GENESIS 15
15
Pathian le Abram Biakamnak
1Cu hnuah cun Abram nih langhnak a hmuh i Bawipa bia kha a theih. Bawipa nih cun a thawh i,
“Abram, na thinphang hlah.
Keimah cu phaw bantukin
an hupphengtu ka si.
Na laksawng cu a nganpi a si lai,”
a ti.
2Sihmanhsehlaw Abram nih cun a thawh ve i, “Maw Bawipa Pathian, kei cu fa ka ngei lo; cucaah zeitindah laksawng cu na ka pek khawh lai? Ka ro a ka cotu ding cu Damaskas khuami Eliezer hi pei a si ko hi. 3Fa zeihmanh na ka pe lo i cucaah cun ka sal hna lak i pakhatkhat nih ka ro an ka co cu a hau ko lai,” a ti. 4Cun Bawipa nih, “Hi sal hi na rocotu cu a si lai lo, na rocotu cu nangmah na fapa hrimhrim a si lai,” tiin a chimh cu a theih ṭhan. 5Bawipa nih cun lengah a chuahpi i, “Van khi zoh law na rel khawh ahcun arfi khi rel tuah hna. Na tefa cu khi arfi zat khi an si lai,” a ti. #Rom 4.18; Heb 11.12 6Abram nih Bawipa cu a zumh i cu a zumhnak cu Bawipa nih a dinnak ah a cohlanpiak. #Rom 4.3; Gal 3.6; Jei 2.23
7Cun Bawipa nih Abram cu a thawh i, “Hi ram hi nangmah pek awkah Khaldi ram Ur khua in chuah an fialtu cu Bawipa hi ka si,” a ti. 8Sihmanhsehlaw Abram nih cun, “Maw Bawipa Pathian, cucu ka ta a si lai ti cu zeitindah ka hngalh khawh lai?” a ti. 9Pathian nih cun, “Cawla kum thum a timi pakhat, meheh kum thum a timi pakhat, tuukawng kum thum a simi pakhat, cun ṭhuro pakhat le laileng pakhat kha rak ka pe hna,” a ti. 10Hi saram vialte hi Abram nih Pathian sinah khan a rak put hna. A cheu hna i a cheumi hna cu hmaitonh cio ah tlang hnih in a chiah hna; va kha cu a can hna lo. 11Langta nih an run zuanhnawh hna i a ṭhawl hna.
12Ni a tlak cuahmah tikah khan Abram cu aa hngilh i a cungah ṭihnak nganpi a tlung. #Job 4.13,14 13Bawipa nih cun a thawh i, “Na tefa hna cu ram dang ah khual an si lai, cuka ah cun sal ah an cang lai i kum za li chung hremnak an ing lai. #Exo 1.1-14; Lam 7.6 14Asinain cu bantukin a hremtu hna miphun kha keimah nih dan ka tat hna lai i cu ram in an chuah tikah chawva tampi he an chuak lai. #Exo 12.40-41; Lam 7.7 15Nang tu cu chan tling in na nung lai i dai tein na thi lai; khup kha hmuah in na nun hnuah an in vui lai. 16Na tefa hna cu chan li hnuah an ra kir ṭhan lai, zeicahtiah Amor mi hna cu dantat awk tlak hrimhrim in an sual tik lawngah ka ṭhawl hna lai,” a ti.
17Cun ni a tlak i khua a muih tikah a khumi mei um pakhat le a alhmi mei tom pakhat kha an hung chuak i sa a chiahmi hna karlak ah khan an kal. 18Cu ni ah cun Bawipa nih Abram cu bia a kam i, “Hi ram hi a dihlak in na tefa kha ka pek hna lai tiah bia kaa kam, Izipt ram ri i a ummi tiva in tiva ngan Zufrates tiang a si lai; #Lam 7.5 19Ken mi hna ram le Keniz mi hna ram le Kadmon mi hna ram le 20Hit mi hna ram le Periz mi hna ram le Refaim mi hna ram le 21Amor mi hna ram le Kanaan mi hna ram le Girgash mi hna ram le Jebus mi hna ram zong hi an i tel chih dih lai,” a ti.
Currently Selected:
GENESIS 15: HCL06
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Lai (Hakha) Common Language Bible © Bible Society of Myanmar 2006