GENESIS 42
42
Josef Unau Izipt Ah An Kal
1Jakob nih Izipt ram ah rawl a um ti kha a theih tikah a fapale kha a thawh hna i, “Zeicahdah zeihmanh tuah loin hika ah hin nan dir ko. 2Izipt ram ah rawl a um ti kha ka theih; cuka ah cun vung kal u law mangṭam in kan thih nakhnga lo vung kan cawkpiak u,” a ti. #Lam 7.12 3Cucaah Josef ule pahra kha Izipt ram i rawl vung cawk awkah khan an kal. 4Jakob nih Josef chuahpi Benjamin kha cu a kalter lo, a thi sual lai ti a phang.
5Kanaan ram i mangṭam a tlun caah cun Israel fapa hna cu midang he khan rawl cawk ah cun an ra ve. 6Josef nih cun Izipt ram uktu a si bantukin rawl cu vawlei cung mi vialte kha a zuarh hna. Cucaah Josef ule zong cu an ra i a hmaiah cun an kun. 7Josef nih a ule kha a hmuh hna tikah a rak hngalh hna, asinain a hngal lo bantukin aa umter. Biahrang ngaiin a chawnh hna i, “Khuazei in dah nan rat?” a ti hna. Annih nih, “Rawl cawk ah Kanaan ram in kan ra,” tiah an leh.
8Josef nih khan a ule cu a rak theih ko hna, sihmanhsehlaw annih nih cun an hngal lo. 9Anmah kong i mang a manhmi kha a hun hngalh i, “Mingiatu nan si; kan ram a dernak zawn kawl awkah nan ra,” a ti hna. #Gen 37.5-10 10Annih nih, “Asilo, bawipa, na salle hi rawl cawk ah kan ra ko. 11Kan dihlak hin unau chuakkhat kan si. Mingiatu kan si lo, bia hmaan a chimmi kan si, bawipa,” tiah an leh. 12Josef nih cun, “A si lai lo! Kan ram hi khuazeika zawn dah a der ti ngiat duh ah nan ra ko,” a ti hna. 13Annih nih, “Bawipa, kannih hi unau hleihnih chuak kan si, pa khat hrin kan si i kan pa cu Kanaan ram i a ummi a si. A ngakchia bik cu atu hi kan pa sinah a um i pakhat cu a thi cang,” an ti. 14Josef nih cun, “Ka chimning te cu nan si ko. Mingiatu nan si ko. 15Nan si si lo hngalhnak ah kan hneksak hna lai: Faro min chalh in chiat ka ser, nan nau hniang bik hika i a rat hlan cu nan kir kho lo. 16Cucaah cun mi pakhat i thlah u law amah cu va ko u. Nan chimmi bia hi a hmaan le hmaan lo aa hliah hlan cu a dang cu thong ah nan um lai. Cu ti a si lo ahcun, Faro min chalh in, mingiatu nan si hrimhrim ko,” a ti. 17Cuticun thong ah ni thum a thlak hna.
18A ni thumnak ni ah Josef nih a thawh hna i, “Kei cu Pathian biami ka si caah hi ka chimmi nan tuah ahcun nan nunnak cu nan luat lai: 19Nannih cu lihchim lomi nan si ahcun, thong i an in thlak hnanak inn ah khan pakhat lawng nan taang lai i a dang cu rawl ei awk a ngei lomi nan innchungkhar hna sinah khan nan rawl cawkmi cu nan hei phor lai. 20Nan nau hniang bik kha biatak nan ka chim maw chim lo ti fiannak ah nan ratpi hrimhrim lai i cu ti nan tuah ahcun thah nan si lai lo,” a ti. Annih zong, cu bantukin tuah awk cu an hna a tla. 21Pakhat le pakhat kha, “Kan nau cung i ṭhat lonak kan rak tuah kha kan rak palh taktak; ka bawm ko sawh u tiah a rak kan nawl i a harnak kan hmu ko na i a bia kan rak theih duh lo kha! Kha ruangah khan atu harnak kan phak hi a si,” tiah an i ceih. 22Reuben nih khan, “Ngakchiapa kha harnak pe hlah u kan ti hna i nan rak ngai duh lo cu ta. Atu cu amah thih ruangah khan hi ton kan tong,” a ti hna. #Gen 37.21-22 23Josef nih khan an chimmi cu a hngalh ko, sihmanhsehlaw anmah chawnhnak ah holh lettu kha a hman caah, annih nih cun kan chimmi a hngalh ti kha an hngal lo. 24Josef cu a kal i a ṭap. An sinah bia ka chim kho cang lai a tiin a ra kir i Simeon kha a thim i an hmaika ah cun a khih.
