŋ uma tu
boʼo ka aghɨ uma zən ma usin,
Ka fiŋ uma kyay ma anó
Nji umbi wene zaʼa iniŋ
boʼo azwey úŋwən.”
41Azaya ghayn anó zəŋ damugə yə́ si zən umugə ba mi wumini Yeso anigə yə ghayn da uŋwən.
42Ka aba nigə, ba nanaʼ akaʼa ba kyayn ungɨŋ abey ba Jû beni Yeso, asɨmə cha mbə mə ghayn ma asaŋ asaŋ damugə mbə mə́ goro ba Farasay. Ba Farasay bə kyay, nji umbi fuw úŋwən ungɨŋ na bumi ba Jû. 43Ba Farasay wuʼ kwi ba wumini úŋwən chigə umugə Nwiye mi wumini úŋwən.
44Yeso ghayn akə igəg kaka kwi, “Wa moʼ ŋunə u beni aŋu, cha udi beni aba aŋu, yə si nibi beni uŋwən ŋunə u tomo aŋu. 45Wa moʼ ŋunə u zən aŋu, yə nibi zən wa ŋunə u tom aŋu. 46Mə si zaʼa ungɨŋ isəg nu uzayn zayn boʼo ka wa moʼ ŋunə u beni aŋu chomo ma ungɨŋ usin firi. 47Cha ami saʼ aŋu wa moʼ ŋunə uzəw unó mbənə amə ghayn asɨmə cha umə ighəy ma, damugə cha adi zaʼa ungɨŋ isəg boʼo isaʼ ba. Mə zaʼa boʼo ichi ba angəʼ. 48Wa ŋunə u ton aŋu nu cha u zəw anó zənə amə ghayn, wa ŋunə umi saʼa uŋwən yə awu. Unó mbənə amə ghayn mbi saʼa uŋwən anəy zənə isəg mi nwi. 49Cha amə ghayn unó mbəŋ akə inyi ikay. Uŋu Mbaʼ ŋunə u tomo aŋu si naʼ ikay iniŋ da anó zənə ami ghayn nibi inayn. 50Mə kyay kwi unoʼo ma mbə naʼa itəni nu cha imi noʼo imey. Anigə anó zənə amə ghayn amə anó zənə uŋu Mbaʼ si ghayn iniŋ kwi a ghayn.”
© 2023 CABTAL
