GENESIS 17
17
Cuarpartan, Biakamnak Hmelchunhnak
(Exo 12.43—13.2)
1Abram cu kum sawm kua le kum kua a si tikah Bawipa cu a sinah a lang i, “Kei cu Lianngan Bik Pathian ka si. Na nun chung vialte ka nawl ka ngai law soi awk zeihmanh um loin um. 2Nangmah sinah biakamnak ka ser lai i tefa tampi kan pek lai,” a ti. 3Cun Abram cu a khuk aa bil i a bawh lioah Pathian nih cun, 4“Hi biakamnak hi kan pek: nangmah cu miphun tampi a hringsortu hna na si lai. 5Na min kha Abram si ti loin Abraham#17.5 ABRAHAM ti hi Hebru holh ah, mi tampi pa, ti aw chuah he aa lo. a si cang lai. Zeicahtiah miphun tampi hringsortu ah kan ser cang. #Rom 4.17 6Tefa tampi kan pek lai i a cheu cu siangpahrang an si lai. Na tefa cu an tam tuk hringhran lai caah miphun phun ah an i chuah lai.
7“Ka biakamnak cu, zungzal hmunmi biakamnak caah, nangmah le a ra lai ding chan i na tefa hna sinah, ka fehter lai. Nangmah na Pathian le na tefa hna an Pathian ka si lai. #Luk 1.55 8Hi ram, atu i khual na sinak ram hi, nangmah le na tefa hna cu kan pek hna lai. Kanaan ram hi a ning piin nan ta a si zungzal lai i keimah hi an Pathian ka si lai,” a ti. #Lam 7.5
9Pathian nih Abraham cu a thawh i, “Nangmah zong nih keimah he kan biakamnak hi na zulh hrimhrim ve lai, nangmah le hmailei chan i a um laimi na tefa hna nih nan zulh hrimhrim ve lai. 10Cun nangmah le na tefa hna nih tuah awkah kan hna a tla nan ti awk cu hihi a si: nanmah lak i pa paohpaoh cu nan cuarpar nan i tan dih lai. #Lam 7.8; Rom 4.11 11-12Atu ri hin cun fapa nan ngeihmi paohpaoh cu ni riat a si ah an cuarpar nan tan hrimhrim hna lai, nan inn chung i a chuakmi nan sal hna zong, cun ramdangmi sin i nan cawkmi sal hna zong an i tel chih dih lai. Hi nih hin nanmah le keimah karlakah biakamnak a um kha a langhter lai. 13Pakhat hmanh hrelh loin nan cuarpar cu tan nan si lai i cu nih cun nanmah sin i biakamnak ka sermi hi zungzal hmunmi biakamnak a si kha nan cungah hmelchunhnak in a langhter lai. 14Cuarpar aa tan lomi pa cu a miphun chungin hlonh a si lai, zeicahtiah keimah he biakamnak cu a zul lo,” tiah a ti.
15Cun Pathian nih Abraham cu, “Na nupi cu Sarai tiah na ko ti lai lo, a min cu Sarah a si cang. 16Amah cu thluachuahnak ka pek lai i fapa pakhat an hrinpiak lai. Amah cu thluachuah ka pek lai i miphun hna nu a si lai; a tefa hna lakah cun siangpahrang zong an um lai,” a ti. 17Abraham cu a khuk aa bil i asinain, “Mipa nih kum za khat a si ah fa a ngei kho ngai hnga maw? Sarah nih hin kum sawm kua ah fa cu a ngei ngai hnga maw?” ti a ruah ah a nih a chuak. 18Pathian cu a thawh i, “Ishmael cu ka huhphenhpiak law nungdam tein ka zohkhenhpiak ko tiah kan nawl,” a ti. 19Sihmanhsehlaw Pathian nih, “Na palh; na nupi Sarah nih fapa an hrinpiak lai i a min ah Isak na sak lai. Amah le a tefa hna sinah khan ka biakamnak cu ka fehter lai. Cu ka biakamnak cu zungzal hmunmi biakamnak a si. 20Ishmael huhphenh awk kha na ka hal, cucaah hitihin ka tuah lai: Ishmael cu thluachuahnak ka pek lai i fa tampi le tefa tampi ka pek lai. Amah cu bawi bawi hleihnih pa a si lai i a tefa cu miphun nganpi ah ka ser hna lai. 21Cun ka biakamnak cu, Sarah nih kumvoi atu tik i an hrinpiak laimi na fapa Isak sinah ka fehter lai,” a ti. 22Pathian le Abraham cu an i chawnh dih in Pathian nih cun Abraham cu a kaltak.
23Cu ni ṭhiamṭhiam ah cun Abraham nih a fapa Ishmael le a salpa vialte kha, Pathian nih a chimh bangin, an cuarpar a tan hna; a inn i a chuakmi si hna seh, a cawk in a cawkmi si hna seh, a inn i a ummi pa paohpaoh cu an cuarpar a tan hna. 24Abraham cu cuarpartan a si ah kum sawm kua le kum kua a si i 25a fapa Ishmael cu kum hleithum a si. 26An pahnih cun ni khat te ah, 27an sal vialte hna he cun an cuarpar cu tan an si.
Currently Selected:
GENESIS 17: HCL06
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Lai (Hakha) Common Language Bible © Bible Society of Myanmar 2006