Maki 10

Pɔgelebehego

(Matu 19.1-12; Luki 16.18)

1Yezu bahɛ bilam mɛ, gee kiŋɛ Yudiya sɔ'ɔlum puan ta tole tinse'ehi n boi Yɔɔdan yakenɛ ha la. Ti nɛrekuuŋɔ lagehɛ kaaɛ en. Ti a pa'ala wuu en ni pun ita se'em la.

2Ti Farasiiduma basɛba wa'am a zi'an na ti ba makɛ en bihɛ, nyaa soke en yeti, “La de sore ti buraa bahɛ a pɔga?” 3Ti a lerege ba yeti, Moose nɔze'elego la puan yeti bu? 4#Tii 24.1-4; Mat 5.31 Ti ba yeti, “Moose nɔze'elego la puan bo' sore ti buraa gulehɛ pɔgelebehego gɔŋɔ bo' pɔka la gee nyaa ta'am lebehe ka.” 5Ti Yezu lebehe yele ba yeti, “Ya sukãberɛ la zuo ti a gulehɛ nɔze'elego kuna wa bo' ya. 6#Pi'il 1.27; 5.2 Gee pi'ileŋo puan na la, Yinɛ naam ba la buraa la pɔka. 7‘Dina wa zuo, buraa wan bahɛ ka sɔ la ka ma, gee dikɛ ka mɛŋa naaɛ la ka pɔga, 8ti ba bayi' la lebege inganɛ deyima. Ba ka le dɛna nɛreba bayi' gee ba nyaa dela inganɛ deyima. 9Bala zuo la, sɛla ti Yinɛ dikɛ lagum taaba, se'em de yelege.”

10Ti ba ta bɔna yire, ti a zahereba la le soke en yele wa. 11#Mat 5.32; 1 Kor 7.10-11 A yele ba yeti, “Se'em woo lebehe a pɔga gee tee di kayima tum la kabohi baha pɔgesɛka ti a bahɛ yia la zuo. 12Pɔka me han bahɛ ka asira gee tee ele buraa kayima, pɔka la me tum la kabohi.”

Yezu purɛ sum bahɛ kɔmbibehi zuo

(Matu 19.13-15; Luki 18.15-17)

13Ti nɛreba tara ba kɔmbibehi kina Yezu zi'an na, ti a dikɛ a nu'o pagelɛ ba zuo, ti a zahereba la tahera ba la ninmu'urɛ. 14Gee Yezu en nyɛ ŋwana la, a suure n nyiie, ti a yele ba yeti, “Bahɛ ya ti kɔmbibehi wa wa'am n zi'an na. Da gu'uri ya ba. Se'ere en sɔi la,Yinɛ sɔ'ɔlum la dela nɛreba n ani wuu kɔmbibehi wa dinɛ. 15#Mat 18.3 N yeti ya la yelemɛŋerɛ ti fum se'em ka to'e Yinɛ sɔ'ɔlum la wuu bia la, kan malum kɛ̃' bini.” 16Gee nyaa kɔkɛ kɔma la, gee dikɛ a nu'uhi pagelɛ ba zuto kaaɛ, Purɛ sum bahɛ ba zuto.

Buntata

(Matu 19.16-30; Luki 18.18-30)

17Yezu bahɛ bilam mɛ, gee bɔna sore zuo yɛ'ɛha, ti buraa zɔ paaɛ en, kpa duma a nɛŋan, soke en yeti, “Pa'alesunkɔ, beni en de n iŋɛ la n ta'am nyɛ vom kamba'ahɛ wa?” 18Ti Yezu yele en yeti, “Ŋwani ti fum yi'ira mam nɛresunkɔ? Nɛra ka boi dɛna sunkɔ han dagena Yinɛ ma'a. 19#Yɛh 20.12-16; Tii 5.16-20 Fum mi' nɔze'elego la, ‘Da ku nɛra, da tum kabohi, da zu, da dɛna pumparema aze'nyɛdaana, da fã nɛra sɛla, na'aha fum sɔ la fum ma.’ ” 20Ti buraa la yele en yeti, “Pa'ala, mam pun dɔla yele ana za'a mɛ ninmu'urɛ n biilemen na. 21Ti Yezu bihɛ en, ti a suure kɛ̃' en, ti a yele en yeti, la gee la yele deyina ma'a ti fum iŋɛ, kiŋɛ ta koohe sɛlawoo ti fum tara la, gee dikɛ ligeri la bo' naheduma, gee fum wan nyɛ lɔgerɔ saazuo ha. Fum han iŋɛ bala, fum nyaa wa'am na dɔla mam.” 22Buraa wa n wum ŋwana la, la kɔ'ɔhɛ la a giila paaɛ paaɛ, ti a kiŋɛ la susageŋɔ paaɛ paaɛ, se'ere en sɔi la, a lɔgerɔ la ba' zo'e mɛ.