Josef Ule Kanaan Ah An Kir
25Josef nih an sawngkhoi ah rawl a khat tein nan rawnpiak hna lai, cun an tangka kha an sawngkhoi ah nan sanhpiak cio hna lai i riahcaw nan ronh cio hna lai tiah nawl a pek hna i a chim bang cun an tuahpiak hna. 26Unau rual nih khan an cawkmi rawl cu an laa kha an phorhter hna i an kal. 27Zan i an riahnak hmun ah khan ka laa rawl ka pe lai tiah pakhat nih a sawngkhoi kha a vun kau i a kaa ah a tangka kha a hmuh. 28“Ka tangka an ka khirh ṭhan ai e,” tiah a unau pawl kha a ti hna i, ‘Ka sawngkhoi chungah a rak um ko,” tiah a chimh hna. An khuaruah a har. Thinphang ngaiin pakhat le pakhat cu, “Pathian nih hin kan cungah zeidah a tuah hnga?” an i ti.
29Kanaan ram i an pa Jakob sin kha an phak tikah an cung i a tlungmi thil vialte kha an chimh: 30“Ram uktu bawi nih awhrang in a rak kan chawnh i kan ram ngiat awkah a rami nan si,” a kan ti. 31Kannih nih, “Mingiatu kan si lo, miding kan si. 32Unau hleihnih chuak kan si, pa khat hrin kan si. Pakhat nih cun a kan thihtak cang i a ngakchia bik cu kan pa sinah Kanaan ram ah a um,” kan ti. 33Cun mipa nih cun a kan thawh i, “Miding nan si le si lo cu hitin ta ka hngalh lai: Ka sinah pakhat nan taang lai i a dang cu mangṭam a ingmi nan innchungkhar hna rawl hei phorh awkah nan tlung lai. 34Cun nan nau hniang bik cu ka sinah nan ratpi lai. Cu ti nan tuah ahcun miding nan si, mingiatu nan si lo ti kha ka hngalh lai; nan unaupa kha kan pek ṭhan hna lai i hi ram chungah hin chaw nan let kho lai, a kan ti,” an ti.
35An sawngkhoi kha an vun tlen cio tikah an phaisa sawngkhoi cio kha an sawngkhoi chung cio ah cun an rak um; an phaisa sawngkhoi kha an hmuh hna tikah anmah he an pa he an thin a phang. 36An pa Jakob nih cun a thawh hna i, “Fa loin pei nan ka chiah lai hi. Josef a lo cang; Simeon a lo cang; atu Benjamin zong kalpi nan duh fawn. A ingtu cu keimah ṭheo ka si ko,” a ti. 37Reuben nih a pa cu a thawh i, “Benjamin kha na sin i ka kirpi ṭhan lo ahcun ka fapa pahnih kha na thah khawh hna. Keimah ṭuanvo ah chia ko, ka rak kirpi hrimhrim lai,” a ti. 38Asinain Jakob nih, “Ka fapa nih cun an zul kho hna lo; a u a thi cang, amah lawng a tang. Lampi ah a thi sual hnga. Ka cung i nan tlunter sual ding ngaihchiatnak hi ka ing kho lai lo; ka tar tuk cang, a ka thah sual lai,” a ti.
Currently Selected:
GENESIS 42: HCL06
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Lai (Hakha) Common Language Bible © Bible Society of Myanmar 2006