Jenesis 24
24
Nuarin tas alupas 24.
1 Et ika ehele naheca o un a Ebraham yi asig yi aktit intas o un ehelen. 10 Napan vaig u naheca iyehki. 12 Nalaigaheni o un: 14 Nitai asjaaicnaig o un. 15 Et ehtet iran a Ribeka, 18 um ehneijid nitai asjaaicnaig o un, 22 um leh niji itai imiyecrei yin, 23 um ehvaig ehelen ilpu atimi ehpan iran, 25 um, imiacaij yin an nimnim, ura. 26 Et imiahpas Atua a naheca iyehki. 29 Et alaan a Leban. 34 Et asuptecnaig intas o un a naheca iyehki. 50 Erau ika a Leban im Beduel, Et upene. 58 Et ika a Ribeka yi atau. 62 Et ehtet iran a Aisak.
1IS efatimi a Ebraham, um ahinag inmesese iran: ja is acis yi alwai yin a Ihova irai iji itai asega.
2Is ika a Ebraham ehele naheca o un inmeto an nimnim o un, is aminjinaig niji itai asega o im aien. Ek ugyi euc ainyak, mika an ati nikmam aiek itlian neduok:
3um asig yi aktit intas an nuhup u Ihova, Atua an nohatag, im Atua an nobohtan, nikavaig, napu eti leh ehgai inhal unyak aiek irai ilpu halav atahig u nup u Kenan iji igki, ek amen ehele ra ainyak:
4ja napu apan aiek an pece unyak, ehele ilpu atimi ehpan irak, um leh ehgai Aisak inhal unyak.
5Is ika ehelen a naheca iyehki. Kit inyi esjum a natahig nahced nyak vaig um apam an pece inigki: ekpu lep imiapan inhal unyum ainyak an pece iyehki as ahes iran aiek, ka oʼo?
6Is ika ehelen a Ebraham, Aktaktai aiek, um jim lep imiapan inhal unyak eahki.
7Et Atua an nohatag a Ihova, is atipagki nyak aien an nimnim u etmak, im lep an pece u ilpu atimi ehpan irak, is lep tas ehelek aien, um asan tas aktit ehelek, um ika, Ekpu alupai ilpu mapom inpece inigki ainyak; etpu abrai nagelo o un aien mika yi uhup iram aien, napu leh natahig eahki aiek ehgai inhal unyak.
8El et esjum natahig nahced euc vaig, inyi eti amen ehelum intas aktit unyum: jam jim imiapan inhal unyak eahki aiek.
9Is ati nikman a naheca iyehki ithan neduei Ebraham natimi alupas o un, um asig yi aktit intas va nitai inigki.
10Is lucsei kamela is ten a naheca iyehki irai kamela u natimi alupas o un, um atga o un; (is aminjinaig niji itai asega u natimi alupas o un aien:) is atidai aien, um yetpan Mesopotemia an maliyum u Nehor.
11Is ika aien eri atpuse kamela o un u nehpanwai ubutpotet pan inmaliyum an jupura, an nuarin nadiat iyehki eris apan a ilpu takata um athun wai.
12Is ika aien, Ak Ihova Atua u Ebraham natimi alupas unyak, ek ugyi euc ainyak, mika an atau imi nyak aiek an nadiat inigki, um aiheuc vai Ebraham natimi alupas unyak.
13Ek idim aiji u nehpanwai ainyak; era lep ham a ilpu atahig an maliyum inigki par athun wai:
14etmu idim uco, nikavaig, eku wit ika ehelen tah natahig ainyak, Ek ugyi euc ainyak, mika an imiasuol nipjinitai unyum aiek um athun wai lumak; el etpu ika aien, Umnyi aiek, ekpu lep alumai kamela unyum ainyak: etmu atahig iyehki aien as ati yin aiek ehgai naheca unyum Aisak; va nitai inigki ekpu ato ainyak, nikavaig, na mun aiheuc vai natimi alupas unyak aiek.
15Is um uce, is wat eti fi tas ehni aien, is ehcohos pan a Ribeka, is apos yin a Beduel, inhal u Milka, ehgai Nehor, etwai Ebraham, is apos nipjinitai an neuhlin aien.
16Is eklim upene nesganimtan aien, is atahig aien, is pam eti ato yin tah natamaig: is asuol an nehpanwai aien, um athun wai, um lep aridjai.
17Is athut a naheca iyehki, um aubilid yin, um ika, Ek ugyi euc ainyak mika an alumak tah inwai aiek an nipjinitai unyum.
18Is ika aien, Umnyi aiek, ak natimi alupas: is auroauro aien, um atise nipjinitai an nikman, um alum an.
19Is aluman ehni aien, um ika, Ekpu lep athun wai ainyak lumai kamela unyum, um aluma ra.
