Ifa 4
4
Mbə́ num Pita nə Jon iŋú ifigi mbə saʼa abey
1Umugə Pita ni Jon mə bugə inay abú ba wu, ba moʼ akaʼa ba mbənə mbə́ mə́ faʼa ambəŋ Nwiye, atəw abú usogwi mbənə umə́ nəmə imbəŋ Nwiye, nə ba sadusi moʼ ŋu kuwə úŋwən. 2Úŋwen siy itəm damugə Pita nə Jon mə taʼa ba ighayn kwi Yeso si zəmə itey kwi uwu ba umbi izəmə. 3Anigə mbə ibiya Pita nə Jon. Umugə injaʼ si chig, mbə́ ŋú ghəbə úŋwən ana indəŋ u ney awu pey Amaʼazənə isəg kiʼi. 4Anigə ba nanaʼ akaʼa ba mbənə mbə́ zəw inay Nwiye wu beni Kristo. Unun anóm ŋunə yə bəni mə ka ichuʼ itəŋ.
5Aney kuŋ, utəw kyayn ungɨŋ abey ba Jû, ba kyay mbənə umə ungɨŋ abey nə ba mbənə umə taʼa ba akə unoʼo ŋu fere a Yerusanem. 6Mbə fere nigə nə Annas nu amə atəw kyay abú ba mbənə umə faʼa ambəŋ Nwiye, nə Kayifas, nə Jon, nə Alezanda nə anóm ujum mbənə umə ungɨŋ unebey atəw kyay ambəŋ Nwiye mə awu. 7Amaʼazənə mbə num Pita ni Jon uŋu təm ifigi uma mbə́ biri abú Pita nə Jon kwi, “Amə akə ikay ngwa, kə amə akə ukum ngwa mbən mə ighəy anó zənə?” 8Azugə zayn zayn sugi ungɨŋ Pita anigə u ywere abú úŋwən kwi, “Utəw abú ba nə ba kyayn ungɨŋ abey 9mbən bə́ mə́ ibiri ngwa akə̂choŋ da anó chuŋ zənə mba aghəy abú abúʼiri wa foro inji zənə mba aghəy uboro, 10nji umbən ujum foro ba izrel ujum mbən kyay kwi anóm ŋunə utem itən ifigi nə usi boro kwaʼa anji chuŋ amə anjim ikay zənə imə́ akə ukum Yeso Kristo wa Nazared ŋunə mbən komo azad abaʼaray anigə Nwiye zəmə uŋwən 11Yeso wu amə
‘Itey zənə mbə́ chimə na tono
Nu ibeŋe akə itey ijugi na’.
12Cha wa chini umi chi ba angəʼ damugə cha ukum chini igun isəg nu Nwiye sey kwi uchi ba angəʼ.” 13Amaʼazənə mbə́ zən umugə Pita nə Jon mə inay nə fiŋ kaka, i kyay kwi cha u di kyay uma aŋwaʼanayn, mbə yere. Mbə́ kyay kwi úŋwən mə́ yeŋ aboʼo Yeso. 14Umugə mbə́ zən anóm ŋunə Pita nə Jon zwey u təm iyad uma, amə cha anó chini abú úŋwən ighayn. 15Anigə mbə́ ghayn abú Pita nə Jon kwi u duw ungɨŋ na usaʼa wu iŋu isəg. Amaʼazənə mbə́ du iŋu isəg, u ti ni ghayn akaʼa uma kwi, 16“Mba mi ghini ngiya nə anóm mbənə? Ba ujum Yerusanem si kyay kwi mbə aghəy ayere anó kyayn, cha inji amə aghəy mba ton. 17Anigə ikən anó zəŋ kwi ka mə nə saŋa ŋuw ma imbey abú ba, mba chere úŋwən kwi ka umə nə ghayn uma anó moʼ akə ukum Yeso. 18Amaʼazənə mbə́ ghayn nigə, mbə́ gha tiya Pita nə Jon ungɨŋ na chede úŋwən kwi ka uni ghayn uma anó moʼ kə itey anó moʼ akə ukum ŋunə.” 19Anigə Pita nə Jon ywiri abú úŋwən kwi, “mbən saʼ umbən umbən kwi yə kəʼ ifigi Nwiye iwumini gwen kə iwumine Nwiye? 20Cha mba mi ton ighayn anó zənə mba zəw gha zən. 21Amaʼazənə mbə́ ghayn nigə, mbə́ saʼa abey wu chere úŋwən akə ika sayn úŋwən kwi u ŋuw. Amə cha inji inaʼa ingəʼ abú úŋwən damugə ba ujum mə yere Nwiye da anó zənə aduw. 22Anom ŋunə mbə aghəy ayere anó zəŋ izwey uŋwən si chigə ituʼ ighumi kyugə.
