GENESIS 40
40
Josef Nih Mang A Leh
1Cu hnu tlawmpal ah Izipt siangpahrang cu din awk lei khuakhangtu bawi le changreu sertu bawi upa bik nih khan a lung an tong lo. 2Faro cu a bawi pahnih hna cungah cun a thin a hung i 3Josef an chiahnak hmun, inn cawngtu hna haotu bawi inn ah khan thong ah an thlak ve hna. 4Inn cawngtu hna haotu bawi nih khan an rian ṭuanpiaktu dingah Josef cu an sinah khan a chiah. Thong chungah cun saupi an um.
5Zan khat cu Izipt siangpahrang din awk lei khuakhangtu bawi le changreu sertu nih cun thong chungah cun mang an manh veve i sullam an ngei veve. 6Zinglei i Josef cu an sin i a rat tikah khan an lungre a thei ti kha a hmuh hna. 7“Zeicahdah nihin cu nan ngaih a chiat ko?” tiah a ti hna. 8Annih nih, “Mang pakhat veve kan ngei i a kan lehpiaktu ahohmanh an um lo,” tiah an leh. Josef nih cun, “Mang lehnak a pe khotu cu Pathian a si. Nan mang cu ka chim tuah u,” a ti hna.
9Cucaah din awk lei khuakhangtu nih a mang cu a vun chim i, “Ka mang ah hin ka hmaiah mitsur ruang ruang khat a um i 10nge pathum a ngei. A hnah an corh cangka khin a par kha an hung chuak colh i a thei cu an hung hmin colh. 11Faro hrai kha kaa put i mitsur thei cu ka lawh hna i hrai chungah cun ka sur hna i Faro cu ka pek,” a ti. 12Josef nih cun, “Hihi a sullam cu a si: a nge nge thum cu ni thum tinak an si. 13Ni thum chungah Faro nih an chuahter lai i an ngaihthiam lai i na hmun ah an chiah ṭhan lai; Faro cu a zu bawi na rak si lio i na rak pek tawn bang khan a hrai cu na pek ṭhan lai. 14Cu bantukin na caah thil kalning a tluan tikah ka philh hlah law ka kong kha Faro sinah chimpiak va ka philh hlah. Hi thong chung hin ka luatter ve te. 15A ngaingai ti ah cun kei cu Hebru ram hin hramhram in an rak ka tlaih i hika zongah hin thong tlaknak ding tlak zeihmanh ka tuahmi a um lo,” a ti.
16Changreu sertu upa bik nih zu bawi mang sullam kha a ṭha lei a si ti a hmuh tikah Josef cu a thawh i, “Kei zong mang ka ngei ve; ka mang ah cun ka lu ah changreu bawm pathum kaa khinh i 17a cung bik bawm ah cun Faro ca changreu a phunphun a um; asinain va nih khan an rung ei hna,” a ti. 18Josef nih cun, “Hihi a sullam cu a si: bawm pathum cu ni thum tinak a si; 19ni thum chungah Faro nih an chuah lai i na lu an tan lai. Cun na ruak kha thingkung ah a thlai lai i va nih na sa kha an ei lai,” a ti.
20A ni thum ni ah cun Faro chuah ni kha a hung si, a bawi vialte hna caah rawl danghnak pakhat a ser i a zu bawi le a changreu sertu upa bik kha a bawi vialte hna hmaiah cun a chuahter hna. 21Zu bawi kha hmasa a rianṭuannak hmun ah khan a chiah ṭhan i 22changreu sertu upa bik kha a thlai. Josef nih an mang a sullam a chimning bantuk te khan a si taktak. 23Asinain zu bawi nih khan Josef kha cu a ruat ti lo, a philh diam ko.
Currently Selected:
GENESIS 40: HCL06
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Lai (Hakha) Common Language Bible © Bible Society of Myanmar 2006