GENESIS 38
38
Judah le Tamar
1Cu caan ah cun Judah kha a unau pawl sin khan a chuak i Adullam khuami Hirah sinah a va um. 2Cuka ah cun Judah nih khan Kanaan mipa a min Shua a simi fanu pakhat a va hmuh. A ṭhit i a ihpi i 3fa a pawi. Fapa a hrin i a min ah Er a sak. 4Fa a pawi ṭhan i fapa a hrin ṭhan i a min ah Onan an sak. 5Cun fapa a hrin ṭhan i a min ah Shelah an sak. Shelah a hrin ah cun Judah cu Khezib ah a um.
6Judah nih a fapa upa bik Er kha nupi a ṭhitpiak i a nupi min cu Tamar a si. 7Er cu a ziaza a ṭhat lo caah Bawipa a cungah aa lawm lo i a thah. 8Cucaah Judah nih Onan cu a thawh i, “Na u nupi rohmi kha va ihpi. Vale unau rian a simi na rian kha va tlinter law cuticun na u nih tefa a ngei kho lai,” a ti. 9Asinain Onan nih khan fa kan hrinmi cu keimah ta an si lai lo ti kha a hngalh i cucaah cun a u nupi ro cu a ihpi fate a ci kha a pingah a chuahter i cucaah a u caah khan tefa a um kho lo. 10A tuahmi nih khan Bawipa cu a lawmhter lo caah amah zong cu a thah ve. 11Cun Judah nih khan a fapa nupi ro Tamar cu a thawh i, “Na pa inn ah va kir law ka fapa Shelah a upat hlantiang khika ah nuhmei in va um ko kun,” a ti. Hi ti a ti cu a ule bantukin Shelah zong kha a thi ve sual lai ti a phan caah a si. Cucaah Tamar cu a pa inn ah khan a kir i a um.
12Cu hnu tlawmpal ah Judah nupi Shua fanu kha a thi. Judah nih a nupi zunngaih caan kha a lim tikah a hawipa Adullam khuami Hirah he khan a tuu an hmul an meh hnanak khua Timnah ah khan an va kal. 13Tamar kha, “Na va i a pa Judah cu Timnah ah a tuu an hmul meh awkah a kal lai,” tiah mi nih an chimh. 14Cucaah a nuhmei thilthuam aa hrukmi kha aa thleng i hmaikhuh puan aa khuh i Timnah lei kalnak lam i a ummi Enaim khua luhnak hauka ah khan a rak ṭhu. Shelah cu a upa cang nain an ṭhitter duh lo ti kha a hngalh.
15Judah nih a hmuh tikah a hmai aa khuh caah hlawhhlangnu a si rua tiah a ruah. 16Lam pawngah cun a hei fuh i, “Ra tuah, it tuah u sih,” a ti. A fapa nupi ro a si kha a hngal lo. Tamar nih cun, “Zeidah na ka phalh lai?” a ti. 17Anih nih, “Ka meheh run chungin meheh no pakhat in ka rak in kuat lai,” a ti. Cun Tamar nih cun, “A ṭha ko, na rak ka kuat hlantiang biakamnak na ka pek paoh ahcun,” a ti. 18Biakamnak caah cun zeidah kan pek hnga? a ti. Tamar nih cun, “Na minkhenhnak kha a hri he, cun naa putmi na ṭhiangṭhunh kha,” a ti. 19A pek hnu cun a hmaikhuh puan kha aa hawh i nuhmei thilpuan kha aa hruk ṭhan.
20Nu sin khan a biakamnak thil lak ṭhan awkah a hawipa Adullam khuami Hirah cu meheh note kha a kuat, sihmanhsehlaw cu nu cu a hmu kho lo. 21Cuka mi cu, “Enaim khua lampawng i hlawhhlangnu kha khuazei ah dah a si?” a ti hna. “Cuka ah cun hlawhhlangnu an um bal ṭung lo,” tiah an leh. 22Judah sinah khan a va kir i, “Ka hmu kho lo, cuka ah hlawhhlangnu an um bal lo tiah cuka mi nih cun an ka ti,” a ti. 23Judah nih cun, “Thil kha lak vaa zuam hna hlah, mi nih an ka theih ahcun an ka nihsawh lai. Na hmuh khawh lo hmanh ah hi meheh note cu ka kuat ko hi ta,” a ti.
24Cu hnu thla thum tluk ah khin Judah cu, “Na fapa nupi ro kha fa a pawi,” tiah an chimh. Judah nih cun, “Khua lengah va chuahpi u law a khangh in va khang u,” a ti. 25An chuahpi lioah khin a va i a pa cu bia a hei cah i, “Fa a ka pawitertu cu hi thil hna a ngeitu hi a si. Rak zoh hna law aho ta dah an si — hi minkhenhnak le a hri le ṭhiangṭhunh hi,” a ti. 26Judah nih cun a rak hngalh zau hna i, “Tamar cu a hmaan. Palhnak a tuahtu cu keimah ka si; ka fapa Shelah kha ka rak ṭhitter awk cang a si,” a ti. Amah cu a ihpi ṭhan ti lo.
27A nithla a tlin tikah fa phir a pawi kha an hngalh. 28A ngan fah lioah khan pakhat nih a kut a hun chuah i nau hlawmtu nih khan a rak tlaih i, “Hi pa hi a chuak hmasami a si,” tiin la sen a khih. 29Asinain a kut cu a hnuh ṭhan i pakhat tu kha a chuak hmasa. Cun nau hlawmtu nih khan, “A! nangmah hi maw na chuak hmasa,” a ti. Cucaah a min ah Perez#38.29 PEREZ cu chuak tinak a si. an sak. 30Cu hnuah a nau cu a kut i hrisen he cun a hung chuak. A min ah Zerah#38.30 ZERAH cu a sen tinak a si. an sak.
Currently Selected:
GENESIS 38: HCL06
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Lai (Hakha) Common Language Bible © Bible Society of Myanmar 2006