uMataayi 10

UYeesu akuvhatuma avhasundikwa 12

(uMaaliko 3:13-19; 6:7-13; uLuuka 6:12-16; 9:1-6)

1Pisinda, uYeesu ahavhiita avhasundikwa vhaakwe 12, ahaavhapa amaha aga kushimbizya impepo inkandamanu nu kuponia amavhinu gonti nu vhuyeyevhazu uvhwa mavhiila mu mavhiila. 2Amazina aga vhatumwa ivho 12 ge gano: uwa kwanda wu Siimoni (we izina ilyamwavho vhahatinji uPeeteli), nu Andeleeya umuzuuna waakwe nu Yaakobu umwana wa Zebedaayi nu Yoohani umunine waakwe. 3Avhamwavho wu Fiilipo nu Batolomaayo nu Toomasi nu Mataayi umusonchezya musonko nu Yaakobu umwana uwa Alufaayo nu Tadaayo nu 4Siimoni we ahayikungulaga kulwila insi yaakwe#10:4 USiimoni we ahayikungulaga kulwila insi yaakwe: IShiyunaani shikuti uSiimoni uMukananaayo. nu Yuuda uwa ku Kaalyoti, we pisinda ámwaniliiye uYeesu.

5UYeesu ahavhatumiilizya ivho 12, ahavhalajizya ahati, “Mutahasogole ku vhe te Vhaisilayeeli, poosye kwinjila mu nkaaya yonti iya mu Samaliya, 6nkandi musogole mu Vhaisilayeeli vhe vhali inza ingʼonzi zye ziteezile. 7Lwe mukujenda, mukumusyaje mutinji, ‘Uvhumwene uvhwa Mulungu vhupalamiiye.’ 8Muvhaponiaje avhavhinu nu kuvhazyusya avhafwe nu kuvhazelufwa avha mambombo nu kushimbizya impepo inkandamanu. UMulungu avhapiiye pa vhweleele, pe ishi, niimwe mufumwaje pa vhweleele. 9Mutahanyatule insavhaazya izya sahaabu, poosye izya mpiiya, poosye izya shaaba mu mfuuku zyinyu. 10Mutahanyatule imbuguulu, poosye amenda aga kugalulanya, poosye ivilyatu, poosye indoogo, mwe pe umuvhomvi akwanzilwa kuposheela ishaakulya kufuma mu mbombo yaakwe. 11Inkaaya yonti, poosye ulutala lwonti lwe vhavhaposheela, mulondolaje umuntu we angavhaposheela. Pe mutendamaje munuumwo kufishila pe mukwepa. 12Lwe mwinjila mu nyumba, muvhalamuhaje avhahaaya. 13Inga avhantu avha mu nyumba iyo vhavhaposheela ku vhutehamu, muvhalavhilaje kwa Mulungu kuuti avhaloote. Ileelo inga vhatavhaposheela, uvhuloote uvhwa Mulungu kwe vhusyalaje kuli imwe. 14Inga umuntu wonti mu nkaaya yonti, poosye mu nyumba yonti atavhaposheela, poosye atatejeelezya amazwi giinyu, lwe mukufuma mupupulaje nu lusuuto lwe luli mu vinama vwinyu.#10:14 Mupupulaje nu lusuuto lwe luli mu vinama vwinyu kwe kulolesya kuuti uMulungu akuvhahaana avhantu ivho, mwe pe vhakuvhahaana avhasundikwa vhaakwe. 15Nalyoli nkuvhavhuuzya kuuti, isiku ilya vhulonzi, avhantu avha mu nkaaya iyo vhaliposheela isunde ipiti kuluusya avhantu avha mu nkaaya iya Sodooma ni ya Gomoola!#10:15 Inkaaya iya Sodooma ni ya Gomoola: UMulungu áyilonzile inkaaya iya Sodooma ni ya Gomoola kuzya vhutalamalandu vhwavho. Vhaazya uVhwandilo 19:24-29.”

Amayimba ge gakwinza

(uMaaliko 13:9-13; uLuuka 21:12-17)

16“Yeenyi, nkuvhatumiilizya ngati ngʼonzi pahati pa mpumpi! Pe ishi, muvhanje nu vhushindamu uvhwa njeele inza injoha, havhili muvhanje mwe vhatonsu inza inkunda. 17Muvhe minso na vhantu, mwe pe vhalivhatwalaga kulongwa pa lukuvhato nu kuhomwa mu masinagoogi gaavho. 18Vhalivhatwalaga ku vhamwene na ku vhantu avhanji vhe vhali na maha, mwe pe imwe mwe vhasundikwa vhaane. Ileelo kuli imwe, iho he haliivha havhaliilizyo aha kufumwa uvhwahoome uvhwa lwitiho lwinyu ku kwavho, na ku vhe te Vhayuuda. 19Lwe vhakuvhatwala ku vhapiti, mutahogopaje kuuti muliyanga ishooni, poosye kuuti muliyangaga vhuli, mwe pe uTaata uMulungu alivhapanga izya kuyanga ahavhaliilizyo hehaala. 20Nkuyanga vhwevhulo, mwe pe te mwemwe muliyangaga, nkandi uMupepo uwa Taata wiitu uMulungu we aliyangaga kutuushila muli imwe.

