Yɔn 3
3
Nikodemose la Yezu
1Buraa kayima n boi Farasii lageŋɔ la puan, ti ka yu'urɛ yi'ira Nikodemose, dɛna Yuuduma nɛŋadaana ayima. 2Ti a wa'am Yezu zi'an yu'uŋɔ kuyima na, soke en yeti, “Rabi, tu mi' ti fum dela pa'ala en ze'ele Yinɛ mɛŋa zi'an na. Se'ere n sɔi la, nɛra ka boi wan ta'am tum daalehum sɛ'a ti fum tuna wa han dagena Yinɛ n boi la a daana.” 3Ti Yezu lerege en yeti, “Yelemɛŋerɛ yelemɛŋerɛ ti n yɛta fum wa, nɛra ka boi wan bɔna Yinɛ sɔ'ɔlum la puan han dagena ba dɔgɛ en la saazuo na.” 4Ti Nikodemose yele en yeti, “Ŋwani ti ba wan ta'am le malum dɔgɛ nɛra a bunkutɛ puan? Nɛra wan le ta'am kɛ̃ a ma puuren ti ba le dɔgɛ en buyi' puan?” 5Ti Yezu lebehe en yeti, “Yelemɛŋerɛ yelemɛŋerɛ ti n yɛta hɔ wa, ti nɛra ka boi wan kɛ̃ Yinɛ sɔ'ɔlum la puan, han dagena ba malum dɔgɛ en mɛ doohe ko'om, la Sia la puan. 6Sɛla ti inganɛ dɔgɛ dela inganɛ, ti sɛla ti Sia dɔgɛ, dela Sia. 7Bala, da bahɛ ti la iŋɛ fum pakerɛ la mam yele fum yeti, ‘Fu dela ba malum dɔgɛ fum saazuo dɔgum la.’ 8Sabeeo lobere yɛ'ɛha la kuŋɔ en boti zi'an. Fum yeen wuna la ku dameŋa, gee fum ka mi' kuŋɔ en ze'ele zi'an na, bii kuŋɔ n ye'ehe zi'an. La ani la bala bo' se'em woo ti Fa'a Sia dɔgɛ en.” 9Ti Nikodemose yele en yeti, “Yele ana yeti a iŋɛ la ŋwani ta'am tum?” 10Ti Yezu soke en yeti, “Aa, Fum dagi la Iziraleduma pa'ala, gee ka bɔkera yele ana?” 11“Yelemɛŋerɛ yelemɛŋerɛ ti n yɛta fum wa, tumam yeti la sɛla ti tu mina, gee tɔgera sɛla ti tu nini nyɛ, gee ya ka sakɛ bo' tɔ. 12Mam han yele fum timpaberɛ wa zuo yɛla ti fum ka nam, fum nyaa yeti fum iŋɛ la ŋwani nam, n han yele fum saazuo yɛla? 13#Bar 3.29 Nɛra ka tabelɛ zom saazuo wa ha, han dagena se'em daana en ze'ele de zuo sige na la, dɛna Asaala Dayua la. 14#Kãl 21.9 Wuu Moose n wa zɛkɛ bunsɛla la muɔ la puan se'em la, bala mɛa ti ba wan ta zɛkɛ Asaala Dayua wa saazuo, 15Ti se'em woo en nam en, wan tara vom kamba'ahɛ.
16“Yinɛ nɔŋɛ timpaberɛ wa mɛ paaɛ paaɛ zuo, ti a dikɛ a dayua kayima wa bo' na, ti se'em woo n nam en, kan bahɛ yoo, gee a wan tara vom kamba'ahɛ. 17“Yelemɛŋerɛ yelemɛŋerɛ, Yinɛ ka tum a dayua wa ti ka wa'am na gakɛ timpaberɛ wa, gee timpaberɛ wa tugum nyɛ faarɛ doohe a dayua wa puan. 18Sɛba en nam en kan nyɛ sageŋɔ, gee sɛba en ka nam en la, pun diŋɛ bɔna la sageŋɔ puan, se'ere en sɔi la, ba ka nam Yinɛ dayua kayima wa yu'urɛ la. 19Gakerɛ en de se'em en ŋwana. Niihum wa'am timpaberɛ wa zuo na, gee nɛreba nɔŋɛ la lika gana niihum la, beni zuo, ba tuni la be'em. 20Sɛba woo n tuni be'em yaaɛ niihum mɛ, kan wa'am bu puan na, ti ba be'em la da niiɛ na. 21Gee sɛba n tuni yelemɛŋerɛ kini niihum la puan me na, ti ba tuuma la niiɛ na, pa'alɛ ti ba tuni ba tuuma dɔla la Yinɛ n boti se'em.”
