Yɔn 13

Yezu pee a dɔleba nama

1Nananawa, gee ti azɔɛtole de'eŋo la wan paaɛ la, ti Yezu pun baŋɛ ti a saŋa la paaɛ ya ti a bahɛ timpaberɛ wa, gee lebe a Sɔ zi'an. Bala ma'a ti Yezu nɔŋerɛ pun kɛ̃ sɛba en de a dinɛ la n boi timpaberɛ wa zuo la mɛ paaɛ paaɛ. A nɔŋɛ ba mɛ ta paaɛ ba'ahegɔ. 2Ba zaanuurɛ dia saŋa, ti Sagena la pun diŋɛ kalum Yudasi en de Simɔn Isikariyɔte dayua la puti'irɛ mɛ, ti a koohe Yezu. 3Ti Yezu n pun mina ti a Sɔ dikɛ sɛla woo iŋɛ la eŋa Yezu nu'uhen, gee me mina ti eŋa ze'ele la Yinɛ zi'an na, gee me lɛbera la Yinɛ zi'an la, 4ti a ihige a zi'irego zi'an la, yɛɛ a fuo seko ti a yɛ dɔgelɛ la biŋe, gee dikɛ duuhega wooe a sia. 5Nyaa ka'ɛ ko'om iŋɛ peere lɔkɔ puan, pɔhɛ pɛɛra a zahereba la nama, gee duuha ba la duuhega la ti a wooe la. 6Ti a wa'am na paaɛ Simɔn Pita, ti a yele en yeti, “Daana, fum yeti fum pee la mam nama yoi?” 7Ti Yezu yele en yeti, “Nananawa, fum kan bɔkɛ mam iti sɛla wa, gee pooren fum wan ta bɔkɛ.” 8Ti Pita yele en yeti, “Fum kan makɛ pee mam nama.” Ti Yezu lerege en yeti, “Han dagena mam pee fum mɛ, fum ka tara tɔtɛ la mam.” 9Ŋwana ti Simɔn Pita yele en yeti, “Daana, yi da pee n nama ma'a, gee pee n nu'uhi la n zuo pa'ahɛ.” 10Ti Yezu yele en yeti, “Se'em n diŋɛ sɔ iŋa ka le sɔɔra pa'aha han dagena a nama ma'a ti a wan duuhe, a iŋa la za'a ani la filam. Yamam ani la filam, gee dagi ya za'a.” 11Yezu mi' ba puan se'em n wan koohe en. Bala zuo ti a yeti, “Dagi ya za'a n ani filam la.”

12 # Luk 22.27 En pee ba nama la ba'ahɛ la, dikɛ a fuo la yɛ, nyaa lebe zi'ire la ba la, a yele ba yeti, “Ya mi' sɛla ti n iŋɛ ya wa vuurɛ?

13Ya yi'iri mam la Pa'ala la Daana, Ya ka tuue, se'ere en sɔi la, mam n de se'em n bala. 14Bala, mam en de ya Daana, la ya Pa'ala la han pee ya nama, yamam me dela ya pee taaba nama. 15Mam iŋɛ biŋe ya mɛ, ti ya me ita wuu mam n iŋɛ se'em la. 16#Mat 10.24; Luk 6.40; Yɔn 15.20 Yelemɛŋerɛ yelemɛŋerɛ ti n yɛta ya wa, ti yameŋa ka gani ka daana, bii bitunehi gana se'em n tum ba la. 17Ya han mina yele ana wa, sum wan bɔna, ya han ita a. 18#Yoo 41.9 N ka tɔgeri ŋwana bɔ'ɔra la ya za'a. Mam mi' sɛba ti N looe la mɛ. Gee la dela la doohe gulehegɔ la n yeti, ‘Mam la se'em n lagum tuna laa kayina puan la n dikɛ mam koohe la.’ 19N yeti ya dina wa nananawa ti de nan ka tum wa, de nyaa han ta tum, ya wan nam ti mam n bala. 20#Mat 10.40; Mak 9.37; Luk 9.48; 10.16 Yelemɛŋerɛ yelemɛŋerɛ ti n yɛta ya wa, ti se'em woo n to'e se'em ti mam tum, to'e la mam, se'em woo me n to'e mam, to'e la se'em n tum mam na la’.”

