Pianciilna Thupatna
Thupatna
Pianciilna a kici sia “a kipatna” cina ahi hi. Hi thubu in vaannuai bup a bitphuana, mihing kipatna, leitung ah mawna le ngimthuakna kipatna le Pathian in mihingte tungah na hong sepna ziate son hi. Pianciil thubu sia khen lian nii in, kikhen thei hi:
1. A lian 1 - 11: Leitung a kibitphuana le mihing nam ii taanghthu masa teng ahi hi. Hi sungah Adam le Eve, Cain le Abel, Noah le tuipi liimna le Babylon tausaang thute om hi.
2. A lian 12 - 50: Israel te ii taanghpupi masate taanghthu ahi hi. A masa sia Abraham thu hi a, ama sia Pathian a upna hang le Pathian thu a nitna hangin a minthang hi. Tua zawkciang a tapa Isaac thu in zom a, a tupa Jacob (Israel zongh a kici pa) thu le Jacob ii ta sawm le nii te thute in zom hi. Jacob ii tate sia Israel minam sawm le nii te pianna ahi hi. Hi sungah Jacob ta sawm le nii te sung pan a tuamin Joseph thu le Jacob ta dangte, a innkuanpui tek uh taw Egypt ngam ah teang tu in a paisakna ah thupiangte sonbel in nei hi.
Hi thubu in mihingte thu son ahihang, a thupibel in Pathian nasepna tepteena ahi hi. Pathian in vaannuai bup bitphua takpi a hina thu a kipsakna taw kipan a, a mihingte a thin nopmawkna a lak paisuak natu in kamciamna khat a piakna thu taw khup hi. Hi thubu bup sungah Pathian sia a seam, a diangbel sia a hina thu, a khial mite tungah thukhenin daan a pia, a mite lampui in a hu le amate taanghthu a zeam Pathian a hina thute ki at hi. Hi taanghlai laibu sia minam khat ii upna tepteena tu le tua upna a nuntaksak thei natu a hu tu in a ki at taanghthu ahi hi.
A kihel Thulute
Vaannuai bup le mihing bitphuana 1:1—2:25
Mawna le ngimthuakna kipatna 3:1-24
Adam pan Noah dong 4:1—5:32
Noah le tuipi liimna 6:1—10:32
Babylon tausaang 11:1-9
Shem pan Abram dong 11:10-32
Pute Pate: Abraham, Isaac, Jacob 12:1—35:29
Esau suan le paalte 36:1-43
Joseph le a suapuipate 37:1—45:28
Israel te Egypt ah 46:1—50:26
Currently Selected:
Pianciilna Thupatna: SCB2
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Siyin Chin Bible © Bible Society of Myanmar, 2016