YAM JAH 8
8
Dieh Rawm
1Siyiex doh keud ka Noax mai can pa im ju pa mawh totiag pa ot mai nawh daux reu. Siyiex kieh bhaung ting lih phlu ka piang haktiex, rawm khankix dieh hu heue. 2Rawm keut khaing dee raux mai siviex raoma hoik deeh nyeep tix, lhiex khaing raoma kawx ang lai lih heue. 3Rawm khankix, grheuh hu sipie khaing haktiex. Khaix hoik naog tix yieh tixphwan singaix rawm hoik dieh heue. 4Ka daux khix aliah, kao aliah singaix, reu an tum piang choek gawng Ararat heue. 5Rawm grheuh hu sipie tom hoek khix kao, yam haok khix an tix singaix, choek gawng khawmuik blhiien khaing daux rawm heue. 6Khaix hoik naog tixpon singaix Noax paoh ka siviex iak reu pa hoik yuh ti heue. 7Nawh ploi lak tixmu lih hu ka praix mai lak an pu hu pu hoek tom sidah hoek bawg yam kroh haktiex heue. 8Nawh deeh baox ploi sikaux tixmu lih hu ka praix, sonsang tawng nawh ka grawng dieh rawm piang tiex heue. 9Viang mawh nan, sikaux ang nyang yaox dee sang tum sang laux caong tix, nawh deeh ing ka reu, kheu kawn kheem rawm piang haktiex khawmuik, mawh kheu nan nawh nyeu taix tix deeh teei sikaux laig daux reu heue. 10Nawh baox deeh pau aliah ngaix, nawh baox ploi sikaux lih hu khaing daux reu, 11sikaux deeh hoek ka nawh plak bo, jhak heue, nawh teei ti viex lhax khaox Sanlon pa khraox ka gaoh tix, yam an Noax hoik tawng dieh rawm ka piang haktiex heue. 12Khaix an nawh deeh baox pau tom hoek aliah singaix mai nawh deeh baox ploi sikaux lih hu plak praix mai sikaux an, ang lai deeh hoek tix bawg kawx heue. 13Yam hoik hoek Noax liah yieh mai tix num, daux khix tix, tix ngaix, rawm hoik dieh mai haktiex kroh, Noax plak ka braux reu mai jhak ka plak praix, nawh yaox hoik kroh haktiex heue. 14Ka daux khix ra, tixnga aliah ngaix, piang haktiex hoik deeh kroh khawmuik heue. 15Khaix an Siyiex ah nin ka Noax, 16“Lih khaing daux reu maix khawm moeng maix, kawn simex maix mai mun maix ku kaux heue. 17Viex totiag can pa im ju pa mawh sim, tobrie mai totiag pa chix mu chix hu piang tiex pa ot tau mai maix sonsang baox deeh lih pre haoh hun kix piang haktiex heue.” 18Mawh kheu nan, Noax lih hu ka praix tau mai kawn simex nawh, moeng nawh mai mun nawh khankix heue. 19Can totiag kuceu, pa chix mu chix hu mai sim kuceu mai totiag pa chix chuh ka piang haktiex khawmuik lih hu khaing daux reu heue.
Sijax Mukheu Siyiex
20Khaix an Noax yuh khu dee tan son Simiang Siyiex tix mu, nawh viex totiag pa singax mai sim pa singax kuceu hoek, gleeing tix tan krax tan pa gleeing ka piang khu dee tan ka Siyiex heue. 21Siyiex khaw rhawm mai rieb ka pa sioe bhawng an mai Simiang Siyiex ah nin ka daux rhawm tix, “Aux tak ang lai baox jhax lawg ka haktiex kheu jao kawn pui khaix in tix bawg kawx, mawh kheu kawn pui koe rhawm pa caox caig jah tom yam iak tix, Aux tak ang lai baox yuh can pa im ju khankix laux leeing awm pa hoik yuh Aux bawg in heue. 22Glang yam kawn koe haktiex in, baux yam ruat simie, yam vawg nghox mai bawg yam kwat, yam koek praix, yam raux, yam rung, yam pon singaix mai yam ponsawm, Aux tak ang lai kieh jud jai heue.”
Currently Selected:
YAM JAH 8: WCL
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Wa Common Language Bible © Bible Society of Myanmar, 2012