Génesis 9
9
U nup t'aan Ku yéetel Noé
1Kue' tu qui' t'antaj Noé tac xan u paalal yéetel le t'aano'oba': Yanac te'ex ya'abcach a paalale'ex chupe'ex le lu'umo'. 2Tuláacal u ba'alche'ilo'ob yóokolcaabe' yaan u quiquilaanquilo'ob yéetel sajaquil ta táane'ex. Tuláacal le ba'alche'ob cu xiknalo'ob, le cu máano'ob yóok lu'um bey le caja'ano'ob ich ka'anabo', bíin ti'anaco'ob yáanal a páajtalile'exe'. 3Je'el u páajtal a jaantique'ex tuláacal le ba'alche'ob bey le áak xíiwo'ob a káate'exe'. Teen quin dzáic te'ex. 4Ba'ale' yaan jun p'éel ba'ax ma' u najmal a jaantique'exi': Bak pa'ate' yéetel u ki'ikel, tumen te j ki'ik yaan le cuxtalo'. 5Yaan in káatchi'itic ti' jujun túul máac bey ti' jujun túul ba'alche' tu yo'olal u ki'ikel jujun túul ti' te'ex. Ti' jujun túul wíinique' yaan in káatchi'itic tu yo'olal u cuxtal u láak.
6Wa máax cu quíimsic jun túul wíinique',
u láak wíinic bíin quíimsic xan.
Tumen wíinique' beeta'ab chica'an ti' Ku.
7Ba'ale' te'exe', ¡yanac ya'ab a paalale'ex,
chupe'ex yóokolcaab yéetelo'ob!
8Kue' tu ya'alaj xan ti' Noé yéetel ti' u paalal: 9U'uye'ex, tene' bin in ca'aj in beet jun p'éel nup t'aan ta wéetele'ex yéetel a ch'i'ibale'ex, 10yéetel xan tuláacal ba'alche' yaan ta wéetele'ex, jóoko'ob ti' le cheemo': ch'íich'o'ob, alaktbil ba'alche'ob, káaxil ba'alche'ob, yéetel tuláacal u ba'alche'ilo'ob yóokolcaab. 11In nup t'aan ta wéetele'exe' ma' bíin kexpajaqui': ma' bíin suunaquen in xu'uls wíinico'obi', mix ba'alche'ob yéetel jun p'éel búulcabali'; ma' bíin suunac yantal jun p'éel búulcabal ca u kascunt lu'umi'. 12Lela' u chíiculal le nup t'aan quin beetic ta wéetele'ex bey yéetel le ba'alche'ob u ti'al ja'abo'ob mina'an u xuul: 13Dzo'oc in dzáic in chéel te j múuyalo'obo', yaan u meyaj bey u chíiculal le nup t'aan quin beetic yéetel le lu'uma'. 14Le quéen in beet u taal múuyalo'ob yóok lu'ume', in chéele' yaan u chíicpajal ichilo'ob. 15Bíin ka'ajac teen túun le nup t'aan in beetmaj ta wéetele'ex tac yéetel le ba'alche'obo', ma' bíin yanac mix jun láak búulcabal u ti'al u xu'ulsico'ob. 16Le quéen yanac le chéel ichil le múuyalo'obo', tene' bíin in wile, bíin xan ka'ajac teen le nup t'aan mina'an u xuul in beetmaj yéetel tuláacal wíinic yéetel, tuláacal ba'alche' yaan yóokolcaab. 17Lela' leti' u chíiculal le nup t'aan tin beetaj yéetel tuláacal wíinic tac xan yéetel tuláacal ba'alche' way j lu'ume'. Bey úuchic u t'aan Ku yéetel Noeo'.
Noé yéetel u paalal
18Lelo'oba' u paalal Noé jóoko'ob ichil le cheemo': Sem, Cam u taata canaán, yéetel Jafet. 19Le óox tulo'oba' u paalal Noé, bey túuna' yéetel le u ch'i'ibalo'oba' chu'unsa'ab u cajcunta'al tu ca'a téen le lu'uma'.
20Noe' tu chu'unbesaj u meyajtic le lu'uma' ca tu beetaj jun p'éel u x péetpachil uva. 21Jun p'éel kiine' Noe' tu yukaj vino ca j cáalchaji, joch'ocbal, chacnul p'áatic chúumuc u pasel. 22Cam, u taata Canaán tu yilaj chacnul u taatae' ca jóok u ya'al ti' u sucu'un yéetel ti' u yíidzin 23Sem yéetel Jafet túune' tu ch'a'ajo'ob jun p'éel teep'e', tu machajo'ob jujun ti'itze' ca j xíimbalnajo'ob cuculpach, u ti'al ma' u yilico'ob u chacnulil u taataob, ca tu pixajo'ob.
24Le ca j jóom u yóol ti' u cala'anil Noee', tu yojéeltaj ba'ax beeta'ab ti' tumen u paal, 25ca tu ya'alaj:
¡Loolob t'aan yóokol Canaán!
¡bíin suunac jun túul u p'eexil palitzil
u ti'al u sucu'un yéetel ti' u yíidzin!
26Cu dzo'ocole' tu ya'alaj:
Yuumtzil in Ku ca u qui' t'ant Sem,
Canane' leti' u palitzil.
27U yóolt Ku ca cóochac u cajtalil Jafet,
ca cajlac tu paselo'ob Sem, u palitzil xane' Canaán.
28Cu dzo'ocol le búulcabalo' Noe' j cuxlaj u láak tres cientos cincuenta ja'abo'ob. 29Bey túuno' tu chucaj novecientos cincuenta ja'abo'ob ca j quíimi.
Currently Selected:
Génesis 9: MAYABI
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Texto Maya © Sociedades Bíblicas Unidas, 1992