Tuuma 3
3
Pita tibɛ kɔɔreŋɔ n sɔheri
1Daarɛ deyima ti Pita la Yɔn yɛ'ɛha pu'uhegɔ yire la pu'uhegɔ saŋa, woo gogo kaareŋa butã wuntɛɛŋa bɔba. 2Ti nɛreba zi buraa ti ba dɔgɛ ka ti ka dɛna kɔɔreŋɔ ka bilɛɛmen ha tari na. Nɛreba n ni zi buraa wa tari na ze'ele pu'uhegɔ yire la nayaŋa sɛka ti ba yi'ira ka Nayansuŋa la nuuren, ti a zi'an bilam la a ta'am suha sɛba n kɛ̃'ɛ̃ri pu'uhegɔ yire la puan la daare woo. 3Buraa wa n ta nyɛ ti Pita la Yɔn boi bini ti ba kɛ̃ pu'uhegɔ yire wa puan la, ti a suhɛ ba ti ba bo' en sɛla. 4Ti Pita kpa' en biha zii, ti Yɔn me biha en bala, ta yele buraa la yeti, “Biha tu na.” 5Ti Buraa wa kpa' biha, ba la ninmu'urɛ gee ti'iha la a wan to'e sɛla ba zi'an. 6Gee Pita yele en yeti, “Mam ka tari salempɛɛlega, bii salema, gee mam n tari sɛla n ŋwana ti mam dikera bɔ'ɔra fum wa. Yezu Kiresta n de Nazareti Buraa la yu'urɛ puan, ihege la fum kina.” 7Gee nyaa gurɛ kɔɔreŋɔ wa zuɔ nu'o ve'e en ihege ze'ele, ti bilam bilam ti paŋa wa'am kɔɔreŋɔ wa nama la a kigela puan na, 8ti a ɛkɛ saazuo lebe ze'ele, nyaa pɔhɛ kinɛ, nyaa doohe la Pita la Yɔn kɛ̃ Pu'uhegɔ yire la puan, kina kaara, gee ɛgera la pupeelum gee pɛgera Yinɛ. 9Ti nɛreba la woo n nyɛ en ti a kini, gee pɛgera Yinɛ. 10Ba baŋɛ ti buraa kaŋa n bala ni zi'a Pu'uhegɔ yire la nayansuŋa la nuuren suhera la. Ti la iŋɛ ba pakerɛ ti ba zɛ'a yɛli la sɛla n iŋɛ buraa wa la.
Pita tɔgɛ Solomɔn paka la puan
11Buraa wa kɔ'ɔm gi' Pita la Yɔn la bala kankaŋi, gee ti nɛreba la za'a zɔta yɛ'a ba zi'an, pu'uhegɔ yire la puan ze'sɛka ti ba yi'ira Solomɔn zinzaka la puan, ti la dɛna yele pakerɛ bo' ba. 12Pita n nyɛ nɛreba wa bala la, a yele ba yeti. “Yamam Izirale buuri wa, ŋwani ti yele dina wa iŋɛ ya pakerɛ, bii ŋwani ti ya biha tumam wuu la dela tumam paŋa bii tu Yinɛ zoolum puan ti buraa wa ihege kina wa? 13#Yɛh 3.15 La dela Aberaham Yinɛ la, Aziki Yinɛ la, la Yakɔbe Yinɛ la. Tu sɔyaabeduma Yinɛ la en na'ahɛ a dayua Yezu, se'em ti ya daa yehe en tihɛ, ze'ele Palete nɛŋan zagehɛ en, la Palete n daa pun iŋɛ a puti'irɛ ti a bahɛ en la za'a. 14#Mat 27.15-23; Mak 15.6-14; Luk 23.13-23; Yɔn 19.12-15 Yamam zagehɛ la Fa'a la tuuntɔɔ daana la gee tugum soke ti ba bo' ya nɛrekuura, 15ya tugum ku la vom daana la se'em ti Yinɛ vo'e en kum puan la. Yele dina wa ti tumam dɛna aze' nyɛ duma. 16La doohe la sakerɛ a yu'urɛ puan ti buraa wa ti ya nyɛta gee mina ka wa dɛna ka mɛŋa wa. Sakerɛ a yu'urɛ puan la en tibɛ en za'a za'a ya woo ninin wa.
17“Nananawa n suurɔ, mam mi' ti ya daa tum la yɛmka'alum, wuu ya nɛhi duma la me n daa tum yɛmka'alum se'em la. 18Ŋwana puan ti Yinɛ nɔtɔgeheba la en yuum purɛ yeti, a Kiresta la wan namehɛ la wa'am asira na. 19Bala zuo la, tee ya, la ya ŋmɛregɛ ya mɛhi bo' Yinɛ, ti a piiɛ ya be'em woo bahɛ, 20ti fula fula saŋa ze'ele Daana mɛŋa zi'an sige ya zuo, ti a tum Kiresta se'em ti a looe bo' ya la, ti a wa'am ya zi'an na, se'em n de Yezu la. 21Yezu se'em n wan bɔna saazuo gura sɛla woo maalegɔ seko ti Yinɛ tɔgɛ dɛ yuuman yuuman ha doohe a tuulum nɔtɔgeheba puan la. 22#Tii 18.15, 18 Moose yuum yeti, ‘Ya Daana Yinɛ la a mɛŋa wan yehe nɛra ya mɛŋa puan, ti a dɛna a nɔtɔgeha wuu mam wa. Kelehe ya sɛlawoo ti a wan yele ya. 23La wan ta dɛna se'em la dela, fum se'em woo n ka ta kɛleha nɔtɔgeha kaŋa la, ba wan vuuɛ n nɛreba la puan bahɛ.’ 24Nɔtɔgeheba wa woo n zo'e se'em la, ze'ele Samuwɛle saŋa ta paaɛ sɛba n wa'am a pooren na la woo yuum purɛ dabeha wa yele mɛ. 25Ya dela nɔtɔgeheba wa yaahi, la nɔpu'ulegɔ la ti Yinɛ yuum pu'ulɛ la ya yaabeduma la Aberaham yeti, ‘Fum yaŋa puan ti buuri woo n boi timpaberɛ wa zuo za'a wan nyɛ sum.’ 26Yinɛ n wa looe a yameŋa wa la, a pɔhɛ tum en la yamam zi'an ti ya nyɛ sum, doohe la en wan bahɛ ti yamam ayima ayima tee ya suya gee yehe ya be'em tuuma la puan la.”
Currently Selected:
Tuuma 3: GBTP
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Gurenɛ New Testament © The Bible Society of Ghana, 2020.
