GENESIS 46
46
Jakob Le A Chungkhar Izipt Ah An Kal
(Exo 6.14-25)
1Israel nih a ngeihmi thil vialte cu a timh dih i Beer-sheba ah a kal, khika ah a pa Isak Pathian sinah khan raithawinak a tuah. 2Pathian nih Israel cu zan ah langhnak in a chawnh i, “Jakob, Jakob,” a ti i anih nih, “Asi, na salpa nih ka ngaih ko,” tiah a leh. 3“Keimah cu Pathian, na pa i a Pathian ka si. Izipt ram kal cu ṭih hlah; cuka ah cun na tefa hna cu miphun ngan ah ka ser hna lai. 4Izipt ram ah cun ka vun in kalpi lai i na tefa cu hika ah hin ka kirpi ṭhan hna lai. Na thih tikah Josef nih an umpi lai,” a ti.
5Jakob cu Beer-sheba khan aa thawh. Israel fapa hna nih khan an pa Jakob le an fale a hmemi hna le an nupile hna kha Faro nih an i cit awk ca i a kuatmi rangleng chungah khan an citter hna. 6An saṭil hna le an ngeihmi thil, Kanaan ram chung i an hmuhtonmi vialte he khan Izipt ram ah cun an kal. Jakob nih khan a tefa vialte cu aa kalpi dih hna: #Lam 7.15 7a fapa hna he a fapale fa hna he a fanu hna he a fanu fale hna he aa kalpi dih hna.
8Israel tefa Izipt ram ah a vung kalmi hna cu an min hihi an si. Jakob le a fapa hna cu: Jakob fapa upa bik Reuben, 9cun Reuben fapa hna cu: Hanok, Pallu, Hezron le Karmi. 10Simeon fapa hna cu: Jemuel, Jamin, Ohad, Jakhin, Zohar, le Kanaan minu fapa Shaul. 11Levi fapa hna cu: Gershon, Kohath le Merari. 12Judah fapa hna cu: Er, Onan, Shelah, Perez le Zerah (Er le Onan cu Kanaan ram ah an thi). Perez fapa cu Hezron le Hamul an si. 13Isakhar fapa hna cu: Tola, Puvah, Job le Shimron. 14Zebulun fapa hna cu: Sered, Elon, le Jahleel. 15Hi hna hi an far Dinah he, Mesopotamia ram ah Leah nih Jakob a hrinpiakmi kha an si. An dihlak ah Leah nih a hrinpiakmi a tefa cu sawm thum le pathum an si.
16Gad fapa hna cu: Zefon, Haggi, Shuni, Ezbon, Eri, Arodi, le Areli. 17Asher fapa hna cu: Imnah, Ishvah, Ishvi, Beriah, le an far Serah. Beriah fapa hna cu Heber le Malkhiel an si. 18Hi hleiruk hi Zilpah nih Jakob a hrinpiakmi tefa an si; Zilpah cu Laban nih a fanu Leah a kalhmi kha a si.
19Jakob nupi Rachel fapa cu Josef le Benjamin an si. 20Izipt ram ah On khua tlangbawi Potifera fanu Asenath nih khan Izipt ram ah Josef cu Manasseh le Efraim a hrinpiak hna. #Gen 41.50-52 21Benjamin fapa hna cu: Bela, Bekher, Ashbel, Gera, Naaman, Ehi, Rosh, Muppim, Huppim, le Ard. 22Hi pahleili hna hi Rachel nih Jakob a hrinpiakmi tefa an si.
23Dan fapa cu Hushim a si. 24Naftali fapa hna cu: Jahzeel, Guni, Jezer, le Shillem. 25Hi pasarih hi Bilhah nih Jakob a hrinpiakmi tefa an si; Bilhah cu Laban nih a fanu Rachel a kalhmi kha a si.
26Jakob tefa Izipt ram i a kalmi kha a fapale nupi hna rel loin sawm ruk le paruk an si. 27Izipt ram ah khan Josef nih fapa pahnih a hrin hna i Jakob innchungkhar mi dihlak Izipt ram i a kalmi cu sawm sarih an si. #Lam 7.14
Izipt Ram Ah Jakob le A Tefa
28Jakob nih Judah kha Goshen ram i rak kal chung awkah Josef sinah a thlah. Goshen ram kha an phak tikah 29Josef nih cun a rangleng kha a timhter hna i a pa Israel don awkah khan Goshen ah cun a kal. An i ton tikah a pa cu a hngawng in a kuh i a kuh bu cun saupi a ṭap. 30Israel nih Josef cu a thawh i, “Nangmah kan hmuh cang hnu le na nung rih ti ka theih hnu paoh ah cun ka thih zongah zeihmanh a poi ti lo,” a ti.
31Cun Josef nih a unau hna le a pa innchungkhar mi hna cu, “Ka unau pawl le ka pa innchungkhar mi Kanaan ram i a ummi kha ka sin an ra phan cang. 32Annih cu tuukhal an si i saṭil kha an khal hna; an tuurun vialte le an saṭil run vialte hna le an ngeihmi thil vialte hna kha an rak i ratpi hna,’ tiah Faro kha ka va chimh a hau lai. 33Cun Faro nih an auh hna i ‘Nan rianṭuanmi zeidah a si?’ tiah an hal hna tikah, 34‘Kannih cu bawipa, kan pupa nih an rak tuah tawn bangin kan no lio tein saṭil zohkhenh kan si,’ nan ti lai. Cu ti nan ti ahcun Goshen ram ah hin nan um kho lai,” a ti hna. Hi bangin a chimh hna cu Izipt mi nih khan tuukhal paoh cu an duh hna lo caah a si.
Currently Selected:
GENESIS 46: HCL06
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Lai (Hakha) Common Language Bible © Bible Society of Myanmar 2006
