Eksotus 2
2
Nuarin tas alupas 2.
1 Eh apos Moses. 3 Eh ati yin an nelcau an nofowai. 5 Et ecet yin a inhalav atahig u Fero. 11 Et atgei nup Ijipt et ethi a Moses, 13 um acaiji nup Isreel et ethi. 15 Et ahapan an pece Mitian aien, 21 um leh Sipora ehgan. 22 Eh apos Cerson. 23 Et atahaijeg nahlaig u nup Isreel a Atua.
1IS apan a mapoi Livai is ethi, um leh natahig is ethi mapoi Livai ehgan.
2Is um opoc a intakata iyehki, um apos inhalav atamaig o un: is wat almoi yin aien mika is eklim upene aien, is adenai yin aien irai mohoc is eseij.
3Is wat lep ehka vai yin nadenai yin vaig, is ago nelcau auwau aien, um aspi an nosal im inhataplan, um ati inhalav iran; is ati irai auwau aien an nohmun wai.
4Is aiji itac acen a natahig iran, mika yi ato kit eri uhauo yin.
5Is apan a inhalav atahig u Fero mika yi ereuc an nofowai; eris lep atga an nahaijin wai a ilpu atahig o un; is wat ecetai nelcau aien irai auwau, is abrai naheca atahig o un aien mika yi apan um leh.
6Is wat asalgei aien, is ecet inhalav aien: is idim taig a inhalav. Is aiheuc vai yin aien, um ika. Inhal u tah nup u Hibru nigki.
7Is um ika a natahig iran ehele inhalav atahig u Fero, Ekpu apan ainyak um ahlaig vaig tah intakata alidai inhalav irai nup u Hibru, mika yi alidai inhalav inigki aien vai euc, ka oʼo?
8Is um ika ehelen a inhalav atahig u Fero, Apan aiek. Is apan a natahig, um ahlaig vai risi inhalav.
9Is ika ehelen a inhalav atahig u Fero, Namu leh inhalav inigki aiek, um aminjinai yin vai nyak, ekpu alupai euc nimtan ainyak. Is leh inhalav a intakata, um aminjinai yin.
10Is wat alupas a inhalav, is imiapan yin aien ehele inhalav atahig u Fero, is lep hal o un aien. Is anvi nidan aien par ika Moses: is ika aien, Kis idim asei yin an wai ainyak.
11An nopan iyehki is wat ohoigmeto a Moses, is apan aien ehele ilpu etwan, um almoi nauritai ehka ura: is ecet nup Ijipt is ethi aien nauud vaig nup u Hibru is ethi irai ilpu etwan.
12Is easeas jipe aien, ja is wat eti ecet tah natimi aien, is atgei nup Ijipt aien, um adenai yin an nauanavig.
13Is wat lep apan aien an tak apnyin, erus lep ehtauo jipe a nup u Hibru is ero: is ika aien ehelen is ago nedo has aien vai etwan, Na a uri aiek par abli etwam?
14Is ika aien, Is ati euc a di mika an atimarid unyima aiek, um atimi ahilek nedo unyima? Na ika aiek an atgei nyak, et idivaig as atgei nup Ijipt aiek, ka oʼo? Is imtitaig a Moses, um ika, Er idim ato ko nitai inigki.
15Is wat atahaijeg a Fero va nitai inigki, is ahilek Moses aien mika yi atgei yin. Ja is aha a Moses vai Fero, um amen an pece Mitian: is lep ateucse aien u nehpanwai is ethi.
16Eris eteuc a ilpu halav atahig is seven u natimi alupas Mitian: eris apan ara um athun wai, um atladwise irai elcau lumai siip u etmara.
17Ja eris apan a ilpu atimi asgi siip um ahtahlo ra: ja is atidai a Moses, um atau imi ra, um alumai siip ura.
18Eris wat yetpan ara ehele Riuel etmara, is ika aien, Et echamecha, eka par auroauro aijaua um ham inpig?
19Eris um ika ara, Et mun imiaras cama a nup Ijipt et ethi vai ilpu atimi asgi siip, um lep tam athun wai ehelema, um alumai siip.
20Is ahodai ilpu halav atahig o un aien, um ika, An yek eda aien? eka mun a uri aijaua par udei yin? ahlaig vai yin um alaan nitai caig.
21Is upene irai Moses namen vaig ehele natimi iyehki: is alupai Moses Sipora inhalav atahig o un aien.
22Is apos inhalav atamaig imi yin aien, is anvi nidan a Moses par ika Cersom: is ika aien, Ek atimi an taka pece ainyak an pece inigki.
23Is wat ti pan itac nadiat is ahinag, is mas a natimarid Ijipt: eris ohocred a nup Isreel va nauritai ehka, um ehtigtaig; is lep aridjai an nuhup u Atua nehtigtaig ura va nauaraheca ura.
24Is atahaijeg naunyauwaig ura a Atua, um imiehva intas etipup o un ehele Ebraham, im Aisak, im Jekob.
25Is alum nup Isreel a Atua, is lep aiheuc vai ra a Atua.
Currently Selected:
Eksotus 2: VAO63
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Vanuatu Bible (Intas Etipup) © United Bible Societies, 1863, 2019.