21“Umunine alimwaniila uwamwavho, inga amugoje. Woope utaata alimwaniila umwana waakwe, inga amugoje. Vhoope avhaana vhalisambuha ku vhapaafi vhaavho nu kuvhagoga. 22Avhantu vhonti vhalivhavitilwaga, mwe pe mukundandata ine. Ileelo we alijimbiilila kufishila ku vhusililishilo we aliipokwa. 23Inga vhakuvhayimvwa mu nkaaya yimo, mushimbililaje mu nkaaya iyamwavho. Nalyoli nkuvhavhuuzya kuuti, te muhaamale kusogola mu nkaaya zyonti izya Isilayeeli she ne Mwana wa Aadamu nshiili kugaluha.

24“Umusundikwa atangamuluusya umusambiilizi waakwe. Havhili, woope umuzya atangamuluusya umwene waakwe. 25Umusundikwa akwanzilwa kuvha inza umusambiilizi waakwe, woope umuzya akwanzilwa kuvha inza umwene waakwe. Inga vhakumwita umuhaata nyumba kuuti wu Belizabuuli,#10:25 Belizabuuli lizina ilyamwavho ilya Seetano we mupiti uwa mpepo inkandamanu. Izina ili lyáfumiliine ni izina ilya Baali-Zebuubu. Izina ilyo lizina ilya mpepo yimo ye insi impalamani na Vhaisilayeeli vhahayipuutaga fwe wu mulungu waavho. vhuli, te vhahavhiite avhantu avha mu nyumba yaakwe izina ivhiivhi nkaani?”

UMulungu weeka we akwanzilwa kumwogopa

(uLuuka 12:2-9)

26“Pe ishi, mutavhogopaje avhantu ivho. Zyonti zye zizyihiime ziliivha apazelu, havhili zyonti zye zili kukwilu zilivumbuha. 27Zyonti zye nkuvhavhuuzya mu shiisi, muziyangaje mu vhuzelu. Havhili, zyonti zye mukuzyivwa kukwilu, muzikumusyaje apazelu. 28Mutavhogopaje vhe vhakugoga we muvhili vhweleele, nkandi mumwogopaje uMulungu we akulovwa nziila mwi ipalaazya ilya mwoto! 29Vhuli, utudunduulu tuvhili vhatakukazya ku mpiiya nyinsi vhweleele? Ileelo poosye vhwevhulo, naahamo ahadunduulu he hakugwa pansi ishisita ulukasamo ulwa Taata wiitu uMulungu. 30Ileelo imwe uMulungu azivhaziizye poosye ni nsisi izya mu matwe giinyu. 31Pe ishi, mutogopaje, mwe pe imwe mwe vha nsavho kuluusya indunduulu inyinji. 32Umuntu wonti we akuvhavhuuzya avhantu, kuuti akundandata ine, niine ndimuvhuuzya uTaata waane uwa ku mwanya, kuuti uyo mulandati waane. 33Ileelo umuntu wonti we akuhaana kuniitiha pilongolela ilya vhantu, niine ndimuhaana pilongolela ilya Taata uwa ku mwanya.”

Uvhulugu kufumiilana nu lwitiho

(uLuuka 12:51-53; 14:26-27)

34“Mutasiivhaje kuuti ninzile kuleeta uvhutehamu mu nsi. Ndaali! Ninzile kuleeta uvhulugu. 35Nkuyanga isho, mwe pe ninzile kuvhalwisya umwana umwanaavuli nu taata waakwe, woope umwana umwantanda nu maayi waakwe, woope umuha mwana nu nyinavwala kuuti vhativwanaje. 36Havhili, avhalugu avha muntu vhaliivha vhantu vha mu nyumba yaakwe.#10:35-36 uMiika 7:6 37Umuntu wonti we akumukunda uyise, poosye unyina kuluusya kunkunda ine, uyo atankondeeye. Havhili, wonti we akumukunda umwana waakwe umwanaavuli, poosye umwantanda, kuluusya kunkunda ine, woope atankondeeye. 38Umuntu wonti we akwanza kundandata ine, ayikungule, ayiitishe amayimba, poosye nu kufwa. Inga atakuvhomba vhwevhulo, atankondeeye. 39Umuntu wonti we akwanza kuvhupoha uvhulanzi vhwakwe, alivhulovwa. Ileelo umuntu wonti we akuvhulovwa uvhulanzi vhwakwe ku zyane, alivhupoha.”

Avhantu vhe vhaliposheela ivipeelwa

(uMaaliko 9:41; uLuuka 10:16)

40“Umuntu wonti we akuvhaposheela imwe, akumposheela neene. Woope we akumposheela ine, akuvha akumuposheela ula we antumiliziizye. 41Umuntu wonti we akumuposheela umukuvhwi, mwe pe mukuvhwi, uMulungu aliimupa ishipeelwa inza isha mukuvhwi. Havhili, wonti we akumuposheela umuntu umugolosu, mwe pe mugolosu, uMulungu aliimupa woope ishipeelwa inza isha mugolosu. 42Nalyoli nkuvhavhuuzya kuuti, umuntu wonti we akuumupa aminzi aga kumwela, wooka muli ivha vhe vhakuloleha vhatahondeeye, mwe pe mulandati waane, uMulungu aliimupa amalipilo gaakwe.”

Currently Selected:

uMataayi 10: nih

ማድመቅ

Copy