Matai 9
9
1Pwu umwene akipaka mwiboti akalovoka ukubiha mbutsenge vwa mwene. 2Pwu vakangega ujyunge umunu uvi ali nuvutamu vwa kisusa, vakampimba pavusaga. Umwene UJesu vwu aluvwene ulwidiko lwa vene, pwu akatsova nave uvi ali nuvutamu vwa kisusa akata: Vwidulusage vuvule vi mwana vango, mańa ndikusyikye inongwa tsako. 3Pwu avange avamańakalata vakisagila mwitumbu vakata: Uju ikumelula Unguluve lweli. 4Umwene UJesu vwu atsivwene itsu vali natso mwitumbu pwu akata: Tsu mukisagila tsiki imbivi itsi munumbula tsińo? 5Lyu lyebepe liliku nilya kuta ndikusyikye inongwa tsako, nilya kuta ima gendaga vuvule? 6Pwu ndita mummańage Uńamunu ukuta isyikila inongwa nkilunga umwu, pwu ndikukuvule uve ndita: Ima, pimba uvusaga vwako, uvujage kuvutsenge vwako. Lyu akatsova ku uvi ale nuvutamu vwa kisusa ili. 7Pwu umwene akima akavuja kuvutsenge. 8Vwu vatsivwene tsitsitsi avanu ikipuga kyoni pwu vakadwada, vakanginya Unguluve ulwakuva vakavona avapye amaka aga avanu.
9Pwu UJesu vwu ahumile baho vwu igenda vuvule, pwu akambona umunu uvi vatetsaga vi Matai ilitavwa. Akavona atamile pavusangulilo amasango, akamwilanga akata: Uṅongage. Pwu umwene akima akankonga. 10Avwene vwu atamile pakulya isinu nńumba, pwu vakabiha umwu ale navasangutsi navatulanongwa va vongosu, vakatsitama nu-Jesu navakongi va mwene pakulya isinu. 11Avene avapalisai vwu vambwene pwu vakavavutsa avakongi va mwene vakata: Umańisi vińo ilya kiki isinu navasangutsi navatulanongwa? 12Umwene UJesu akapulika itsu vatsovaga pwu akavavula akata: Avadulusu vwu navikundonda untuṅanya, bako va vatamu vwu vikundonda untuṅanya. 13Mbihage lino nkalimańage ilita: Ki kisa kyu ndilonda uńe, nandilonda inekelo. Mańa nanditsili nkuvilanga avagolosu. Bako nditsile nkuvilanga va vatulanongwa.
14Pwu vakambutsa avakongi va Johani vakata: Nuvwe navapalisai tukusileka kiki sikutsoni isinu vwu avakongi vako navikusileka? 15Umwene UJesu akavavula akata: Pwu vatetsaga valile ndeti avalyasinu sya pavutegulane vwu vali nave untegulandala? Lola likwitsa ilitsuva ilyu valavona untegulandala ajagile. Pwu lweli pwu valasileka isinu ilitsuva ili. 16Nakuli ujyunge uvi ilenga ikipabikilo kya nsabwa umpya pansabwa undala. Mańa ikipabikilo ikipya kipapuka pansabwa undala, pwu ugwene unsabwa gukwongeletsa ukuswa. 17Nagwene uńeke gwa masilu nakuli ujyunge uvi iduda mmipako imilala gya masilu. Mańa vangave vadudilemwo, pwu gubatsula imipako, pwu agene amasilu gidudika, nagyene nimipako givejangika vuvule. Bako uńeke gwa masilu viduda mmipako imipya gya masilu, pwu syoni siponaga vuvule.
18Vwu ali pakuvavula tsitsitsi pwu vakavona ihegelela ujyunge umańisi va vene umbaha, ibiluka kumwene ita: Umwalivango aswe lino vuvule-vule. Tuvuke kwane ukambike ikivoko, pwu itsuka. 19Pwu UJesu akata ndibihe nave. Navene avakongi va mwene vakagenda nave. 20Pwu undala ujyunge uvi ale nilimali imyaka kitsigo nagivili akahegelela kumbele akamwabasa kukilundwa kya mwene kumalunde. 21Ulwakuva umwene mwitumbu akata: Ndingave ndikumwabasa ki kilundwa kya mwene kyene pwu ndipona. 22Umwene UJesu akakilivuka akambona akata: Vwidulusage vuvule vi mwana vango lukupokile lwu lwidiko lwako. Pwu, undala akapona pakavalilo aka vuvule. 23UJesu vwu atsisike nńumba jya mańisi va vene umbaha, pwu akavavona mumwa navaku-vasivwivwi navanu ikipuga vuvule avapelaga ukupwata. 24Vwu akavavula akata: Vuki, mańa akahinza nakaswili, bako kagonelye itulu. Avene pwu vakammeka. 25Vwu vavahumitse panzi avanu umwu vavelye ikipuga kyoni, pwu akingila nńumba, akibata ikivoko akahinza, pwu kakasisimuka. 26Pwu inongwa tsitsitsi tsikapulikika nkilunga kyoni kilya.
27Vwu UJesu ahumile baho vwu igenda vuvule, pwu vakankonga avabosu vavili, vwu vakilanga vakata: Vi ńa-Ndaviti utulililage ikisa! 28Vwu ingye nńumba, pwu vakahegelela kumwene avabosu ava. Pwu UJesu akavavutsa akata: Nda mwidike uńe ukuta ndilumańile ukuvomba itsu mwisagye? Avene vakata: Ena nkuludeva. 29Pwu umwene akavabasa amiho ga vene akata: Mulolage vwu itsu mwidike. 30Pwu amiho ga vene gakadinduka. Umwene UJesu akatana sitso akata: Mbandikage alapulikaga nujyunge tsitsitsi. 31Avene vakahuma panzi, pwu vakatsitsova mwoni nkilunga. 32Vwu vali pakuhuma ava, pwu vakangega kumwene ujyunge umunu uvi ali kinunu, ulwakuva ali nimepo imbivi. 33Pwu umwene akajihumya imepo imbivi, pwu akatsova vuvule umunu uvi ali kinunu. Pwu vakadega avanu umwu vavelye ikipuga kyoni vakata: Natutsivweni lusiku itsili nditsi mwa Isilaeli umwu. 34Avene avapalisai vwu vakata: Imepo imbivi ikuvahumya mumbaha va mepo imbivi.
35Pwu UJesu akatsungutila nkilunga akamala uvutsenge vwoni nuvuvaha nu vudebe, akavavula inongwa nńumba tsa vene itsa kwisajilamwo, akavavula inongwa innonu tsa ludeva, akavaponya uvutamu nuvulema vwoni avanu. 36Vwu ikuvalola avanu isipuga vuvule, pwu ikisa kikambona mwitumbu akavasagila ulwakuva vajeleṅine vahambile vuvule ukuta ṅolo inzila ndimi. 37Pwu akavavula avakongi va mwene akata: Ijyene imbene jyu ńongosu, lola vadebe avabeni. 38Mutekelesage lino kumwenembene asuṅage avańakubena mumbene jya mwene.
Currently Selected:
Matai 9: Kinga
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
New Testament in Kikinga © British and Foreign Bible Society, 1961.