23Ti Yezu bihɛ nɛrekuuŋɔ la kaaɛ gee yele a zahereba la yeti, “Bihɛ la kpe'em se'em ti buntateba ta kɛ̃' Yinɛ sɔ'ɔlum la puan!” 24Ti a zahereba la ya' nuurɛ la yetɔgebuna wa. Gee Yezu le yele ba yeti, “N kɔma, la kpe'em mɛ ti nɛra nyaŋɛ kɛ̃' Yinɛ sɔ'ɔlum la puan! 25La de naana bo' yugenɛ ti a doohe fupiho yoko puan tole, gana buntata ta'am kɛ̃' Yinɛ sɔ'ɔlum la puan.” 26Ti la ba' iŋɛ a zahereba la pakerɛ, ti ba sɔkera taaba yeti, ani yi wan nyɛ faarɛ? 27Ti Yezu bihɛ ba kaaɛ gee yeti, “Asaala zi'an ti la kpe'em gee dagi Yinɛ zi'an. Yinɛ zi'an sɛla ka boi kpe'em.”

28Ti Pita pɔhɛ yɛta en yeti, “Bihɛ, tumam bahɛ tu sɛla woo mɛ gee wa'am na dɔla fum.” 29Yezu yele ba yeti, “N yeti ya la yelemɛŋerɛ wa, nɛra ka boi bahɛ a yire, a suurɔ, a ma, a sɔ, bii a kɔma bii a timpaberɛ mam zuo la faarɛ yelehum wa zuo, 30gee kan nyɛ ba kɔbehi kɔbehi timpaberɛ wa zuo. A daana wan malum nyɛ yiya, suurɔ, maduma, kɔma, la vatɔ gee me nyɛ namehegɔ pa'ahɛ, gee ti ba'ahegɔ saŋa han ta paaɛ, a daana wan nyɛ vom kamba'ahɛ. 31#Mat 20.16; Luk 13.30 Gee ya mina suŋa ti a tole nɛŋa duma wan ta yee pooren ti a yee pooren ta tee tole nɛŋa.”

Yezu tɔgɛ a kum la a vo'ore pa'ahɛ butã

(Matu 20.17-19; Luki 18.31-34)

32Ba boi la sore zuo yɛ'ɛha zɔna Yerusalɛm, ti a zahereba la ta bihɛ ti Yezu boi la ba nɛŋa ha, ti la iŋɛ ba pakerɛ, ti dabeem kɛ̃' sɛba me en dole ba la. Ti a tari a zahereba pia la bayi' la lebe kinkɛleŋa pɔhɛ yɛta ba le yɛ'ɛha sɛla en wan iŋɛ en. 33A yele ba yeti, “Biheri ya, tu ye' zɔna la Yerusalɛm wa, ba wan ta nyɔkɛ Asaala Dayua wa bo' malema nɛŋa duma, la gɔnmi'ineba la, ti ba gakɛ en ti a dela a ki. Gee nyaa dikɛ en bo' sɛba en dagi Yuuduma. 34Ti ba ɛregɛ en gee tubehɛ nɔtuurum ma' en, gee ŋmɛ' en, gee ku en. Gee dabeha atã daarɛ, a wan vo'e a kum la puan.”

