ማ̈ቶ̈ሳ 2
2
ቤ̈ርስ ፋይዲዝ ኤራን ኣዋ̈ፍ ኬሲፖ̇ ዬይዴ
1ሄሮዶ̈ሲ ካ̈ቲ ማ̈ቃ̇ር ጋድ ኣቂሳዝ ላይን ጋርታ̇፥ ዬሱ̈ሲ ጋሊላ ጋዳ̇ ዎ ቤቴሌ̈ም ካታሚን ጋርታ̇ ዬሊንቲ̇ኖፖ̇ ዎሃ ቤ̈ርስ ፋይዲዝ ኤራን ኣዋ̈ፍ ኬሲፖ̇ ዬሩሳ̈ላም ዬ̈ሪ፥ 2“ዬሊንቲ̇ኖ ኣይሁድ ካ̈ታ ዎይዲ ዎ? ኑ̈ኒ ኣዋ̈ፍ ኬሲ ጎይ ኢ ቤ̈ርሲ̇ን ቤንቲ̇ን ኢዞ ቤቃ̇ር ኢ̈ቦ ጎሽታ̇ንዳ̇ብ ዬይኔ” ጌይዴ።
3ካ̈ታ ሄሮዶ̈ሲ ዪኖ̇ ሲስካ̇ር ኢ̈ጪ̇ዴ፤ ዬሩሳ̈ላም ካታሚን ጋርታ ዎ ኣሳንር ዎይ ኢባር ዎልኣ ኢ̈ጪ̇ዴ። 4ኢናፖ̇ ኢ ቄ̈ሳ ኣላቃንኬ ሙ̈ሳ ሂጋ̇ ታማ̈ርሲዝ ኣሳን ጼይጊ ሺ̈ሻ̇ሪ “ክርስቶ̈ሲ ዬሊንታ̇ዝ ቤሲ̇ን ዎይዲያ?” ጋ̈ር ኦይጪ̇ዴ።
5-6ኢንታ̇ር ኢ̈ኮ፥
1 “ ‘ኣ̈ሽ ዪሁዳ ጋዳ̇ ዎ ቤቴሌ̈ም ካታሚንዴ፥
2 ኔ̈ኒ ዪሁዳ ጋዳ̇ ዎ ጴች ካታማንፖ̇ ኣባካር ጉ̈ጻ̇ባሴ።
ኣባ ጌዬጌይንዶ፥ ቴ ዎርዣ ኢስሬ̈ላ ናኣን ኣቂሲዝ ኣሲ ኔ ጋርታ̇ፖ̇ ኬስኪ̇̈ሬ’ ጋ̈ሪ ናባ ጻ̈ፊኖኮታ̇ቦ ክርስቶ̈ሲ ዪሁዳ ጋዳ̇ ቤቴሌ̈ም ካታሚን ጋርታ̇ ዬሊንቲ̈ሬ” ጌይዴ።
7ዪኒ̇ፖ ዎሃ ሄሮዶ̈ሲ ቤ̈ርስ ፋይዲዝ ኤራን ጋሳ ጎይባር ጼይጋሪ፥ ቤ̈ርሲን ቤንቲ̇ኖ ኬሊ̇ን ኮሺንቺ̇ ኦይጫ̇ር ኤሪዴ። 8ሄሮዶ̈ሲ ኤራንኮ “ዪንቲ̇̇ ቤቴሌ̈ም ሉካ̇ሪ ናኣ ዎይዲ ዎኮ ኮሺንቺ̇ ኮያሪ፥ ዲጚኖፖ̇ ዓኒ ታ̈ናር ሉካ̇ራ ኢ̈ብ ጎሽታምፔ̈ኒ ዬ̈ሪ ታ̈ቦ ሶ̈ሊብቴ” ጌይዴ።
9ኢንታ̇ር ካ̈ታ ጌይኖን ሲስኪ̇ኖፖ̇ ዓኒ ኬስካ̇ር ሉኪ̇ዴ። ኢንቲ̇ ሉካ̇ምባራ ኣዋ̈ፍ ኬሲ ጋልዳ ኢንቲ̇ ቲ̈ን ቤቂ̇ኖ ቤ̈ርሲን ኢንታ̇ ቲ̈ናራ ናኣ ኣቂላ ዎ ቤሲ̇ን ሉካ̇ር ኤቂ̇ዝ ዲራ̈ስ ኢንታ̇ ቲ̈ኒን ቲ̈ኒን ኣ̈ር ኤ̈ጛር ዬልዴ። 10ኢንቲ̇ ቤ̈ርሲን ቤቃ̇ር ዎይሊን ኡፋይቲ̇ዴ። 11ኢናፖ̇ ኢንቲ̇ ኬ̈ ጌላምባራ ናኣ̈ዲ ፌ ኢንዲ̇ን ማ̈ራሚባር ዎልኣ ዎዶ̈ን ቤቂ̇ዴ። ኢናፖ̇ ቡቂንታ̇ር ኢ̈ብ ሞ̈ኪንቲ̇ዴ። ማ ፌ ሳ̈ጺኒን ፊርቃ̇ሪ ዎርቃ፣ ኢጻ̈ናኬ ካርባኬ ኢ̈ብ ኪልስ ኢሚ̇ዴ።
12ዪኒ̇ፖ ዓኒ ኢንቲ̇ ማ̈ቃ̇ር ሄሮዶ̈ስኮ ሉካካ̇ይፌ̈ኒ ጾ̈ሳ̇̇ ኣይባባር ኢንታ̇ብ ሚ̈ን ሶ̈ሊኖኮታ̇ቦ ሜላ ጎይባር ማ̈ቃ̇ር ፌ ኣ̈ል ሉኪ̇ዴ።