Yezu tɔgɛ a koohego yele.

(Matu 26.20-25; Maki 14.17-21; Luki 22.21-23)

21Yezu n tɔgɛ ŋwana ba'ahɛ la, a suure sagum mɛ ti a kaahɛ yeti, “Yelemɛŋerɛ yelemɛŋerɛ ti n yɛta ya wa. Yamam puan ayima n yeti a koohe mam.” 22Ti a zahereba la biha taaba kaara, ka mina se'em ti Yezu yɛta la. 23Ti a zahereba la ayima, se'em ti a ba' nɔŋɛ la zi'an dɛla en, 24ti Simɔn Pita ɛbegɛ en yeti, a soke Yezu, se'em n de en ti a tɔgera wa. 25Bala ti a zahera wa n zi' dɛla a nyu'ɔ zuo la soke en yeti, “Daana, ani n de en?” 26Ti Yezu lerege en yeti, “ A dela se'em ti n wan dikɛ boroboro wa suke laa wa puan bo' en la.” Bala, en suke boroboro la, a dikɛ bo' la Yudasi n de Simɔn Isikariyɔte dayua la. 27Ti en to'e boroboro la ba'ahɛ la, ti Sagena la kɛ̃ en. Ti Yezu yele en yeti, “Tum fum yeti fum tum se'ere la kalam.” 28Gee se'em ka boi ban zi' la puan mina se'ere zuo ti Yezu yele en bala. 29Basɛba ti'ihɛ ti, Yudasi n zãli ba bo'olum tapɔɔ la, ti Yezu yɛta en ti, “Da' lɔgeseto ti ba wan bɔta azɔɛtole de'eŋo la puan”; bii a bihɛ sɛla bo' naheduma. 30Bala, en to'e boroboro la ba'ahɛ la, bilam bilam ti a ihige yehe. Bala ma'a ti la dela yu'uŋɔ.

Ze'elego paalega

31Yudasi n yehe la, ti Yezu yele ba yeti, “Nananawa ti asaala dayua wa nyɛ pɛka, ti Yinɛ me nyɛ pɛka a puan. 32Yinɛ han nyɛ pɛka Dayua wa puan, Yinɛ mɛŋa wan bo' Dayua la me pɛka Dayua la mɛŋa puan, gee me iŋɛ de kalam. 33#Yɔn 7.34 Kɔmbibehi wa, mam yeti n bɔna la ya la dabeha fiiwa. Ya wan ta ɛɛra mam, wuu mam daa yele Yuuduma la se'em la, bala ti n nyaa yɛta yamam me. ‘Mam n ye' zi'an la, ya kan ta'am wa'am bini na.’ 34#Yɔn 15.12, 17; 1 Yɔn 3.23; 2 Yɔn 5 N bo'ori ya la ze'elego paalega ti, ya nɔŋɛ taaba. Wuu mam nɔŋɛ ya se'em la, me nɔŋɛ taaba bala. 35Ya han nɔŋɛ taaba ŋwana, nɛra woo wan baŋɛ ti ya dela mam zahereba.”

Yezu tɔgɛ Pita ki'ihegɔ yele

(Matu 26.31-35; Maki 14.27-31; Luki 22.31-34)

36Ti Simɔn Pita yele en yeti, “Daana, fum yeti fum kiŋɛ la bɛ?” Ti Yezu yele en yeti, “Mam ye' zi'an la, fum kan ta'am doohe mam nananawa, gee pooren, fum wan doohe.” 37Ti Pita yele en yeti, “Daana, beni zuo ti mam kan ta'am doohe fum nananawa? Mam wan dikɛ n vom biŋe bo' hɔ.” 38Ti Yezu lerege en yeti, “Fum wan dikɛ fum vom biŋe bo' mam? Yelemɛŋerɛ yelemɛŋerɛ ti n yɛta fum wa, ti nɔdɔɔ kan kaaha gura ti fum ta ki'ihɛ mam sugum nuurɛ butã.

Currently Selected:

Yɔn 13: GBTP

ማድመቅ

Copy