Yɔn 16

1“N yele ya yele ana wa, ti a gu' ya ti ya da pita luta. 2Kelehe ya, Ba wan dige ya zamehegɔ yiya la puan bahɛ. Saŋa kini na, ti sɛba n ku ya, wan ti'ihɛ ti ban iŋɛ bala la, ba tuni bɔ'ɔra la Yinɛ. 3Ba wan iŋɛ ŋwana doohe la ban ka mi' Sɔ la, bii mam la zuo. 4Gee mam diŋɛ yele ya yele ana wa, ti a saŋa han ta paaɛ, ya wan tɛra ti n pun yele ya a yele. N daa ka yele ya yele ana wa pi'ileŋo puan na la, doohe la mam nan boi la ya la zuo.

Fa'a Sia la tuuma

5Gee nananawa, mam ye' lɛbera la se'em n tum mam na la zi'an, gee ya se'em ka soke mam nyaa ‘Fum ye' la bɛha?’ 6Gee mam n nyaa yele ya yele ana wa la, susageŋɔ n pirɛ ya suya. 7Gee la bala za'a, mam yeti ya la yelemɛŋerɛ wa, ti yamam sum zuo, la ani suŋa ti mam kiŋɛ. Se'ere n sɔi la, mam han ka kiŋɛ Tɛ'ɛla la kan wa'an ya zi'an na. Gee mam han kiŋɛ, n wan tum en ya zi'an na. 8A han wa'am na, a wan bahɛ ti timpaberɛ wa zuo nɛreba baŋɛ ti ba tuue mɛ la bamam n ti'ihɛ ti be'em, tuuntɔɔ vom, la gakerɛ n de sɛla la. 9Ba ka mi' be'em n de sɛla, beni zuo ba ka nam mam. 10Ba ka mi' tuuntɔɔ vom n de sɛla, beni zuo, mam ye' la Sɔ la zi'an, ti ya kan le nyɛ mam. 11Ba me ka mi' gakerɛ n de sɛla, beni zuo, ba pun gakɛ be'em daana la en boi timpaberɛ wa zuo la mɛ.

12“Yɛla zo'e zo'e boi ti n wan yele ya, gee nananawa la, la wan zo'e gaŋɛ ya tarega. 13Gee se'em en de Sia yelemɛŋerɛ la han ta wa'am na, a wan gu'ura ya ti ya mina yelemɛŋerɛ la za'a. Se'ere n sɔi la, a ka yeti a tɔgera la a mɛŋa yetɔgum, gee a wan tɔgɛ la sɛla woo ti a wum Yinɛ zi'an, ti a wan muulɛ bo' ya yele sɛ'a n wan wa'am na. 14A wan bo' mam pɛka, se'ere n sɔi la, a wan dikɛ la sɛla n de mam dinɛ, muulɛ bo' ya. 15Sɛla woo ti Sɔ la tara dela mam dinɛ. Bala zuo ti mam yeti, a wan dikɛ la sɛla n de mam dinɛ, muulɛ bo' ya la.

Susageŋɔ wan lebege Nyɛɛma

16“La han iŋɛ fiiwa, ya kan le nyɛ mam, gee la han le iŋɛ fiiwa ya wan nyɛ mam.” 17Ti a zahereba la basɛba yɛta taaba yeti, “De vuurɛ dela deni ti a yele tu yeti, ‘La han iŋɛ fiiwa ya kan le nyɛ mam, gee la han iŋɛ fiiwa ya wan le nyɛ mam.’ ‘Se'ere en sɔi la, mam lebere la Sɔ la zi'an’?” 18Ti ba yɛta taaba yeti, “Yetɔgebuna wa vuurɛ dela dinɛ ‘La han iŋɛ fiiwa’? Tu ka mi' en tɔgeri sɛla yele.” 19Yezu baŋɛ mɛ ti, ba boti ba soke en la se'ere, bala ti a yele ba yeti, “Ya sɔheri mɛ la taaba, de vuurɛ n de se'em, la mam yeti, ‘La han iŋɛ fiiwa, ya kan le nyɛ mam, gee la han iŋɛ fiiwa, ya wan le nyɛ mam la?’ 20Yelemɛŋerɛ yelemɛŋerɛ ti n yɛta ya wa, ti ya wan kele, gee si'im, gee ti timpaberɛ wa zuo nɛreba nyɛɛna. Ya suure wan sagum, gee ya susageŋɔ la wan ta lebege nyɛɛma. 21Pɔka han virege, la ni wuna ka mɛ, beni zuo, a dɔgum saŋa n paaɛ. Gee bia la han diŋɛ lu na, a ka le tɛra too la, beni zuo, a nyɛɛni mɛ la eŋa n tari asaala wa'an timpaberɛ wa zuo na la. 22Bala, la wuni ya mɛ nananawa, gee n wan le lebe ya zi'an na, ti ya suya pirɛ la nyɛɛma, ti nɛra ka bɔna wan to'e ya nyɛɛŋɔ la ya zi'an. 23De daarɛ, ya kan soke mam se'ere. Yelemɛŋerɛ yelemɛŋerɛ ti n yɛta ya wa, n yeti ya ti, ya han soke sɛla mam Sɔ la zi'an mam yu'urɛ puan, a wan dikɛ la bo' ya. 24Wa'am na na paaɛ zina, ya ka soke en sɛla mam yu'urɛ wa puan. Soke ya gee ya wan to'e, ti ya nyɛɛma la pirɛ paaɛ paaɛ.

A zahereba la suma'ahum

25“Mam yeti ya yele ana wa me la yetɔgum biŋere puan. Gee saŋa la kini na, ti n kan le tɔgera bɔ'ɔra ya yetɔge biŋere puan, gee n wan kɔ'ɔm tɔgera Sɔ la tuuntɔɔ bɔ'ɔra ya. 26De daarɛ ya wan soke sɛla woo la mam yu'urɛ puan. Mam ka yeti mam wan ze'ele ya na'arɛ soke sɛla Sɔ la zi'an bo' ya, 27se'ere en sɔi la, Sɔ la mɛŋa nɔŋɛ ya mɛ, la yamam n nɔŋɛ mam, gee nam ti mam ze'ele la Yinɛ zi'an na la. 28Mam ze'ele la Sɔ la zi'an sige timpaberɛ wa zuo na, gee le yeti n bahɛ timpaberɛ wa zuo, gee lebe n Sɔ la zi'an.”

29Ti a zahereba la yele en yeti, “Ɛ̃ɛ, fum nyaa tɔgeri la tuuntɔɔ, fum ka le tɔgera biŋera. 30Nananawa, tu mi' ti fum mi' sɛla woo, ka ɛɛra nɛra ti a soke fum se'ere. Ŋwana wa ti tumam nam ti fum ze'ele la Yinɛ zi'an na.” 31Ti Yezu soke ba yeti, “Ya nyaa nam ya? 32Saŋa la kini na, ka pun paaɛ mɛ, ti ba wan dige ya ti ya yiregɛ, ti nɛra woo kule a yire a yire, gee bahɛ mam n ma'a. Gee la bala za'a, n kan bɔna n ma'a, beni zuo, Sɔ la n boi la mam. 33N yeti ya dina wa, ti ya tara suma'ahum mam puan. Han dɛna timpaberɛ wa zuo, ya wan nyɛ mɛlehegɔ. Gee da bahɛ ya ti dabeem tara ya, gee mam pun nyaŋɛ timpaberɛ wa mɛ.”

Currently Selected:

Yɔn 16: GBTP

ማድመቅ

Copy