GENESIS 48
48
Jakob Nih Josef Fapa Thluachuah A Pek Hna
(Heb 11.21)
1Cu hnu tlawmpal ah cun Josef cu, na pa a zaw, tiah an chimh. A fapa pahnih Manasseh le Efraim kha aa kalpi hna i a pa cu an va zoh. 2Jakob cu, na fapa Josef kha nangmah zoh ah a ra, tiah an chimh tikah, a hun i hrim i ihkhun cungah cun a ṭhu. 3Jakob nih Josef cu a thawh i, “Lianngan Bik Pathian cu Kanaan ram Luz khua ah ka sinah a lang i thluachuah a ka pek. #Gen 28.13-14 4A ka thawh i, ‘Fa tampi kan pek lai i na tefa cu miphun tampi ah an i chuah lai; hi ram hi na tefa cu ka pek hna lai i an ram zungzal in a si lai,’ a ti. 5Na fapa pahnih, hika i ka rat hlanah Izipt ram i na rak hrinmi hna zong kha keimah ta an si; Reuben le Simeon kha ka fa an si tluk tein Efraim le Manasseh zong hi ka fa an si lai. 6Sihmanhsehlaw anmah hnu i na hrinmi hna na fale cu nangmah ta an si lai; asinain ro kongah cun an ule min sinah khan rel chih an si lai. 7Zeicahdah hi bantukin ka tuah ti ahcun Mesopotamia ram in ka ra kir lioah keimah ngaihchiattertu dingah na nu Rachel nih lampi ah Kanaan ram chung Efrath khua kan hei phak deng ah khan a ka thihtak caah a si. Cun amah cu Efrath lei kalnak lam ah cun ka vui,” tiah a ti. (Efrath cu Bethlehem a si). #Gen 35.16-19
8Israel nih Josef fapale kha a hmuh hna tikah, “Hi ngakchia hi ahodah an si?” tiah a ti. 9Josef nih, “Pathian nih Izipt ram ah a ka pekmi ka fapa an si,” tiah a leh. Israel nih cun, “Ka sinah ratpi hna law thluachuah ka pek hna lai,” a ti. 10Israel cu a tar cang caah a mit khua a hmu kho set ti lo. Josef nih a pawngah cun a hei kalpi hna i a rak pom hna i a rak hnamh hna. 11Israel nih Josef cu, “Nangmah hi kan hmuh ṭhan ti lai tiah ka rak ruat lo, sihmanhsehlaw atu cu Pathian nih na fale hmanh a ka hmuhter hna,” a ti. 12Cun Josef nih Israel phei cung cun a ṭhial hna i a hmaiah cun a kun.
13Josef nih an pahnih in an kut in a tlaih hna. Efraim kha a orhlei kut in a tlaih, zeicahtiah Israel kehlei ah um seh ti a duh, Manasseh kha a kehlei kut in a tlaih, zeicahtiah Israel orhlei ah um seh ti a duh, cuticun Israel sinah cun a hei kalpi hna. 14Sihmanhsehlaw Israel nih khan a kut cu a rak kalhkeh hna i a orhlei kut cu ngakchia deuh a simi Efraim lu cungah khan a chiah i a kehlei kut cu upa deuh a simi Manasseh lu cungah khan a chiah. 15Thluachuahnak a pek hna i:
Ka pu Abraham le ka pa Isak,
a hmaiah a rak umtertu hna
Pathian nih hi ngakchia hi
thluachuah pe ko hna seh.
Nihin ni tiangin a ka hruai zungzaltu
Pathian nih thluachuah vanluh
pe ko hna seh.
16Harnak phun zakip chungin
a ka chuahtu vancungmi nih
thluachuah pe ko hna seh.
Keimah ka min le ka pu Abraham
min le ka pa Isak min cu
an chungah hin nung seh.
Fa tampi ngei hna seh law bu nganpi
ah i chuah hna seh,” a ti.
17A pa nih Efraim lu cungah a orhlei kut a chuan kha Josef nih a hmuh tikah a awlok a chong i cucaah a pa kut cu Efraim lu cung khan a lak i Manasseh lu cungah a chiah. 18A pa cu, “Ka pa, hitihin cun a si lai lo. Hi pa hi pei upa deuh a si cu, amah cungah hin ta na orhlei kut kha na chiah,” a ti. 19A pa nih cun a duh lo i, “Ka fa, ka hngalh ko. Manasseh tefa hna zong hi mi lianngan an si ko lai. Asinain a nau pa cu amah nakin a ngan deuh lai a tefa cu miphun lianngan pipi ah an i chuah lai,” a ti.
20Cucaah cu ni ah cun thluachuah cu a pek hna i, “Israel mi hna nih thluachuah an i pek tikah, nan min kha an hman hna lai i, ‘Pathian nih Efraim le Manasseh bantuk, in siter hna seh,’ an i ti lai,” a ti. Cuticun Jakob nih Efraim cu Manasseh hmaiah a chiah. #Heb 11.21 21Cun Israel nih Josef cu, “Ka thi dengmang cang ti cu na hngalh. Asinain Pathian nih an umpi lai i na pupa hna ram ah khan an kirpi ṭhan lai. 22Na unau a dang ahohmanh si loin nangmah kha ram ṭhatnak i a ummi Amor mi hna sinin ka nam le ka li in ka lakmi Shekem#48.22: Shekhem ti cu hmun ṭha ti le tlangpang tinak a si. kha kan pek,” a ti.
Currently Selected:
GENESIS 48: HCL06
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Lai (Hakha) Common Language Bible © Bible Society of Myanmar 2006