Yoosuwa 7
7
QAAKAN BAAHE UMAANE
1YALLI Israayil marak, «Yerikô-magaalak baysi akak faxxiima duyye bayisaay; yoh rikeek baxsah heeh meqe duyye baxsah haa» 'yaanam iyyeh suge'mmay, woo amri moggoliminna. Qaakan deqsita num woo amri cineh sugeeh; tohuk gexxaamah YALLIH bagcarra Israayil mara gufte. Qaakan Karmi deqsita numih baxak teneeh, Dabdi deqsita numuk kaadu baxi baxak ten. Dara deqsita gulubuh aabakuk yen. Dara Yuuda deqsitta kedoh aabakuk yen.
2Yoosuwa, Yerikô-magaalak tu yakke mara Qaay deqsitta magaala fan ruube. Qaay, Beetal deqsita aracak ayrô-mawqa le kabut raqta magaalaay; Beet-Awen deqsita aracak garil tan magaalak ten. Keenik iyyeemih, «Gexay Qaay magaala wagitaay baaxo elle tani'nna gibitay ama» keenik iyye. Gexeenih yuduuren waqdi, 3yubleenimit yaabeeniih, annah iyyen. «Qaay magaala qunxaah, tet mabbuuxuh kulli num akah gexam mali. Namma alfi akki kee sidiica alfi yakke mari dibuk xiqele. Inkih tan qaskar gaaduh ruubaanam taqabik sah xiqtam malik maruubin» kaak iyyen. 4Tohih sabbatah sidiica alfih num woo magaala tabbaxuh gexxe. Takkay immay wadirih ken gacsen. 5Qaay mari magaalah afak keenit aben ardat boodooda elle tan arac fan ken baaheeniih; qaleek ayradduk ken elle oobisen ikkel, soddom kee lica num keenik qiden. Sarrak Israayil marak niya raddeeh, meysi ken tibbixe.
6Too waqdi Yoosuwa abeh yan wariggah sara isik qanxiseeh; YALLIH Qahdih-Sanduguk foocal gommoh rade. Israayil makaabon kaadu toh abteeh; tokkel aben arka yaybulleeni'gidih amol siisa luk magrib tikki 'yam fan gommoh sugen. 7Too waqdi Yoosuwa iyyeemih, «YALLAW, Mulki le Dageltaw, fiiruk Ordon weeqaytuk macah nee tabisse? Akke macah nee bahte? Amoorâ-marih gabal nee hayta'gidih nee maay bahte? Hay, nee bayissa'gidih nee maay bahte? Ahak Ordon weeqaytuk woo qaxal raqnam neh ayse rarte. 8Taway Goytaw, Israayil mari naqboytiitik yoowweh yanik, anu maca abbasitu! 9Kanqaan kee raqqa 'ye maray a baaxol yanihiyya inkih ta xaagu aabbeleeh; marot hayya nee heenih nakkeemiik nee qidelon. Isi migaaqih taagah yi Goytaw, tahak tuk teena ab» iyye.
10Sarrak YALLI kaak iyyeemih, «Ugut. Baaxok bagul annah magacin. 11Israayil mari dambi lem baaheeh; anu ‹Maabina› keenik excem abeenih ken lih hee qahdi makeenih. ‹Mabena› exce duyye garqeenih isinnih haysiten. Isinni duyyet yesgelleeniih too duyyek diraabah niimi iyyen. 12Israayil mari naqboytiitit akah koysite weem tohih sabbata. Wadir wadirih keenik yoowweenih; toh akah keenit tekkem, keenit kaadu baatî-cokmi yekkeemih sabbata. Isinnih mahaysitinay bayisa siinik exce duyye bayse'kal, sin qaxat magaca. 13Ugut. Away ummatta taahirroysaay yi foocah yamaateeni'gidih bical ken hay. ‹YALLAY sin doore Dagelta kinnihiyya, «Israayil ummatey, anu ‹Mabena› siinik exce duyye teddereenih immay, tamaham bayse'kal naqboytiitit makoysittan» siinik iyyah yanik, beera bical gaca› keenik inxic. 14Maaca kedo-kedoh gacca xicay fooca fan ama keenik inxic. Too waqdi anu koo ayballayu waa kedo, gulub-gulubuh gacca 'yeenih yamaatoonay. Inki gulubuh yan maray anu koo ayballayu waahiyya, buxa kee buxâ-marah gacca 'yeenih fooca fan yamaatoonay. Buxâ-marah tittak yan maray anu koo ayballayu waahiyya kaadu, num-numuh gacca 'yeenih fooca fan yamaatoonay. 15Sarrak anu koo ayballayu waa numuu, ‹Mabena› exce duyye bee num kinnim aaxigettooh; too waqdi kaa kee kay buxah mara kee usuk yedderem inkih cararisaanama. Israayilil qaybih tanim bahteeh yo'lih luk yen xagana bayissem too numu» iyye.