Ba Kristo chaʼara Nwiye kwi u naʼa fiŋ kaka abú úŋwən
23Amaʼazənə mbə́ sayn Pita nə Jon, mbə noʼ iŋu aboʼo ba uma pey yi ghayn unó mbənə utəw ambəŋ Nwiye nə ba kyayn ungɨŋ abey ghayn abú uŋwən. 24Amaʼazənə mbə́ zəw unó wu, mbə́ fere ichaʼara Nwiye ighayn kwi, Asɨyisəg amə ngwə tana azobo, isəg nə iba foro u aghəy mbənə umə ungɨŋ usin mbəŋ ujum. 25Ngwə chigə anjim Azugə zayn zayn aghəy ungwa mbaʼ ufon Dafid ngwə wa faʼa u ghayn kwi,
‘Ba mbənə akama ba Jû umə isɨy itəm da ingiya?
Umə́ kaʼa ikono duw da ngiya?
26Ifon akə isəg si tana inyo uma
Mbə́ tumə ba si fere
izaʼa kwi mbi zoŋo
Asɨyisəg foro wa ŋunə u zoʼo.’
27Akə asiʼ Herod nə Paled foro nə ba mbənə akama ba Jû foro nə ba Izre fere ungɨŋ asin zəŋ itə́ unaŋ da Yeso ungwə wa faʼa zayn zayn ŋunə ngwə zoʼo. #Luk 23.7-11; Mat 27.1, 2; Mak 15.1; Luk 23.1; Jon 18.28, 29 28Boʼo ighəy unó ujum mbənə ngwə si kaʼ akə inji ika for akə inji kono kwi umbi num usin. 29Akinine, Asɨyisəg zən umugə umə sə foŋoro ngwa. Ighəy kwi u mba umbə ba faʼa mba ghayn inji inayn nə fiŋ kaka. 30Sá injə abugə ighəy kwi ba zwey ba, ighəy unwini unó for uyere unó akə ukum Yeso Kristo ungwə wa faʼa zayn zayn.”
31Amaʼazənə mbə chaʼara Nwiye mara, asin zənə mbə́ fere akəŋ mə nyiʼere. Azugə zayn zayn sugi ungɨŋ uma ujum anigə mbə ti ni ghayn inayn Nwiye nə fiŋ kaka.
Ba mbənə mbə́ beni Kristo mə ghaba ughəy ma
32Ba mbənə mbə́ beni Kristo mə aba nə fiŋ feyn foro nə ikoni feyn. Cha wa moʼ yə ghayn ma kwi u aghəy mbənə umə iniy amə umbi mbə foro u aghəy ma ujum akə feyn.#Ifa 2.44, 45 33Nə ika kyay, ba tom Kristo mə ghayn da mugə Asɨyisəg Yeso zəmə. Ichoŋ Nwiye mə igun uma ujum. 34Amə cha wa moʼ akaʼa uma yə bəw aghəy moʼ damugə ba mbənə mbə́ mə́ ni imbayn kə ina fənə inum ukab ŋunə mbə́ fənə awu 35ŋu niŋi ifigi ba tom wu usi num ighaba akə inji zənə wa feyn feyn abəw. 36Anigə, Josef nu ba tom cho uŋwən akə Banabas (aton akə ukum wu amə kwi ŋwə̂ anóm ŋunə umə zi ika) yə duw unebey levi, mbə́ ibə́ uŋwən Sayiprus, 37yə fənə imbayn ma ŋu nə ukab wu pey yi niŋi ifigi ba tom wu.
© 2023 CABTAL
