isizwur 9
9
1ibark rbbi ġ‑nuḥ d‑tarwa‑ns yini‑asn: «a‑ttarum tigatm tɛmmrm ddunit kullutt.» 2rad‑zġ‑giwn‑iksaḍn kullu luḥuš n‑lh̬la d‑igḍaḍ n‑ignwan d‑ma‑itštutuln f‑wakal d‑islman n‑imdwan, ar‑giwn‑tġuwḍn. giġ‑tn kullu ġ‑ddu‑ufus‑nun. 3ra‑tšttam zġ‑kullu ma‑iddrn ar‑itmussu. ġmklli‑awn‑yadlli‑fkiġ kullu tazgzut nna‑itmġayn a‑zġ‑gis‑tšttam, hati ġilad fkiġ‑awn kraygatt kra. 4walaynni a‑ur‑tšttam tifiyi nna‑ġ‑sul‑llan idammn. ašku tudrt, idammn a‑ġ‑tlla. 5wanna inġan bnadm ra‑ih̬llṣ atig‑ns, ig‑iyt luḥš nġd bnadm, ra‑immt f‑ssibt n‑idammn n‑walli inġa. 6wanna iffin idammn n‑bnadm, f‑ufus n‑bnadm a‑f‑rad‑ffin idammn‑ns ula ntta, ašku rbbi iskr bnadm f‑ṣṣurt n‑rbbi. 7imma kunni, zaydat ar‑ttarum tigatm, tɛmmrm ddunit kullutt.»
8yini rbbi i‑nuḥ d‑tarwa‑ns: 9«hati ġilad skrġ lɛhd ġ‑griyi didun ula amud‑nun tigira‑nun 10ula kullu lmh̬luqat ddrnin lli‑didun‑llanin, d‑igḍaḍ ula lbhaym ula kullu luḥuš n‑lh̬la lli‑didun‑ffuġnin zġ‑wanaw. skrġ‑t d‑kullu luḥuš n‑ddunit. 11skrġ lɛhd ġ‑griyi didun a‑ur‑sar‑ssh̬siġ kullu ma‑igan tifiyi. ur‑sar‑rad‑ngin‑waman ad‑fnun ddunit kullutt.» 12yini rbbi: «ġmkad a‑ra‑tg‑tmatart n‑lɛhd lli‑skrġ ġ‑griyi didun d‑kullu lmh̬luqat lli‑didun‑ddrnin, ig lɛhd idumn zġ‑ġilad ula kullu mayd iftan. 13ha taslit n‑unẓar giġ‑tt ġ‑umdlu n‑ignwan, ra‑tg tamatart n‑lɛhd n‑griyi d‑ddunit. 14ġakud nna‑dlġ akal s‑imdla ra‑di‑tban‑tslit n‑unẓar, 15swangimġ‑d lɛhd lli‑illan ġ‑griyi didun ula kullu ma‑iddrn ig tifiyi. ur‑sar‑rad‑ngin‑waman fnun kullu ma‑igan tifiyi. 16ġakud nna‑di‑tban‑tslit n‑unẓar ġ‑imdla n‑ignwan, ra‑stti‑tmnadġ swangmġ‑d lɛhd lli‑idumn ġ‑griyi d‑kullu ma‑iddrn ig tifiyi ġ‑ddunit kullutt.» 17yini rbbi i‑nuḥ: «ġmkad a‑tga‑tmatart n‑lɛhd lli‑skrġ ġ‑griyi d‑kullu ma‑igan tifiyi ġ‑ddunit.»
kraḍ tarwa n‑nuḥ
18tarwa n‑nuḥ lli‑d‑dids‑ffuġnin zġ‑wanaw gan sam d‑ḥam d‑yafat. iga ḥam babas n‑kanɛan. 19kraḍ‑ad a‑igan tarwa n‑nuḥ. ntni a‑zġ‑d‑kullu‑uškan mddn lli‑akutnin ġ‑ddunit kullutt.
20igr nuḥ ġ‑tfllaḥt iẓẓu aḍil. 21isu zġ‑waman n‑waḍil iktin, imlilliy ign ġ‑uh̬iyyam‑ns, ityalal malssa‑ns. 22yašk‑id ḥam lli‑igan babas n‑kanɛan, ar‑itmnad ġ‑babas ur‑ilsi yat, ar‑fllas‑isawal i‑sin aytmas ġ‑brra n‑uh̬iyyam. 23yasi‑d sam d‑yafat yan‑uḥayk f‑tġʷraḍ‑nsn, ar‑fttun tiġurdin dln igiwal n‑babatsn, ur‑n‑gllbn udmawn‑nsn ad‑ur‑ẓrn lḥalt lli‑ġ‑illa babatsn. 24ifaq‑d ilmma nuḥ zġ‑unufl, yissan mad‑as‑iskr yus lli‑imẓẓin, 25yini: «h̬ziyt a‑iga kanɛan. amqasa n‑imqasan a‑ra‑ig i‑aytmas.» 26yini‑daġ: «ambarki a‑iga rbbi sidis n‑sam. ra‑iwrri kanɛan ig amqasa n‑sam. 27a‑issigt rbbi i‑yafat, zdġn tarwa‑ns ġ‑ih̬iyyamn n‑sam, ig kanɛan amqasa ula i‑yafat.»
28tigira n‑unggay n‑waman f‑ddunit izzri nuḥ kraḍ id‑miyya d‑smmus id‑mraw (350) n‑usggʷas, 29aylliġ irgl ṭẓa n‑id‑miyya d‑smmus id‑mraw (950) n‑usggʷas, immt.
Currently Selected:
isizwur 9: SHILOT20
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Selected Old Testament in Tashelhayt (Latin script) © United Bible Societies, 2020.
Robert Bernard Dann.