ማ̈ራሚኬ ዮ̈ሴ̈ፋኬ ናኣ ኣቂላ ኤካ̇ር ባዪ ጊብጻ ጋዳ̇ ሉኪ̇ዴ
13ኤራን ሉኪ̇ኖፖ̇ ዎሃ ጾ̈ሳ̇̇ ኪ̈ታንቻ̇̈ዲ ዮ̈ሴ̈ፋቦ ኣይባባር ቤንታ̇ሪ “ሄሮዶ̈ሲ ናኣ ዎንዳቦ ኮዪዛኮታ̇ቦ ዲንዳራ ናኣዲክ ኢንዲንዲክ ዎልኣ ኤካ̇ራ ጊብጻ ሉካ̇ር ባያቤ። ዎዳ ኔ ዎ ቤሲ̇ን ማ̈ቃ̇ቤ ጋ̈ር ቴ ኔ̈ብ ሶ̈ሊዝ ዲራ̈ስ ኢና ዶኣቤ” ጌይዴ። 14ዮ̈ሴ̈ፊ ቃም ዲንዳሪ ናኣ̈ዲክ ኢንዲንዲክ ኤካ̇ር ጊብጻ ሉኪ̇ዴ። 15ሄሮዶ̈ሲ ዓይቂ̇ዝ ዲራ̈ስ ኢና ዶኢዴ። ዪና̇ር ማ̈ቂ̇ኖንዳ̇፥ ጾ̈ሳ̇̇̈ዲ ናቢባራ “ታ̈ኒ ታ ናኣ ጊብጻ ጋዳ̇ፖ̇ ጼይጋዴ” ጌይኖ ቃ̈ሊን ፎቲንታ̇ምፔ̈ኔ።
ሄሮዶ̈ሲ ኣቂሊ ናኣን ዎሲዴ
16ሄሮዶ̈ሲ ኤራን ኢያ ማቂ̇ኖን ኤራሪ ዎይሊን ጎይሊዴ። ኢ ቤ̈ርሲ̇ን ቤንቲ̇ኖ ኬሊ̇ን ኢንታ ኦይጫ̇ሪ ቲ̈ን ኤሪኖኮታ̇ቦ ኢዞ ፋይዳሪ ቤቴሌ̈ምኬ ኢዝ ቡጊድባር ዎ ሳፋራን ጋርታ̇ ዎይ ዎታዳራ ሚሻሪ ናምኢ ላይፖ̇ ኤ̈̇ር ቶ̈ራ ዎ ኣቲና ናኣን ዎይ ዎሲዴ። 17-18ዪና̇ ኢዝባራ ናባ ኤርማ̈ሲ፥
“ዬ̈ፊኬ ዎይሊን ዉይሶ ራ̈ማ ካታሚን ጋርታ̇ ሲስኪ̇ንቲ̇ዴ፥
ራሄ̈ላ ፌ ናኣንቦ ዬ̈ካ̇ዴ፥
‘ጋርዣቤ’ ጌይናር ኢጻ̇ዴ።
ኣባ ጌይን ኢንቲ̇ ዎይ ዓይቂ̇ ዉሪኖኮታ̇ቦ” ጋ̈ር ጻ̈ፊኖ ቃ̈ሊን ፎቲንታ̇ዴ።
ዮ̈ሴ̈ፋ ባሮ̈ዲ ጊብጻፖ̇ ማ̈ቂ̇ዴ
19ሄሮዶ̈ሲ ዓይቂ̇ኖፖ̇ ዓኒ ጾ̈ሳ̇̇ ኪ̈ታንቻ̇̈ዲ ዮ̈ሴ̈ፋቦ ጊብጻ ጋዳ̇ ኣይባባር ቤንታ̇ሪ፥ 20“ናኣ ኣቂላ ዎንዳብ ኮዪዝ ኣሳን ዓይቂ̇ኖኮታ̇ቦ ዲንዳራ ናኣ ኢንዲንባር ዎልኣ ኤካ̇ራ ኢስሬ̈ላ ጋዳ̇ ሉካ̇ቤ” ጌይዴ። 21ዮ̈ሴ̈ፋር ዲንዳር ናኣ ኢንዲንባር ዎል ኤካ̇ር ኢስሬ̈ላ ጋዳ̇ ማ̈ቂ̇ ሉኪ̇ዴ።
22ዎቲናካሬ ሄሮዶ̈ስ ቤሲ̇ን ኢ ናኣ ኣርኬሎ̈ስ ጌይዛ ካውቲኖን ሲስካ̇ሪ ዮ̈ሴ̈ፊ ኢና ሉካ̇ንዳብ ኢ̈ጪ̇ዴ። ጾ̈ሳ̇̇ ኢ̈ቦ ኣይባባር ሶ̈ሊኖኮታ̇ቦ ጋሊላ ጋዳ̇ ሉኪ̇ዴ። 23ኢናፖ̇ ና̈ዝሬ̈ት ካታማ ሉኪ̇ ዶኢዴ። ዪና̇ሬ ናቢባራ “ና̈ራ̈ዲ ና̈ዝሬ̈ታ ኣስ ጌዪንቲ̈ሬ” ዪዝ ጌዪ ሶ̈ሊኖ ቃ̈ሊን ፎቲንታ̇ምፔ̈ኔ።
Currently Selected:
ማ̈ቶ̈ሳ 2: ኦጫ̈ቃማ
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