Yemesi la Yɔn suhega

(Matu 20.20-28)

35Yemesi la Yɔn en de Zebedii dayɔɔhi la tole la nɛŋa na ze'ele Yezu nɛŋan yele en yeti, “Pa'ala, tu boti fum iŋɛ la sɛla woo ti tu wan yele fum wa bo' tu.” 36Ti a yele ba yeti, “Yamam boti n iŋɛ la bem bo' ya?” 37Ti ba lerege en yeti, “Tumam boti la fum han ta zi'a fum suŋa na'am gɔŋɔ la zuo, fum bahɛ ti tumam ayima ta zi'a fum zuɔ, ti ayima me zi'a fum gɔbega.” 38#Luk 12.50 Ti Yezu lerege ba yeti, “Ya ka mi' sɛla ti ya sɔkera wa vuurɛ. Yamam wan ta'am nyu namehegɔ wanɛ se'ere puan ti mam yeti n nyu wa? Bii ya ta'am sɔ namehegɔ malema sua sɛka ti mam yeti n sɔ wa.” 39Ti ba lerege en yeti “Tu wan ta'am sɔ, ti Yezu yele ba yeti, ya sirum wan ta'am nyu namehegɔ wanɛ se'ere ti mam yeti n nyu wa, gee me wan sirum ta'am sɔ namehegɔ malema sua sɛka ti mam yeti n sɔ wa la, 40gee ya zi'ire mam zuɔ bii mam gɔbega nu'o bɔba, dagi mam n wan bo' ya sore, zɛ'sina dela ban maahum se biŋe sɛba la dinɛ.”

41Yezu zahereba pia la n wum ŋwana la, ti ba suya pɔhɛ nyiira la Yemesi la Yɔn. 42#Luk 22.25, 26 Bala ti Yezu yi' ba, yele ba yeti, “Ya mi' ti sɛba en dagi Yuuduma la puan, ba na'duma ni kɔ'ɔm dikɛ la ba mɛhi ɔ̃belɛ ba, ti sɛba me en de ba nɛrekãreba me tari ba vɛgena. 43#Mat 23.11; Mak 9.35; Luk 22.26 Gee la ka ani bala yamam puan. Gee se'em woo n boti a dɛna ya nɛrekãtɛ, a daana lebege ya za'a yameŋa, 44ya puan se'em me han bɔta ti a dɛna ya nɛŋa daana, a daana lebege ya za'a da'aberɛ. 45Gee Asaala Dayua ka wa'am na ti ba tuna bɔ'ɔra en mɛ, gee a tugum tuna bɔ'ɔra nɛreba, pun ta dikɛ a vom kaabɛ faaɛ nɛreba zo'e zo'e bahɛ.”

Batimiyɔsi nini pikɛ ya

(Matu 20.29-34; Luki 18.35-43)

46Ba wa'am la Yeriko na. Ti Yezu la a zahereba, la nɛrekuuŋɔ la en ta bahera Yeriko la, ti Timiyɔsi dayua Batimiyɔsi en de fua suhera la en zi' sore la nuuren. 47En wum ti Yezu en yehe Nazareti na n ye' tɔla la, ti a pɔhɛ nyabera yeti, “Yezu, Deviti Dayua wa, zɔ n nimbu'ɔ!” 48Ti nɛreba zo'e zo'e tahɛ en la ninmu'urɛ yeti, go'e fum voole la. Ti a tugum voole gaŋɛ bala yeti, “Deviti Dayua wa, zɔ n nimbu'ɔ!” 49Ti Yezu teke su'u gee yeti, “Yi' ya en bo' mam na.” Ti ba yi' fua la yele yeti, bahɛ ti fum puurɛ pee, “Ihege, a yi'iri fum mɛ.” 50Bala ti a lobe fuwoko la ti a yɛ la bahɛ, gee vaaɛ ihege kiŋɛ paaɛ Yezu. 51Ti Yezu soke en yeti, “Fum boti n iŋɛ la beni bo' fum?” Ti fua wa yele en yeti, “N pa'ala, bahɛ ti n nini wa pikɛ.” 52Ti Yezu yele en yeti, “Kina, fum sakerɛ wa n tibɛ hɔ.” Bilam bilam ti buraa wa nini la pikɛ ti a nyaa dɔla Yezu sore la zuo.

Currently Selected:

Maki 10: GBTP

ማድመቅ

Copy