20Is auroauro aien, um atladwi inwai an nipjinitai an nelcau, is lep athut pan aien u nehpanwai, um athun wai, um alumai kamela asega o un.
21Is imiali yin a natimi iyehki, jam eti tas, par ato, kit is atau imi yin a Ihova an natga o un, ka oʼo.
22Eris umwig ehni kamela o un, ja is leh inteijeug colt a natimi iyehki, nahaijin sikel is ethi nopoc iran, im nethado colt is ero is sikel is ten nopoc iran, um ati an nikman ehro;
23is ika aien, Nai halav atahig u di aiek? asaig aiek: et alupas nimnim u etmam, ka oʼo, mika ecri amen iran aijama?
24Is ika ehelen aien, Ek halav atahig u Beduel ainyak, inhal u Milka, is apos yin imi Nehor aien.
25Is lep ika ehelen aien, Et ahinag nefelelicai unyima im nitai caig, et lep alupas nimnim unyima par amen iran.
26Is atpuse a natimi iyehki, um ago nalaigaheni vai Ihova.
27Is ika aien, Naaurinig vai Ihova, Atua u Ebraham natimi alupas unyak, et inveijec aien, um aiheuc vai natimi alupas un-yak, um eti udei yin: kis wat atga an nefalaig ainyak, is imiapam nyak a Ihova an nimnim u ilpu etwai natimi alupas unyak.
28Is athut a natahig iyehki, um asuptecnaig nitai iji igki ehele ra an nimnim u risin.
29Is eteuc natamaig is ethi irai Ribeka, nidan Leban: is athut pan a Leban ehele natimi iyehki u nehpan wai.
30Is wat ecetai inteijeug aien im nethado an nikmai natahig iran, um lep atahaijeg intas o Ribeka natahig iran, nikavaig, Is idim uco intas o natimi ehelek; is yetpan aien ehele natimi iyehki; is amen aien u kamela o un an uehpanwai.
31Is ika aien, Apam aiek, ak natimi inigki et mun acis yi alwai euc a Ihova; na a uri aiek par amen itac? ek mun yecrei neom ainyak, im lep nuarin imi kamela.
32Is apan anliin neom a natimi iyehki: is atipagki niji itai irai kamela a Leban, um leh nefelelicai im nitai caig incai kamela, im inwai par yiri neduei natimi iyehki, im neduei ilpu atimi ahced yin.
33Eris lep alupai yin nitai caig incan: ja is ika aien, Ekpu uhup ainyak um asuptecnaig intas inig eris abrai nyak vaig, ja par hag. Is ika a Leban, Asuptecnaig aiek.
34Is ika aien, Ek aheca u Ebraham ainyak.
35Is esjilid naiheuc u Ihova vai natimi alupas unyak; et atimi ikni itai aien: is alupai yin siip aien, im kurimatau, im silver, im colt, im ilpu aheca atamaig, im ilpu aheca atahig, im kamela, im togke.
36Is wat efatimi a Sera ehgai natimi alupas unyak, is apos inhalav atamaig aien imi natimi alupas unyak: is alupai yin niji itai asega o un aien.
37Is acaiji emda nyak a natimi alupas unyak, um ika, Namu jim leh ehgai inhal unyak aiek irai ilpu halav atahig u nup u Kenan, ek amen an pece ura ainyak:
38ja namu apan aiek an nuarin pece u etmak, ehele ilpu atimi ehpan irak, um leh ehgai inhal unyak.
39Kis ika ainyak ehele natimi alupas unyak, Kit inyi esjum a natahig nahced nyak vaig.
40Is ika ehelek aien, Etpu abrai nagelo o un a Ihova, et ecetai nedo unyak aien, mika yi ahced euc aien, um aminjinai euc an nefalaig; namu leh ehgai inhal unyak aiek irai ilpu atimi ehpan irak an nuarin pece u etmak:
41inyi eti amen intas aktit unyum ehelek, nau wit yetpan ehele ilpu atimi ehpan irak aiek; el era esjum ara um eti alupai euc tah natahig, inyi eti amen iram intas aktit unyum ehelek.
42Ek mun ham u uehpanwai ainyak inpig, um ika, Ak Ihova, Atua u Ebraham natimi alupas unyak, el et atau imi nyak aiek an nefalaig ek atga iran ainyak:
43ek idim aiji ainyak u nehpanwai; etmu idim uco, etu wit yetpam a natahig par athun wai, ekpu ika ehelen ainyak, Ek ugyi euc ainyak mika an alumak tah inwai tintin aiek an nipjinitai unyum;
44el et ika ehelek aien, Umnyi aiek, ekpu lep athun wai ainyak lumai kamela unyum: etmu atahig inigki aien is ati yin a Ihova ehgai inhal u natimi alupas unyak.
