GENESIS 21
21
Isak Chuahnak
(Heb 11.11)
1 Bawipa nih bia aa kam bang khan Sarah cu a bawmh i 2fa a pawi i Abraham kha a tar hnuah fapa a hrinpiak. An fapa cu Pathian nih a chimmi caan te ah khan a chuak. #Heb 11.11 3Abraham nih a min ah Isak a sak. 4Isak cu ni riat a si tikah, Pathian nih a fial bang khan Abraham nih cun a cuarpar a tan. #Gen 17.12; Lam 7.8 5Isak a chuah ah Abraham cu kum za khat a si. 6Sarah nih cun aa thawh i, “Pathian nih lawmhnak le nihnak a ka pek. Cu kong a theimi paoh nih an ka nihpi lai,” a ti. 7Cun aa thawh ṭhan i, “Ahohmanh nih Abraham cu, Sarah nih fano a cawm te hna lai, tiah an rak chim kho lai lo. Asinain a tar lei sang ah fapa pakhat ka hrinpiak ko,” a ti.
8Ngakchia cu a ṭhang i a hnuk thlah ni ah Abraham nih puai nganpi a serpiak.
Hagar le Ishmael A Ṭhawl Hna
9Ni khat cu Izipt minu Hagar nih Abraham a hrinpiakmi fapa Ishmael kha Sarah fapa Isak he cun lente an i celh. 10Cucu Sarah nih a hmuh i, “Hi salnu le a fapa hi ṭhawl hna. Ka fapa Isak nih a co awk hnga a simi na chawva vialte hi, hi salnu fapa nih hin a tinco ve awk a si hrimhrim lo,” a ti. #Gal 4.29-30 11Hi nih hin Abraham cu a lungre a theihter ngaingai, zeicahtiah Ishmael zong cu a fapa a si ve. 12Sihmanhsehlaw Pathian nih Abraham cu a thawh i, “Ngakchiapa le na sal Hagar kongah lungrethei in um hlah. Sarah nih an chimhmi paoh cu tuah ko, zeicahtiah tefa kan kamhmi cu Isak chung hin an chuak lai. #Rom 9.7; Heb 11.18 13Na salnu fapa zong kha tefa tampi ka pek ve lai i miphun pakhat an tling ve lai, amah zong cu na fapa pei a si cu,” a ti.
14A thaizing cu zingka tein Abraham nih Hagar cu rawl tlawmpal le saphaw tithawl ti a khat tein a ummi kha a pek i nau kha a puakter i a kalter hna. Hagar cu Beer-sheba ramlak ah khan a vai lengmang. 15Ti cu a dih tikah ngakchia cu burbuk pakhat toiah a chiahtak i 16lam hla nawn, thal kah phak hrawng khin a hngah. “Ngakchia a thih cu ka hmu ngam lo,” a ti i cuka i a ṭhut lioah cun fak piin a ṭap.
17Pathian nih ngakchiapa a ṭah cu a run theih i vancung in Pathian vancungmi nih khan Hagar cu a run chawnh i, “Hagar, zeicahdah na lungre a theih? Na thinphang hlah. Pathian nih ngakchiapa a ṭah kha a theih cang. 18Tho law va kal law va cawi law va pom. A tefa cu miphun nganpi ah ka ser hna lai,” a ti. 19Cun Pathian nih Hagar cu a mit kha khua a hun hmuhter i tikhor pakhat a hmuh. A va kal i ti thawl khan ti cu a va than i ngakchiapa kha a dinh. 20Ngakchiapa cu Pathian nih a umpi i a ṭhang i Paran ramlak ah khan khua a sa; amah cu sakah thiam ngaimi a hung si. 21A nu nih Izipt ram in nupi a ṭhitpiak.
Abraham le Abimelek Biakamnak
22Cu caan ah cun Abimelek cu a ralbawi ngan bik Fikol he khan Abraham sinah cun an va kal i, “Na tuahmi thil kip ah Pathian nih an umpi. #Gen 26.26 23Cucaah cun keimah siseh ka fale si hna seh ka tefa si hna seh, na kan hlen nakhnga lo Pathian hmaiah hin bia i kam. Kei cu na cungah zumhawktlak in ka um, cu bantuk cun nang zong ka cung le na umnak ram cungah hin zumhawktlak na si nakhnga bia i kam,” a ti. 24Cun Abraham nih, “Kaa kam,” a ti.
25Abraham nih Abimelek cu Abimelek sinum pawl nih an chuhmi tikhor kong kha a chimh. 26Abimelek nih cun, “Cucu ka hngal lo. Na rak ka chim lo i atu hi ka theih hmasa bik a si,” a ti. 27Cun Abraham nih Abimelek cu tuu le caw tlawmpal a pek i an pahnih in biakamnak an ser. 28Abraham nih tuufa pasarih kha a tuurun chungin a dang tein a chiah hna i 29cucu Abimelek nih, “Zeicahdah kha ti khan na tuah?” tiah a hal. 30Abraham nih cun, “Hi tuufa pasarih hi na ka cohlan hrimhrim hna lai. Zeicahtiah cu ti na ka cohlannak nih cun, hi tikhor a cotu hi keimah ka si kha a langhter lai,” tiah a leh. 31Cucaah cuka hmun cu a min ah Beer-sheba ti a si, zeicahtiah an pahnih in biakamnak an tuahnak cu cuka ah cun a si.
32Beer-sheba ah biakamnak kha an tuah dih cun, Abimelek le a ralbawi ngan bik Fikol cu Filistin mi hna ram ah khan an kir ṭhan. 33Cun Abraham nih Beer-sheba ah cun thingkung pakhat a phun i Bawipa, Zungzal Hmunmi Pathian kha a biak. 34Filistin mi hna ram ah cun Abraham cu saupi a um.
Currently Selected:
GENESIS 21: HCL06
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Lai (Hakha) Common Language Bible © Bible Society of Myanmar 2006