Pianciilna 1
1
Bitphuana Taanghthu
1A kipatciilin Pathian in vaannuai bup bitphua hi, 2tualai in leitung sia lim le meal nei ngawlin awngthong hi. Na theampo a tuam tuipi kihual sia khuazing in siin bikbek a, Pathian Thaa sia tui tungah diang hi. 3Tuaciang Pathian in, “Khuavak om hen” ci in thupia a — khuavak piang hi. #2 Cor 4:6 4Pathian in tuasia a mu ciang phasa a, lungkim hi. Tuasia ciang ama in khuazing pan khuavak khen hi, 5ama in khuavak sia ‘Sun’ ci a, khuazing sia ‘Zan’ ci hi. Nitak hun bo in zingsang hong theng a — a ni khat ni ahi hi.
6-7Tua zawkciang Pathian in, “Tui sia mun nii in a kikhen tuam natu mun kuampi khat om hen” ci in thupia a — tuaciang tuabangin piang hi. #2 Pe 3:5 Pathian in tuabang mun kuampi khat vawt a, tuasia in a tung tui sia pan a nuai tui sia khen hi. 8Ama in mun kuampi sia “Van” ci hi. Nitak hun bo in zingsang hong theng a — a ni nii ni ahi hi.
9Tua zawkciang Pathian in, “Leitang pian natu in, van ii nuai a om tui teng mun khat ah kingawm hen” ci in thupia a — tuaciang tuabangin piang hi. 10Ama in leitang sia “Leitung” ci a, a kikaikhawm tui teng sia “Tuipi” ci hi. Pathian in tua bang a mu ciang phasa a, lungkim hi. 11Tua zawkciang ama in, “Leitang in thingkung lopa nam theampo, tang a neite le nga a neite piangsak hen” ci in thupia a — tuaciang tuabangin piang hi. 12Leitang in thingkung lopa nam theampo piangsak a, Pathian in tuabang a mu ciang phasa a, lungkim hi. 13Nitak hun bo in zingsang hong theng a — a ni thum ni ahi hi.
14Tua zawkciang Pathian in, “Sun le zan kikhen natu, nite, kumte le biakna poaite #1:14 biakna poai; ahibuale khuahunte kipatna lak natu in van ah khuavakte piang hen a; 15leitung khuavak pia tu in van taang hen” ci in thupia a — tuaciang tuabangin piang hi. 16Tua ahiciang Pathian in khuavak a lian zaw nii vawt a, sun a uk tu ni le zan a uk tu tha ahi hi; ama in aksite zongh vawt hi. 17Ama in leitung a taangsak tu in van ah khuavakte koi a, 18sun le zan a uk tu le khuazing le khuavakte a khen tu ahi uh hi. Pathian in tuabang a mu ciang phasa a, lungkim hi. 19Nitak hun bo in zingsang hong theng a — a ni li ni ahi hi.
20Tua zawkciang Pathian in, “Tui sia a nungta nganhing nam tam mama te taw kidim hen a, vui sia vacimte taw kidim hen” ci in thupia hi. 21Tua ahiciang Pathian in tuipi nganhing liante, tui sung a nungta nganhing nam theampo le vacim nam theampo bitphua hi. Pathian in tuabang a mu ciang phasa a, lungkim hi. 22Pathian in tuate theampo thupha pia a, tui sung a teang nganhingte no nei in tuipi sung dim tavun, tuaciang vacimte pungin tam mama pha vun, ci hi. 23Nitak hun bo in zingsang hong theng a — a ni nga ni ahi hi.
24Tua zawkciang Pathian in, “Nganhing nuntakna a nei nam theampo: innsa le ngamsa, a lian le a no leitang in piangsak hen” ci in thupia a — tuaciang tuabangin piang hi. 25Tuabangin tuate Pathian in vawtsiat hi, tuaciang ama ii mu teng sia phasa a, lungkim hi.
26Tua zawkciang Pathian in, “Tu in eite in mihing ih vawt tu hi, amate sia eima taw kibang tu a hong suun tu hi. Amate in, ngasa, vacim le innsa ngamsa, a lian a note tungah vaang nei tu hi,” ci hi. #1 Cor 11:7 27Tua ahiciang Pathian in ama mama taw a kibang mihingte bitphua hi. Ama in pa le numei bitphua a, #Mt 19:4; Mk 10:6 28thupha pia in, “Na suan na paalte leitung mun theampo ah teangin, amate in leitung a uk tu in, ta tam mama nei tavun. Keima in ngasate, vacimte le nganhingte theampo tungah ukna za kong pia hi. #Pian 5:1-2 29Keima in note neak tu in antang nam theampo le thingnga nam theampo kong pia a, 30ahizong ngamsate theampo le vacimte theampo ii an tu in lopa le a tee nei a kungte ka pia hi,” a ci ciang — tuabangin piang hi. 31Pathian in a vawtsa theampo a et ciang phasa in lungkim mama hi. Nitak hun bo in zingsang hong theng a — a ni luk ni ahi hi.
Currently Selected:
Pianciilna 1: SCB2
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Siyin Chin Bible © Bible Society of Myanmar, 2016