Yezu la Yɔn ko'sɔɔra la
22Dina pooren ti Yezu la a zahereba kiŋɛ Yudiya kinkɛleŋa ha, ti eŋa la bamam ta kɛ̃ bilam dabeha fii wa, bɔ'ɔra nɛreba ko'om sua. 23Bala ma'a ti Yɔn ko'sɔɔra la boi la Ɛnɔn n lɛm Salim la, bɔ'ɔra nɛreba ko'om sua, se'ere en sɔi la, ko'kãra n boi zɛ'sina wa puan, ti nɛreba kina a zi'an na tɔ'ɔha ko'om sua. 24#Mat 14.3; Mak 6.17; Luk 3.19-20 Bala ma'a ti ba nan ka pagɛ Yɔn Ko'sɔɔra wa.
25Malema peere nɔkpe'ene n daa wa lu Yɔn zahereba la, la Yuuduma nɛra tiŋasuka. 26Yɔn zahereba basɛba n wa wa'am Yɔn zi'an na yele en yeti, “Rabi, se'em n daa wa'am fum zi'an na Yɔɔdan yakenɛ ha la, se'em ti fum daa tɔgɛ a yele la n bala ŋmɛregɛ bɔ'ɔra nɛreba ko'om sua, ti nɛreba la za'a nyaa bibigera a zi'an la.” 27Ti Yɔn lerege ba yeti, “Se'em ka boi wan to'e sɛla, han dagena saazuo n dikɛ bo' a daana. 28#Yɔn 1.20 Yamam mɛhi en de mam aze'nyɛduma, ti n yɛta ti ‘Dagi mam en de Kiresta la, gee Yinɛ tum mam mɛ na, ti n diŋɛ a nɛŋa na.’ 29Pɔgedita la en sɔ'e pɔka la, gee a zɔ la n zi' la en la, puurɛ pee mɛ la en wuni pɔgedita la kua la. La ani mam la bala, ŋwana zuo ti mam puurɛ ba' pee paaɛ paaɛ la. 30“Eŋa wan malum pa'ahera, gee ti mam sigera.”
Se'em n ze'ele saazuo na.
31Se'em n ze'ele saazuo na la, en gani za'a. Se'em n ze'ele timpaberɛ wa zuo na, dela timpaberɛ wa zuo bunɔ, tɔgera la timpaberɛ wa zuo yɛla. Se'em n ze'ele saazuo na la n gani za'a. 32Eŋa tɔgeri la sɛla ti a nyɛ, gee wum, gee nɛreba kelum ka nam bo' a yelehum la. 33Gee se'em woo n nam bo' a yelehum la nam la yele dina wa, ti Yinɛ dela yelemɛŋerɛ.
34Se'em daana ti Yinɛ tum la, tɔgeri la Yinɛ nuurɛ, se'ere en sɔi la, Yinɛ ba' pirɛ en mɛ la Fa'a Sia la.
35 #
Mat 11.27; Luk 10.22 Sɔ la nɔŋɛ dayua la mɛ, gee dikɛ sɛla woo iŋɛ a nu'uhen. 36Se'em woo n nam dayua la tari la vom kamba'ahɛ. Se'em me n zagehɛ dayua la ka tari vom, gee Yinɛ sunsunyiim n boi a daana zuo.
Gurenɛ New Testament © The Bible Society of Ghana, 2020.
