Jénésis 8
8
Nkéré mú Buce bu/sáng
1Osówo o*da/ráp Núwa ne enyam nyí e/mû ne nyǐ ké ńsukyíkang*. O/chi bufú bu-tugi, omu o-kpet enúng. 2Osówo o/cít bambyí-omu ḿbé kyísí ne afyi-omu nyí kyíbóng. Omu o-mîng ena, 3ne omu o-kpet enúng o-câ dekdek ké bajam-ací káchâtkányi esim diǐkpú. 4Ké ací onyiryiká ne afee, ké etukáku káchâtkányi, ńsukyíkang o/datwôom ké eku nyí Arárat. 5Omu o-sep ng o-câ kyísí, ne ké mbwôp kashú-dyicí, ké etukáku diǐkpú, ashí-eku a-byí kyíjí.
6Ké nkéré mú kii/rí bajam-ací bafee, Núwa o-kuu wíndu 7o-twóm kanurung kabónge ńké badakó rében ka-byí kyíjí. Kanurung ánke ka*da/chîbwa esim*. Ka/wâa ka-byí i ka-wáp ng tete buce bu-sáng gbât. 8Núwa o-chîtwóm ámalê abónge o/fu, nyǐ o-nyît ng â buce boo/sáng, 9nké ké nǎ, omu o/mû o/tôong o-cít ng kángkáng byěm, ámalê a*da/ri kyikit ńkyí adatû*. A-pín a-bwa esim, Núwa o-tan bubwô o-níbî kányí o-fé ké kafâ-ńsukyíkang. 10Núwa o/chîbám ací káchâtkányi ne o-chîtwóm ámalê a-ca kyíjí. 11Ámalê ányi a/bwa esim ké dyikurúku a-kâm Núwa ne bushǎan-ólif ké ocím. Ne Núwa o-nyît kâng o/fu, kace kaa/sáng. 12Núwa o/chîbám ací káchâtkányi ne o-chîtwóm ámalê ányi kyíjí. Ńdyí a/byí éné, a*da/chîbwa esim*.
13Ńdyí Núwa o/rí égot-aje echât ne dyije dyibónge, ké mbwôp kashú-dyicí ńdyí mbwôp kashú-otukáku, omu o/núng kángkáng. Núwa o-bâa bubóng-ńsukyíkang, o-tún achi kyíjí, o-ri o/fu, esí e-kú e-jwóm m. 14Ké nkéré nnyinyěng-otukáku o/rí ací bujam esim káchâtkányi, esí e/jwóm kanong kanong.
15Osówo o-sét Núwa o/fu, 16byí ké ńsukyíkang ne onyi eyên ne bwǎn eyên ne banyi ebe. 17Fîm kángkáng enyam ne bunurung byi-byí ne wo ké kyikû, eringe nyí edakpet efwon e-káng ejíí emúmú. 18Ne Núwa kâng o-byí ké ńsukyíkang ne onyi emen ne bwǎn emen ne banyi ebe. 19Kángkáng enyam ne bunurung byi/byí to ké ńsukyíkang dyizong ne dyizong ké dyizu ńdyí emen.
Núwa o/chi Kyifen o-kye Osówo
20Núwa o/bi kyikit-kyifen echi o-tî Óburúkpâbí. O-kúng enyam ebónge ebónge ne kanurung kabónge kabónge, ké burwám ḿbú baa*ciring* o-shí kámbyí kángkáng o-chi kyifen. 21Kyinung-byěm-kyifen ánkyi kyi/nyîn Óburúkpâbí, ne o-raa ne byiko emen o/fu, ne banyá mm*ba/chi n-chîshú ejíí* ké bubwô ḿbú ńkyí onet odachi*. Me mu n-nyît ng n/fu, kyi-fím ké dyikwá emen, okabe emen o*fí kanong*. Mm*ba/chi n-chîju kángkáng byěm ḿbyí mbyi byi-kpen n ké ejíí* wǎ eringe nyí n/chi něen*. 22Ké kyikim-nkéré ńkyí ejíí e/chi e-waa, nkéré o/chi o-kyú mú badakpang kyifát ne mú badafuu byiryíng. Kángkáng nkéré, nsísóngé ne dyibyi, kyifang ne burwom, buchú ne esû byi-man byi-kyú.
Currently Selected:
Jénésis 8: BKY
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Published by the Bible Society of Nigeria @ 1985