45Et wat eti fi tas ehni an liinmopok ainyak, et mun ehcohos a Ribeka, et mun amen nipjinitai an neuhlin; et mun asuol an nehpanwai aien, um athun wai: ek mun ika ehelen ainyak, Ek ugyi euc ainyak mika an alumak tah inwai aiek.
46Et mun auroauro aien um atise nipjinitai, um ika, Umnyi aiek, ekpu lep alumai kamela unyum inwai ainyak: ek mun idim umnyi ainyak, et mun lep athun wai aien, um alumai kamela.
47Ek mun ahodaig yin ainyak, um ika, Nai halav atahig u di aiek? Et mun ika aien, Ek halav atahig u Beduel ainyak, inhal u Nehor, is apos yin a Milka: ek mun ati inteijeug an nipjiimtan ainyak, im lep nethado an nikman ehro.
48Ek mun atpuse ainyak, um ago nalaigaheni vai Ihova, um naaurinig vai Ihova Atua u Ebraham natimi alupas unyak, is asjaaicnaig an nefalaig atoh imi nyak aien par leh inhalav atahig u etwai natimi alupas unyak, ehgai inhal o un.
49Al eka ika aijaua aki ago nedo upene im nedo inveijec vai natimi alupas unyak aijaua, asuptecnaig ehelek: ja el et eti uce, asuptecnaig ehelek; mika ki atga unyak ainyak um apan an matak, ka an mauuk.
50Erus tas a Leban im Beduel, um ika, Et ahes ehele Ihova nitai inigki: et ehka vai cama nasaig vaig ehelum tah intas.
51Ribeka mun nigki, leh yin aiek, um atga unyum, etmu eh-gai inhal u natimi alupas unyum aien, et idivaig intas o Ihova.
52Is wat atahaijeg intas urau a neheca u Ebraham, is atpuse aien, um imiahpas Ihova.
53Is ahyausei niji itai silver a naheca iyehki, im niji itai colt, im napelumai, um alupai Ribeka: is lep alupai natamaig iran aien im risin niji itai tup ahtai esjilid.
54Eris hag ara um umwig, im lep ilpu takuras o un um amen an nepig; ja is wat lahlah an nuhialeg, eris aiji ara; is um ika aien, Akumu adcijaig nyak aijaua, mika ki apan ainyak ehele natimi alupas unyak.
55Is um ika a natamaig iran im risin, Etmu amen ehelema a natahig an nadiat inyi eti elpat, et idivaig inyi ten; ja par apan.
56Ja is ika ehele ra aien, Jim acaiji nyak, et mun idim ago nedo upene vai nyak a Ihova an natga unyak; akumu adcijaig nyak aijaua mika ki apan ehele natimi alupas unyak ainyak.
57Erus ika arau, Ecrupu ahlaig vai natahig aijama, um ahodai yin.
58Eris ahlaig vai Ribeka ara, um ika ehelen, Napu ahced natimi inigki aiek, ka oʼo? Is ika aien, Maiya, ekpu ahced yin ainyak.
59Eris adcijai Ribeka natahig ira ra ara, im intakata aminjinaig yin, im naheca u Ebraham, im ilpu takuras o un.
60Eris acis yi alwai Ribeka ara, um ika ehelen, Na atahig irama aiek, namu etpoi atimi inyi ahinag acen aiek, erumu lep esjilid a ilpu mapom irai ilpu atimi tak atimi ira ra.
61Eris atidai a Ribeka im ilpu atahig o un, eris ateuc irai kamela ara, um ahced natimi iyehki: is leh Ribeka a naheca iyehki um atga o un.
62Is edo a Aisak an nefalaig iyehki is ahes u nehpanwai La-heroi; is amen aien an nuarin pece inig et ahes nuritoga iran.
63Is alau ijo a Aisak an jupura parago nalaigaheni: is easpan aien, um alum kamela napam vaig.
64Is lep easpan a Ribeka, is wat ecet Aisak aien, is ahes a kamela aien um asuol.
65Is upyi ahodai naheca aien, um ika, Di naico et edo aien anliin pece par aubilid caija? Is um ika a naheca, Et atimi alupas unyak aien: va nitai inigki is leh napelumai a Ribeka, um adahpoi yin.
66Is asuptecnaig ehele Aisak a naheca iyehki niji itai asega is ago aien.
67Is imiapan Ribeka a Aisak anliin neom u Sera risin, um leh yin ehgan; is aiyu inliinmopon aien vai Ribeka: is lep eropse inliinmopoi Aisak vai inmas u risin.
Currently Selected:
Jenesis 24: VAO63
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Vanuatu Bible (Intas Etipup) © United Bible Societies, 1863, 2019.