Jenesis 20
20
Nuarin tas alupas 20.
1 Et amen an pece Cirar a Ebraham. 2 Et ateri aien vai ehgan, et leh Sera a Abimelek. 3 Et acaiji Abimelek a Atua an numjeg ahnag o un vai Sera. 9 Et acaiji Ebraham a Abimelek, 14 um imiadumoij pan Sera, 16 um lep acaiji yin. 17 Er ago cehcehe Abimelek an nalaigaheni u Ebraham.
1IS ahes eahki a Ebraham, um apan alaig an pece inig et ahes nuritoga iran, um amen Cirar, an niblan pece Ketes im Sur.
2Is ika a Ebraham vai Sera ehgan, Et atahig irak aien: is abraig pan hal a Abimelek natimarid an pece Cirar, um leh Sera.
3Ja is ehcohos pan ehele Abimelek a Atua an numjeg ahnag o un an nepig, um ika ehelen, Nai idivaig natimi mas aiek, vai intakata inigki na mun leh yin aiek; et ehgan tah aien.
4Ja is eti apan ehelen a Abimelek: is ika aien, Ak Natimarid, napu lep auahas nup uran pece inigki aiek era upene, ka oʼo?
5Is ika ehelek a Ebraham, Et atahig irak aien; is lep ika a Sera, Et atamaig irak aien: ek mun ago nedo inigki ainyak an liinmopok inveijec, im naktaktai upene unyak.
6Is ika a Atua ehelen an numjeg ahnag o un, Maiya, ek ato ainyak mika na mun ago nedo inigki aiek an liinmopom inveijec; ek mun ahtadi euc ainyak va an jim ago nedo has aiek vai nyak: ek mun idim atapnes euc ainyak va an jim ubli yin aiek.
7Namu atcijai ehgai natimi inigki ehelen aiek; et aprofeta aien, etpu lep ago nalaigaheni vai euc aien, napu umoh aiek: ja el et eti atcijai yin aiek, napu idim mas aiek, im natimi asega unyum.
8Is auroauro a Abimelek, um aiji an nuhihialeg, um asjapicnaig ilpu atimi alupas asega o un, um asuptecnaig nitai iji igki asega ehele ra: eris imtitaig alupas ara.
9Is ahlaig vai Ebraham a Abimelek, um ika ehelen, Inhe nigki as ago vai cama aiek? kis ago nev edo ainyak par auahas inliinmopom, mika as ati nedo has alupas irak aiek, im lep irai nup uran nelcau unyak? as ago nedo inig vai nyak aiek, et eti upene nago vaig.
10Is ika ehele Ebraham a Abimelek, As ecetai inhe aiek, par ago nedo inigki?
11Is ika a Ebraham, Kis idim aktaktai ainyak mika era eti imtitai Atua a nup an nuarin pece inigki; erupu atgei nyak ara vai ehgak.
12Im lep inig, et idim atahig irak aien; et halav atahig u etmak aien, jam eti halav atahig u risik; kis leh yin ainyak ehgak.
13Im lep inig, an nopan iyehki, is wat asaig a Atua mika ki udei nimnim u etmak ainyak, kis ika ehelen ainyak. Namu aiheuc vai nyak aiek, um ago nedo inigki; intu wit apan an taka uarin akaijau, namu asaig aiek vai nyak mika, Et atamaig irak aien.
14Is lucsei siip a Abimelek, im kurimatau, im ilpu aheca atamaig, im ilpu aheca atahig, um alupai Ebraham, um lep atcijaig Sera ehgan ehelen.
15Is ika a Abimelek, Almoi inpece unyak aiek an nuhup unyum: um amen an nuarin inig na merit vaig aiek.
16Is lep ika ehele Sera a Abimelek, Ek mun idim alupai natamaig iram nuari silver et wun dausant ainyak: mika yi auanimtan imi euc napelumai adahpoi nesganimtam aien, an nuhup ura asega era ahced euc ara, im lep natimi asega: is ated yin aien an nedo inigki.
17Is ago nalaigaheni vai Atua a Ebraham: jai is ago cehcehe Abimelek, im ehgan, im ilpu aheca atahig o un a Atua; eris asvalav ara.
18Is ika a Ihova eri jim asvalav a ilpu takata asega an nimnim u Abimelek, vai Sera ehgai Ebraham.
Currently Selected:
Jenesis 20: VAO63
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Vanuatu Bible (Intas Etipup) © United Bible Societies, 1863, 2019.