Jenesis 38
38
Nuarin tas alupas 38.
1 Et apos Er, im Onan, im Sila, a Juta. 6 Et leh Temar ehgan a Er. 8 Nedo maumau u Onan. 11 Et tup amen vai Sila a Temar. 13 Et ago nedo efaifa vai Juta aien. 27 Et apos inmul aien, nan, Feres im Sera.
1AN nopan iyehki is ahes ehele ilpu etwan a Juta, um apan, um amen ehele nup Atullam is ethi, nidan Haira.
2Is ecet natahig is ethi u nup u Kenan eahki a Juta, nidan Sua; um leh yin ehgan.
3Is opoc aien, um apos inhalav atamaig; is anvi nidan aien par ika Er.
4Is lep opoc aien, um apos inhalav atamaig; is anvi nidan aien par ika Onan.
5Is aketo aien um opoc, um apos inhalav atamaig; is anvi nidan aien par ika Sila: is amen Kiseb a Juta is wat apos yin a ehgan.
6Is leh natahig is ethi a Juta, nidan Temar, mika yi ehgai Er inhal o un inmeto.
7Is atimi auatatimi an nuhup u Ihova a Er, inhal u Juta inmeto; is atgei yin a Ihova.
8Is ika a Juta ehele Onan, Namu leh ehgai etwam aiek ehgam, um asvalav imi etwam.
9Is ato a Onan mika, inyi eti inhal o un iyehki; va nitai inigki is wat apan aien ehele ehgan, is elelse an uobohtan, va yi jim apos inhalav vai etwan aien.
10Is edemda a Ihova va nedo o un; um lep atgei yin.
11Is ika a Juta ehele Temar ehgai inhal o un, Namu tup amen aiek an nimnim u etmam, um aitgaig Sila inhal unyak etpu alupas aien: is ika aien, Kit etpu mas aien et idivaig ohwat etwan. Is apan a Temar um amen an nimnim u etman.
12Is ti pan itac nadiat is ahinag, ja is mas inhalav atahig u Sua ehgai Juta; is wat eropse inliinmopoi Juta, is apan aien um ateghe ilpu atimi ucsei nalau irai siip o un an nuarin pece Timnad, is ahced yin a napa o un Haira nup Atullam.
13Is asuptecnaig ehele Temar tah, um ika, Et apan Timnad a etmai natamnyu unyum mika yi ucsei nalau irai siip o un.
14Is atipagki napelumai u intakata tup amen aien, um aso yin an napelumai upene um adahpoi yin, um ateucse an nihtag u efalaig, ubutpotet pan u nefalaig iyehki is yetpan Timnad; is ato a Temar mika is alupas a Sila, ja eris eti fi auroauro um ati yin ehele Sila mika yi ehgan.
15Is wat ecet yin a Juta, is aktaktai aien mika, is takata ago nedo has aien; is idim adahpoi nesganimtan aien.
16Is ahidai yin pan ehelen aien an nefalaig, um ika, Et upene mika ki apam ehelum ainyak; is eti ato aien mika is ehgai inhal o un aien. Is ika aien, Napu alupai nyak inhe aiek, el et apam ehelek aiek?
17Is ika aien, Ekpu alupai euc nakli nanin ainyak irai itai eklim edo irai pece unyak. Is ika a Temar, Namu ati ehelek aiek tah nitai asjaaicnaig mika yi amen ehelek, um imihum pan an nopan iyehki napu alupai nyak nakli nanin aiek.
18Is ika aien, Nev itai asjaaicnaig ekpu alupai euc ainyak? Is ika a Temar, Nethado unyum, im nitaahnaig unyum, im niseuc unyum. Is alupai yin a Juta, um apan ehelen, is um opoc aien vai yin.
19Is atidai a Temar, um atga o un, um atipagki napelumai upene iran, um lep aso yin ira apelumai u intakata tup amen.
20Is imiapan nakli nanin ehelen a Juta irai nup Atullam napa o un, um ika yi leh nitai asjaaicnaig o un is amen ehele intakata: ja is eti ecet yin aien.
21Is ahodaig atimi an nuarin iyehki aien, um ika, Intakata ago nedo has iyek yek eda, is ateuc aien an nihtag u efalaig? Eris ika ara, Et eti amen tah intakata ago nedo has an nuarin inigki.
22Is adumoij pan ehele Juta aien, um ika, Ek mun eti ecet yin ainyak; era lep ika natimi an nuarin iyehki, Et eti amen tah intakata ago nedo has an nuarin inigki.
23Is ika a Juta, Er uauo, etmu leh aien vai tu jim ehcamai akaijau: na mun imiapan nakli nanin inigki ehelen aiek ja na mun eti ecet yin aiek.
24Is wat ti pan itac inmohoc is eseij, eris asaig ehele Juta, um ika, Is mun ago nedo has a Temar ehgai inhal unyum; et lep opoc aien va nedo has o un. Is ika a Juta, Imiapan yin, um atnamud yin.
25Eris wat imiapan yin, is abrai etmai natamnyu un aien, um ika, Ek mun opoc ainyak va natimi et o un nitai iji igki: is ika a Temar, Almoi, et u di nitai iji igki, nethado, im nitaahnaig, im niseuc?
26Is asuptecnaig a Juta, um ika, Et esjilid nedo has unyak irai edo has o un; va nedo unyak, nikavaig, kis eti ati yin ehele Sila inhal unyak ehgan ainyak. Is lep eti ato yin aien.
27Is wat yetpam nopan apos inhal o un, is apos inmul aien.
28Is wat apos rau aien, is atgeig yi apidi nikman is ethi ira rau: is leh nikman a intakata aminjinaig yin, um arore nikman an ya cap, um ika, Etpu meto a nat igki.
29Is asvahteuc nikman aien, ja is lep ehcohos a etwan: is ika a intakata iyehki, Na a uri aiek par ateucrad emda? uhpu anvi nidam vaig: va nitai inigki eris anvi nidan par ika Feres, (Nateucrad emda).
30Ja is apitac um ateucrad a etwan, is amen inya cap an nikman: eris anvi nidan par ika Sera, (Naunau).
Currently Selected:
Jenesis 38: VAO63
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Vanuatu Bible (Intas Etipup) © United Bible Societies, 1863, 2019.