Seera Uumamaa 11

Riqaa Baabilonii Fi Afaan Namaa Wal-Makuu

1Bara sanatti namni lafa irraa guutummaatti, afaan tokkichaa fi haasaa tokkicha qaba ture; 2namoonni ba'a-biiftuutii yeroo godaananitti, biyya Shiinaaritti bakkee diriiraa argatanii achi qubatan. 3Isaan,<<Kottaa, suphee dhoofnee cimsinees ibiddaan in gubnaa!>> waliin jedhan; qooda dhagaa xuuphiin, wal qabachiisuuf immoo leeleen isaaniif in hojjete; 4yommus,<<Kottaa, mandara riqaan isaa bantii waaqaa bira ga'u tokko ofii keenyaaf in ijaarannaa, nuyi guutummaa lafaa irra diidatti akka hin bittimmoofnetti ittiin maqaa in godhannaa!>> jedhan.

5Waaqayyo yommus mandarichaa fi riqaa isaa isa ilmaan namaa ijaaran ilaaluudhaaf gad bu'e*; 6inni,<<Kunoo, isaan saba tokko, hundumti isaaniis afaan tokkicha dubbatu, kun wanta isaan hojjechuuf jiran keessaa isa jalqabaa ti; egaa wanta isaan hojjechuuf yaadaa qaban keessaa, tokko illee kan isaan bira ga'uu dadhaban hin jiru. 7Kottaa gad buunee, inni tokko afaan isa kaanii akka hin dhageenyetti, afaan isaanii duraa waliin in maknaa!>> jedhe*. 8Achiis Waaqayyo guutummaa lafaa irra isaan bittimse; isaanis ijaarsa mandarichaa achumatti in dhiisan*. 9Waaqayyo achitti afaan guutummaa biyya lafaa waan waliin makeef, maqaan iddoo sanaa <<Baabel>> jedhamee moggaafame; (<<Baabel>> jechuun <<Waliin makamaa>> jechuu dha) achiis Waaqayyo guutummaa irra lafaa irra namoota in bittimse*.#5 18:21; Far 14:2 7 1:26; Kes 28:49 8 Luq 1:51 9 HoE 2:5-11

Ka'a Warra Seem Irraa Dhalatanii

(1Sen 1:24-27)

10Hiddi dhaloota sanyii Seem kanatti fufee in lakkaa'ama; Seem dhalatee waggaa dhibba tokkotti Arfaaksaadin dhalche; kunis bishaan badiisaa booddee waggaa lamatti ture*. 11Arfaaksaad erga dhalatee booddee, Seem waggaa dhibba shan jiraatee, ilmaanii fi intaloota biraas in godhate.#10 10:21-22

12Arfaaksaad dhalatee waggaa soddomii shanitti Shalaa dhalche; 13Shalaan erga dhalatee booddee, Arfaaksaad waggaa dhibba afurii fi sadii jiraatee, ilmaanii fi intaloota biraas in godhate.

14Shalaan dhalatee waggaa soddomatti Ebeerin dhalche; 15Ebeer erga dhalatee booddee, Shalaan waggaa dhibba afurii fi sadii jiraatee, ilmaanii fi intaloota biraas in godhate.

16Ebeer dhalatee waggaa soddomii afuritti Felegin dhalche; 17Feleg erga dhalatee booddee, Ebeer waggaa dhibba afurii fi soddoma jiraatee, ilmaanii fi intaloota biraas in godhate.

18Feleg dhalatee waggaa soddomatti Re'uu dhalche; 19Re'uun erga dhalatee booddee, Feleg waggaa dhibba lamaa fi sagal jiraatee, ilmaanii fi intaloota biraas in godhate.

20Re'uun dhalatee waggaa soddomii lamatti Seruugin dhalche; 21Seruug erga dhalatee booddee, Re'uun waggaa dhibba lamaa fi torba jiraatee, ilmaanii fi intaloota biraas in godhate.

22Seruug dhalatee waggaa soddomatti Naahorin dhalche; 23Naahor erga dhalatee booddee, Seruug waggaa dhibba lama jiraatee, ilmaanii fi intaloota biraas in godhate.

24Naahor dhalatee waggaa digdamii sagalitti Taaraa dhalche; 25Taaraan erga dhalatee booddee, Naahor waggaa dhibbaa fi kudha sagal jiraatee, ilmaanii fi intaloota biraas in godhate.

26Taaraan dhalatee waggaa torbaatamatti Abraam, Naahorii fi Kaaraan dhalche*.#10-26 1Sen 1:24-27; Luq 3:34-36

Ka'a Warra Taaraa Irraa Dhalatanii

27Hiddi dhaloota sanyii Taaraa kanatti fufee in lakkaa'ama; Taaraa isa Abraamin, Naahorin, Kaaraan dhalchee dha; Kaaraan immoo isa Looxin dhalchee dha. 28Kaaraan biyya itti dhalate, Ur biyya Kaldootaatti abbaa isaa Taaraa dura in du'e. 29Abraamii fi Naahor niitii in fuudhan; maqaan haadha manaa Abraam<<Saaraayi?, maqaan haadha manaa Naahor immoo <<Miilkaa>> ture; Miilkaan intala Kaaraan; Kaaraan kun immoo abbaa Miilkaa fi Yiiskaa ture*. 30Saaraayi dhabduu turte, mucaas hin godhanne*.#29 22:20 30 25:21-22

31Taaraanis Abraamin ilma isaa, Looxin ilma ilma isaatii ilma Kaaraan, Saaraayin haadha manaa Abraam ilma isaatii fudhatee, walii wajjin Ur biyya Kaldootaatii ka'anii gara biyya Kana'aanitti qajeelan; garuu biyya <<Kaaraan>> jedhamu yeroo dhufan achuma taa'an*. 32Taaraan waggaa dhibba lamaa fi shan jiraatee, Kaaraanitti in du'e.#31 Iya 24:2; Nah 9:7

Currently Selected:

Seera Uumamaa 11: MacQul

ማድመቅ

Copy