16-17Too ayrok geeri ayro Yoosuwa Israayil mara kedo-kedoh hayya heeh fooca fan baahe. Yuudâ-kedo kaa yuybulleeh, ken gulubuh hayya heeh fooca fan ken xayyoose. Darâ-maray gulubuh tittak yanihiyya kaa yuybulle waqdi, tonnah kaadu, fooca fan ken xayyoose. Ken kaadu buxa kee buxâ-marah hayya heeh xayyoose. Sarrak Dabdî-buxah mara kaa yuybulle waqdi, kay buxah mara fooca fan xayyoose. 18Too waqdi Dabdi deqsita numuk rade mara num numuh hayya heeh baahe. Sarrak Dabdik baxi baxah yen Qaakan deqsita numuy abbak Karmi akak iyyan numuk baxah yenehiyyak caxxi yewqe. «Tamah kaa» iyye. 19Too waqdi Yoosuwa kaak iyyeemih, «Yi baxaw, YALLAY Israayil doore Dagelta kinnihiyyah nabna faylisaay; kay foocal abteemit yab. Abba haytem taway yoh warisay yok maaqarin» kaak iyye.
20Qaakan kaal gacsemii, «YALLAY Israayil doore Dagelta kinnihiyyal dambi lem bahtem yoo; toh numma. 21Dannabah orbisne duyyeh addat qax-meqe Baabelon marih rarayto kee namma kiilo takke lakqo kee kiilok garab yakke dahab uble waqdi, ossokooteh innih haysite. Too duyye yi siraqih addat ubkuneh abbixe. Lakqo guba akak heeh abbixeeh, tokket daanah siinih sugele. Ta duyye elle beem tama'nna» iyye.
22Too waqdi Yoosuwa kay siraq fanah sinam ruubeeh; woo mari arduk gexxa 'yeenih, woo duyyey Yalli isinnih mahaysitina axcuk amri akah yeceehiyya edde yubkune aracat geen waqdi hagga iyyen. Lakqo gersi duyyek gubat yooqoreh suge. 23Woo mari woo duyye woo siraqih addak edde yubkuneh suge ikkek beyya heenih, Yoosuwa kee inkih yan Israayil marih gabal heen. Sarrak woo duyye YALLIH Qahdih Sanduguy YALLIH mano taybulleehiyyak foocal heen. 24Yoosuwa kee raqqa 'ye Israayil mari inkih yakkeenimik Qaakan yibbixeenih, kaa'lih kaadu beeh suge lakqooy rarayto kee dahab edde yibbixen. Toh lih kaadu kay xaylooy kay laay kay danoonaay illiiy siraq kee kalah kaadu luk suggu 'yem inkih Gadaamâ Golo deqsitta golo fan been. 25Sarrak Yoosuwa kaak annah iyye. «Annah tan umaane nel akah bahtem macaay? Away YALLI umaane kol oobisele» kaak iyye. Tohuk lakal ummatta inkih xeet kaat hayteeh, kaa qiddeh. Tonnah kaadu kay buxah mara xeetit qideeniih, kay buxah mara kee usuk edderra heem inkih carariseenih. 26Amol kaak qalumuk fayya 'ta caddol xeet sittin bagul xiseeniih; woo xeet a saaku fan elle yan. Woo arac a saaku fanah migaaqah Gadaamâ Golo deqsita. Tohuk lakal YALLIH kaxxa bagcarra xamacteh.
Currently Selected:
Yoosuwa 7: NKM
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