GENESIS 29
29
Jakob Cu Laban Inn A Phan
1Jakob cu a kal lengmang i nichuahlei mi hna ram cu a phan. 2Lo ah khin tikhor pakhat a hei hmuh i a pawngah cun tuu run thum nih an bawhhnawh ko. Tuurun cu cu tikhor ti cu an dinh tawn hna i cu tikhor cu a chin ah lung nganpi a si. 3Tuurun vialte kha an pumh dih hna tikah tuukhal pawl nih khan a chin lung cu an thawn tawn i ti cu an dinh tawn hna. Cun lung cu a umnak ah khan an chiah ṭhan tawn.
4Jakob nih annih cu a thawh hna i, “Ka duale, khuazei mi dah nan si?” a ti hna. Annih nih, “Haran khuami kan si,” an ti. 5Cun, “Nahor fapa Laban kha nan hngalhmi a si maw?” a ti hna i annih nih, “Asi, kan hngalhmi a si,” an ti. 6“A dam tah a dam maw?” tiah a hal hna i, “A dam ko. Zohhmanh, a fanu Rachel kha a tuurun he an ra khih,” tiah an leh. 7Cun Jakob nih cun, “Atu cu ni a sangpi rih i saṭil run khumh a cut rih lo caah, zeicahdah ti nan dinh hna lo i nan thlah rih hna lo?” tiah a ti. 8Annih nih, “Tuurun vialte kha kan pumh dih hlan hna le lung chin kha kan i bawmh lulhmalh i kan thawn hlanah cun, cucu kan tuah kho lo; cu hnu lawngah cun kan tuurun cu ti kan dinh khawh hna lai,” an ti.
9Cu bantukin Jakob nih bia a ruah lio lengmang hna ah cun Rachel kha a pa tuurun he khan a ra phan ve. Rachel cu a pa tuurun a zohkhenhtu kha a si. 10Jakob nih a nu ṭa Laban tuurun he Rachel cu a hmuh tikah tikhor ah khan a va kal i lung kha a thawn i tuu kha ti a dinh hna. 11Cun Rachel kha a hnamh i a ṭap. 12Rachel cu a thawh i, “Kei cu na pa far Rebekah fapa ka si,” tiah a ti. Cu kong cu a pa va chimh awkah Rachel cu a tlik in a tli i 13a pa nih a far fapa Jakob kong cu a theih tikah amah ton awkah cun a ra le ve. A kuh i a hnamh i a inn ah khan a luhpi. Cun Jakob nih Laban cu thil umtuning vialte kha a chimh. 14Laban nih cun a thawh i, “Asi, nangmah cu ka thi le ka sa taktak na si,” tiah a ti. Cuka ah cun Jakob cu thla khat pumte a um.
Jakob Nih Laban Fanu A Ṭhit
15Laban nih Jakob cu, “Ka rualchan na si ai pat tiin alak in ka rian ṭuan cu a ṭha hnga lo. Zeizat dah kan pek hnga?” a ti. 16Laban nih cun fanu pahnih a ngeih hna i a upa deuh cu a min ah Leah a si i a ngakchia deuh cu Rachel a si. 17Leah cu aa dawh tuk lo, Rachel tu cu a tungtai a ṭha i aa dawh ngaingai. 18Jakob nih cun Rachel cu a duh i, “Kum sarih in kan rianh lai i na fanu a ngakchia deuh Rachel hi na ka pek lai,” a ti 19Laban nih cun, “Midang peknak cun nangmah pek cu ka duh deuh. Cucaah cun ka sinah cun um,” tiah a ti. 20Rachel conak dingah cun Jakob nih khan kum sarih cu rian kha a ṭuan i asinain a dawt caah khan cu kum sarih cu ni tlawmte bantuk men ah khin a rel ko.
21Jakob nih cun Laban cu, “Ka caan a tling cang, na fanu cu ka pe cang kun law ṭhi cang ning,” a ti. 22Cucaah Laban nih nupi ṭhitnak puai a tuah i cuka mi vialte cu a sawm hna. 23Sihmanhsehlaw cu zan ah cun Rachel kha si loin Leah tu kha Jakob sinah cun a hei kalpi i Jakob nih a rak ihpi. 24(Laban nih cun a salnu Zilpah kha a fanu Leah cu a kalh). 25A thaizing ah cun Jakob nih Leah a si kha a hngalh. Laban cu a thawh i, “Zeicahdah hi bantukin ka cungah na tuah? Rachel pek dingin pei na rian cu ka ṭuan cu, zeicahdah na ka hlen kun?” a ti. 26Laban nih cun, “Hika ah hin cun u le hlanah naule nih va ngeih phung a si lo. 27Nan i ṭhitnak puai zarh khat chung hi tlinter ko law cucu a dih in kum sarih na ka rianh rih dingah cun Rachel cu kan pek lai,” a ti. 28Jakob cu a hna a tla i ṭhitumnak zarh cu a dih tikah, Laban nih a fanu Rachel cu nupi ah a pek. 29(Laban nih a salnu Bilhah kha a fanu Rachel cu a kalh). 30Cucaah Jakob nih khan Rachel zong cu a ihpi i Leah nakkhan a dawt deuh. Laban cu a dang kum sarih a rianh ṭhan.
Jakob Hrinmi Fale Hna
31 Bawipa nih Leah cu dawt lo deuh a si kha a hmuh tikah anih tu kha fa ngeih khawhnak a pek i Rachel kha cu fa ngei loin a um ko. 32Leah cu fa a pawi i fapa a hrin. Aa thawh i, “Bawipa nih ka harnak kha a ka hmuhpiak cang, atu cu ka va nih a ka dawt cang lai,” a ti; cucaah a min ah Reuben#29.32 REUBEN ti min hi Hebru holh i hmuh ti bia he a awchuah an i lo. a sak. 33Fa a pawi ṭhan i a dang fapa a hrin ṭhan. “Kei cu dawt lomi ka si kha Bawipa nih a theih caah hi fapa hi a ka pek ṭhan,” a ti i cucaah a min ah Simeon#29.33 SIMEON ti min hi Hebru holh i theih ti bia he a awchuah an i lo. a sak. 34Fa a pawi ṭhan i fapa a hrin ṭhan. “Atu cu fapa pathum ka hrinpiak cang caah ka va hi ka sinah fek deuh in aa ṭem cang lai,” a ti i cucaah a min cu Levi#29.34 LEVI ti min hi Hebru holh i ṭem ti bia he a awchuah an i lo. a sak. 35Fa a pawi ṭhan i fapa a hrin ṭhan. “Atu cu Pathian ka thangṭhat lai,” a ti i cucaah a min cu Judah#29.35 JUDAH min hi Hebru holh i thangṭhat ti bia he a awchuah an i lo. a sak. Cun fapa a ngei ti lo.
Currently Selected:
GENESIS 29: HCL06
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Lai (Hakha) Common Language Bible © Bible Society of Myanmar 2006